Bibele Yi Hundzula Vutomi Bya Vanhu

I yini leswi susumeteleke wansati loyi a a ngungumerisa tidayimani ni ku yivela muthori wakwe leswaku a va mutirhi wo tshembeka? I yini leswi pfuneke wansati un’wana loyi a ringeteke ku tisunga kambirhi leswaku a hanya vutomi lebyi nga ni xikongomelo? Xana wanuna un’wana loyi a a nwa ngopfu byala ni ku tirhisa swidzidziharisi u swi kotise ku yini ku tshika mikhuva yoleyo leyi dlayaka? Ehleketa hi swilo leswi va swi vuleke.

MATIMU YAKWE HI KU KOMISA

VITO: MARGARET DEBRUYN

MALEMBE: 45

TIKO: BOTSWANA

LESWI A A SWI ENDLA: MUNGUNGUMERISI TLHELO MUYIVI

VUTOMI BYA MINA: Tata wa mina u velekiwe eJarimani kambe u ve muaka-tiko wa South-West Africa (laha sweswi ku nga Namibia). Mana wa mina a a huma eBotswana, erixakeni ra Mangologa. Ndzi velekiwe edorobeni ra Gobabis, le Namibia.

Hi va-1970, mfumo wa Afrika Dzonga a wu lawula tiko ra Namibia naswona wu sindzise leswaku milawu leyi hambanisaka valungu ni vantima yi tirhisiwa emadorobeni ni le migangeni hinkwayo. Leswi vatswari va mina a ku ri mulungu ni muntima va kuceteriwe ku va va hambana. Kutani manana u fambe na mina ni vamakwerhu hi tlhelela eBotswana, laha hi fikeke hi tshama eGhansi.

Hi 1979, ndzi rhurhele edorobeni ra Lobatse, eBotswana, laha ndzi tshameke ni vatswari van’wana lava a va ndzi hlayisa loko ndzi ri karhi ndzi hetisa xikolo. Endzhakunyana ndzi kume ntirho wo va matsalana endhawini yo lunghisa timovha. Ndzi kule ndzi ri karhi ndzi tiva leswaku Xikwembu a xi va pfuni vanhu, ni leswaku munhu u fanele a endla xin’wana ni xin’wana lexi a lavaka ku xi endla—ku nga khathariseki leswaku i xilo xo biha kumbe lexinene—leswaku a tiwundla yena swin’we ni ndyangu wakwe.

Leswi a ndzi ri ni xikhundlha entirhweni, ndzi tirhise lunghelo rolero leswaku ndzi yiva tinsimbhi ta timovha. Nkarhi wun’wana ni wun’wana loko xitimela xi hundza hi le dorobeni ra ka hina nivusiku, mina ni vanghana va mina a hi xi khandziya kutani hi yiva xin’wana ni xin’wana lexi a hi xi kuma. Naswona a ndzi ngungumerisa tidayimani, nsuku ni koporo. Ndzi sungule ku tirhisa swidzidziharisi, ndzi va ni madzolonga swinene naswona a ndzi ri ni swigangu swo tala.

Kutani hi 1993, ndzi hetelele ndzi kumiwa ndzi ri karhi ndzi yiva xisweswo ndzi hlongoriwa entirhweni. Lava a va tivula vanghana va mina va ndzi fularherile hileswi a va chava leswaku na vona va nga kumiwa. Leswi va ndzi jikeleke, ndzi tibyele leswaku a ndzi nge he pfuki ndzi tshembe munhu.

 NDLELA LEYI BIBELE YI HUNDZULEKE VUTOMI BYA MINA HA YONA: Hi 1994, ndzi hlangane na Tim na Virginia, ku nga vachumayeri lava humaka entsungeni lava nga Timbhoni ta Yehovha. Hi nkarhi wo wisa ninhlikanhi a va dyondza na mina Bibele endhawini leyi se a ndzi tirha eka yona. Endzhakunyana, loko ndzi vone leswaku se ndzi nga va tshemba, ndzi va byele leswaku va ta endlwini ya mina leswaku hi ta dyondzela kona.

Hi ku hatlisa ndzi xiye leswaku loko ndzi lava ku tsakisa Xikwembu, a ndzi fanele ndzi endla mindzulamiso yin’wana emahanyelweni ya mina. Hi xikombiso, eka 1 Vakorinto 6:9, 10 ndzi dyondze leswaku “loko ti ri timbhisa, . . . kumbe makhamba, kumbe vanhu va makwanga, kumbe swidakwa, kumbe varhuketeri, kumbe vadyeleri, va nga ka va nga yi dyi ndzhaka ya mfumo wa Xikwembu.” Ndzi yi tshike ha yin’we-yin’we mikhuva ya mina yo biha. Ndzi tshike ku yiva. Ndzi tshike vanghana va mina lava ndzi kuleke na vona lava a va ri tinsula-voya. Naswona ndzi tshike swigangu swa mina hikwalaho ko pfuniwa hi Yehovha.

NDLELA LEYI NDZI VUYERIWEKE HA YONA: Ndzi endle matshalatshala yo tala leswaku ndzi dyondza ku lehisela vana va mina mbilu ni ku nga va holoveli loko va dyohile. (Vaefesa 4:31) A ndzi ringeta ku lulamisa timhaka hi ku vulavula na vona hi ndlela yo rhula. Sweswo swi endle leswaku ku va ni vuyelo lebyinene naswona swi endle leswaku ndyangu wa mina wu va ni vun’we.

Khale ka vanghana va mina hambi ku ri vaakelani va xiye leswaku va nga ndzi tshemba. Sweswi ndzi mutirhi la tshembekaka loyi a yi khomaka kahle mali ni swilo swa le ntirhweni. Xisweswo ndza swi kota ku tikhathalela tanihi leswi ndzi hetaka nkarhi wo tala ndzi ri karhi ndzi pfuna vanhu van’wana leswaku va dyondza Bibele. Ndzi ma tshemba hi ku helela marito lama nga eka Swivuriso 10:22 lama nge: “Nkateko wa Yehovha—hi wona lowu fuwisaka, naswona a nga engeteli ku vaviseka eka wona.”

MATIMU YAKWE HI KU KOMISA

VITO: GLORIA ELIZARRARÁS DE CHOPERENA

MALEMBE: 37

TIKO: MEXICO

LESWI A A SWI ENDLA: U RINGETE KU TISUNGA

VUTOMI BYA MINA: Ndzi kulele endhawini leyi fuweke leyi vuriwaka Naucalpan, eXifundzheni xa Mexico. Ku sukela loko ndza ha ri ntsongo, a ndzi nga va yingisi vatswari va mina naswona a ndzi rhandza ku ya eswinkhubyanini. Ndzi sungule ku dzaha loko ndzi ri ni malembe ya 12, loko ndzi ri ni malembe ya 14 ndzi sungule ku nwa, kasi loko ndzi ri ni malembe ya 16 ndzi sungule ku tirhisa swidzidziharisi. Endzhakunyana ka malembe ma nga ri mangani, ndzi suke ekaya. Vanghana va mina vo tala a va huma emindyangwini leyi nga riki na ntwanano, laha a va biwa hi tihanyi kumbe ku rhuketeriwa. A ndzi vona vutomi byi nga pfuni nchumu lerova ndzi ringete ku tisunga kambirhi.

Loko ndzi ri ni malembe ya 19 ndzi sungule ku tirha tanihi n’wambhuri. Hikwalaho ka sweswo a ndzi hlangana ni van’watipolitiki swin’we ni vatlangi va tifilimi. Eku heteleleni ndzi tekiwile ndzi tlhela ndzi va ni vana, kambe hi mina loyi a ndzi endla swiboho hinkwaswo endyangwini wa mina. Ndzi hambete ndzi dzaha ni ku nwa, naswona a ndzi tshama ndzi khomekile. A ndzi ri ni mavulavulelo ya nhlambha naswona a ndzi rhandza mafenya lama thyakeke. A ndzi ri ni ximbilwambilwana.

Vo tala va vanghana va mina a va ri ni mahanyelo yo fana ni ya mina. Vona a va vona onge a ndzi pfumali nchumu. Kambe a ndzi nga swi tivi leswaku ndzi hanyela yini.

 NDLELA LEYI BIBELE YI HUNDZULEKE VUTOMI BYA MINA HA YONA: Ndzi sungule ku dyondza Bibele ni Timbhoni ta Yehovha hi 1998. Bibele yi ndzi dyondzise leswaku vutomi byi ni xikongomelo. Ndzi dyondze leswaku Yehovha Xikwembu u lava ku tlhela a endla misava leyi yi va Paradeyisi, a pfuxa vanhu lava feke ni leswaku ndzi nga va un’wana wa lava nga ta hanya ehansi ka swiyimo swo tano enkarhini lowu taka.

Ndzi tlhele ndzi dyondza leswaku ndlela yo kombisa Xikwembu leswaku ndza xi rhandza i ku xi yingisa. (1 Yohane 5:3) Leswi swi ndzi tikerile eku sunguleni hikuva a ndzi nga si tshama ndzi amukela nkongomiso wa munhu un’wana. Hambiswiritano, eku heteleleni ndzi xiye leswaku a ndzi nge hambeti ndzi tikongomisa. (Yeremiya 10:23) Ndzi khongele Yehovha leswaku a ndzi kongomisa. Ndzi kombele leswaku a ndzi pfuna ku hanya hi milawu yakwe ni ku dyondzisa vana va mina leswaku va hanya hi ndlela leyi hambaneke ni leyi mina a ndzi hanya ha yona.

A ku nga ri matlangwana ku cinca ndlela leyi a ndzi hanya ha yona, kambe ndzi sungule ku tirhisa ndzayo leyi kumekaka eka Vaefesa 4:22-24 leyi nge: “[Mi fanele] mi cukumeta vumunhu bya khale lebyi fambisanaka ni ndlela ya n’wina yo sungula ya ku tikhoma . . . kutani mi fanele mi ambala vumunhu lebyintshwa lebyi tumbuluxiweke hi ku ya hi ku rhandza ka Xikwembu hi ku lulama ka ntiyiso ni vutshembeki.” Eka mina ku ambala vumunhu lebyintshwa a swi vula ku tshika mikhuva leyi thyakeke yo tanihi ku dzaha ni mavulavulelo ya nhlambha. Swi ndzi tekele kwalomu ka malembe manharhu ku cinca ndlela leyi a ndzi hanya ha yona leswaku ndzi ta khuvuriwa ndzi va Mbhoni ya Yehovha.

Ku tlula kwalaho, ndzi sungule ku byarha vutihlamuleri tanihi nsati tlhelo manana. Ndzi sungule ku tirhisa ndzayo leyi kumekaka eka 1 Petro 3:1, 2 leyi nge: “N’wina vavasati lava tekiweke, tivekeni ehansi ka vanuna va n’wina, leswaku, loko ku ri ni lava nga yingisiki rito, va ta kokiwa handle ka rito hi ku tikhoma ka vasati va vona, hikwalaho ka leswi va veke timbhoni leti ti ku voneke hi mahlo ku tikhoma ka n’wina loku tengeke swin’we ni xichavo lexi enteke.”

NDLELA LEYI NDZI VUYERIWEKE HA YONA: Ndzi n’wi nkhensa swinene Yehovha hikuva sweswi se ndza swi tiva leswaku vutomi byi ni xikongomelo. Ndzi titwa ndzi ri munhu wo antswa swinene naswona ndza swi kota ku kurisa vana va mina hi ndlela leyinene ku tlula leyi mina ndzi kurisiweke ha yona. Nkarhi na nkarhi ndza tisola hikwalaho ka swiendlo swa mina swa nkarhi lowu hundzeke, kambe Yehovha u tiva mbilu ya mina. (1 Yohane 3:19, 20) A swi kanakanisi leswaku ku hanya hi milawu ya Bibele swi ndzi sirhelerile leswaku ndzi nga vaviseki naswona swi ndzi endle ndzi va ni ku rhula.

MATIMU YAKWE HI KU KOMISA

VITO: JAILSON CORREA DE OLIVEIRA

MALEMBE: 33

TIKO: BRAZIL

LESWI A A SWI ENDLA: XILOVEKELO TLHELO MUTIRHISI WA SWIDZIDZIHARISI

VUTOMI BYA MINA: Ndzi velekiwe eBagé, edorobeni rin’wana ra le Brazil leri nga ni vanhu va kwalomu ka 100 000 leri nga ekusuhi ni ndzilakano wa Brazil na Uruguay. Ku rima ni ku fuwa swifuwo a ku ri mintirho leyi vanhu va kwalaho a va tihanyisa ha yona. Ndzi kulele emugangeni lowu a wu swerile laha vantshwa va kona a va ri tinsula-voya leti a ti dume hi ku endla vugevenga, ku nwa byala ni ku tirhisa swidzidziharisi.

Endzhaku ka loko ndzi tshike xikolo, ndzi sungule ku nwa byala, ku dzaha mbangi ni ku yingisela vuyimbeleri bya Rock lebyi pfalaka ni tindleve. A ndzi nga pfumeli eka Xikwembu. A ndzi ehleketa leswaku ku xaniseka ni mpfilumpfilu hinkwayo leyi nga kona emisaveni i vumbhoni bya leswaku Xikwembu a xi kona.

A ndzi tlanga katara ndzi tlhela ndzi tsala tinsimu  naswona hakanyingi a ndzi susumeteriwa hi buku ya Bibele ya Nhlavutelo. Ntlawa wa mina wa vuyimbeleri a swi nga wu fambeli kahle hilaha a ndzi swi langutele hakona, kutani ndzi sungule ku tirhisa ngopfu swidzidziharisi leswi dungaka nhloko swinene. A ndzi nga ri na mhaka niloko ndzi nga tshuka ndzi file hikwalaho ko tirhisa swidzidziharisi ku tlula mpimo. Swiyimbeleri swo tala leswi a ndzi swi rhandza swinene swi fe hikwalaho ko tirhisa swidzidziharisi ku tlula mpimo.

A ndzi xava swidzidziharisi leswi a ndzi swi tirhisa hi ku lomba mali eka kokwa wa mina loyi a ndzi kuriseke. Loko a ndzi vutisa leswaku ndzi lava ku xava yini a ndzi n’wi hembela. Lexi nyanyiseke xiyimo, ndzi sungule ku tirhisa vungoma. Ndzi tsakisiwe hi masalamusi, ndzi ehleketa leswaku a ma ta ndzi pfuna ku tsala tinsimu leti tsakisaka.

NDLELA LEYI BIBELE YI HUNDZULEKE VUTOMI BYA MINA HA YONA: Endzhaku ka loko ndzi sungule ku hlaya Bibele ni ku ya eminhlanganweni ya Timbhoni ta Yehovha, langutelo ra mina ri sungule ku cinca. Hakatsongo-tsongo ndzi sungule ku tsakela vutomi ni ku tshama ndzi tsakile. Leswi a ndzi susumetiwa hi langutelo ra mina lerintshwa, ndzi teke xiboho xo tsema misisi ya mina yo leha. Ndzi yi tshike yi kula hi vomu leswaku ndzi kombisa leswaku a ndzi nga tsakanga ni leswaku a ndzi ri muxandzuki. Kutani ndzi xiye leswaku a ndzi fanele ndzi tshika ku nwa ngopfu byala, ku tirhisa swidzidziharisi ni ku dzaha leswaku ndzi amukeleka eka Xikwembu. Ndzi tlhele ndzi vona leswaku a ndzi fanele ndzi cinca vuyimbeleri lebyi a ndzi byi yingisela.

Loko ndzi ye eminhlanganweni ya Timbhoni ta Yehovha ro sungula, ndzi vone ndzimana ya Bibele leyi a yi tsariwe eka bodo leyi a yi hayekiwe ekhumbini. Ndzimana ya kona a ku ri Swivuriso 3:5, 6 leyi nge: “Tshemba Yehovha hi mbilu ya wena hinkwayo naswona u nga titshegi hi ku twisisa ka wena n’wini. N’wi tivise tindlela ta wena hinkwato, kutani yena u ta lulamisa tindlela ta wena.” Ku anakanyisisa hi tsalwa rolero swi ndzi tiyisekise leswaku Yehovha a a ta ndzi pfuna ku hundzula vutomi bya mina loko ntsena ndzi n’wi pfumelela.

Nilokoswiritano, ku tshika mahanyelo yo biha lawa se a ma dzikile embilwini ya mina swin’we ni mikhuva leyi se a yi ndzi godzomberile, a swi tika ku fana ni ku tsema voko ra mina. (Matewu 18:8, 9) A ndzi nga ta swi kota ku tshika mikhuva leyi hakatsongo-tsongo. A ndzi swi tiva leswaku sweswo a swi nga ta tirha nikatsongo eka mina. Kutani ndzi lo namba ni ku yi thya, mikhuva ya mina yo biha. Ndzi tlhele ndzi papalata vanhu lava a va ta ndzi kucetela ku va ndzi tlhelela emahanyelweni ya mina ya khale swin’we ni ku ya etindhawini leti a ti ta endla ndzi ringeka.

Ndzi dyondze ku tinyungubyisa hi swilo leswi a ndzi kota ku swi endla siku ni siku, ematshan’wini yo ehleketa swinene hi minkarhi leyi ndzi titwaka ndzi hele matimba. A ndzi ehleketa leswaku a swi ta va swinene ngopfu ku va ndzi va munhu la baseke emirini, emahanyelweni ni le timhakeni leti khumbaka ripfumelo ra mina, leswi a swi ta endla leswaku ndzi amukeleka eka Yehovha. Ndzi khongele eka Yehovha leswaku a ndzi pfuna ku va ndzi nga tsundzuki mikhuva ya mina ya khale kambe ndzi ya emahlweni ndzi endla nhluvuko kutani u ndzi pfunile. Minkarhi yin’wana a ndzi tlhelela eka mikhuva ya mina ya khale. Kambe a ndzi phikelela ndzi dyondza Bibele ni mudyondzisi wa mina hambileswi minkarhi yin’wana a ndzi va ndzi khomiwe hi babalaza.

Ntiyiso lowu a ndzi wu dyondza eBibeleni malunghana ni Xikwembu—leswaku xa khathala hi un’wana ni un’wana wa hina, leswaku xi ta herisa vukhongeri bya mavunwa ni leswaku sweswi xi seketela ntirho wo chumayela wa misava hinkwayo—a ndzi vona wu twala swinene. (Matewu 7:21-23; 24:14; 1 Petro 5:6, 7) Eku heteleleni, ndzi tiendleke xiboho xo va ndzi tinyiketela eka Xikwembu. A ndzi lava ku xi nkhensa hikwalaho ka swilo hinkwaswo leswi xi ndzi endleleke swona.

NDLELA LEYI NDZI VUYERIWEKE HA YONA: Sweswi ndza swi tiva leswaku ndzi hanyela yini. (Eklesiasta 12:13) Sweswi se ndzi kota ni ku pfuna swirho swa ndyangu wa ka hina. Ndzi dyondzise kokwa wa mina leswi ndzi swi dyondzeke eBibeleni naswona sweswi i Mbhoni ya Yehovha. Swirho swin’wana swo hlayanyana swa ndyangu wa ka hina ni un’wana wa vanghana va mina lava a hi yimbelela swin’we, na vona se i Timbhoni ta Yehovha.

Sweswi ndzi tekile, naswona mina ni nsati wa mina hi heta nkarhi wa hina wo tala hi ri karhi hi dyondzisa vanhu van’wana Bibele. Ndzi ehleketa leswaku ndzi katekisiwe swinene hileswi ndzi dyondzeke ku “tshemba Yehovha hi mbilu ya [mina] hinkwayo.”

[Marito lama tshahiweke exihlokweni lama nga eka tluka 29]

“Hakatsongo-tsongo ndzi sungule ku tsakela vutomi ni ku tshama ndzi tsakile”