Xana Xikwembu Xa Khathala Ha Mina?

Tinhlamulo leti tolovelekeke:

▪ “Xikwembu i xa nkoka swinene lerova a xi na mhaka ni swiphiqo swa mina.”

▪ “A ndzi tshembi leswaku xa khathala ha mina.”

I yini leswi Yesu a swi vuleke?

▪ “Ntlhanu wa swindzingiri swi xavisiwa hi timali timbirhi ta nsimbi ta risima leritsongo, a hi swona ke? Kambe ku hava ni xin’we xa swona lexi rivalekaka emahlweni ka Xikwembu. Kambe ni misisi ya tinhloko ta n’wina yi hlayiwile hinkwayo. Mi nga chavi; mi ni risima ro tlula swindzingiri swo tala.” (Luka 12:6, 7) A swi kanakanisi leswaku Yesu u dyondzise leswaku Xikwembu xa khathala ha hina.

▪ “Mi nga tshuki mi vilela kutani mi ku, ‘Xana hi ta dya yini?’ kumbe, ‘Xana hi ta nwa yini?’ kumbe, ‘Xana hi ta ambala yini?’ Hikuva hinkwaswo leswi i swilo leswi va matiko va swi lavisisaka hi mapfundza. Hikuva Tata wa n’wina wa le tilweni wa swi tiva leswaku ma swi lava swilo leswi hinkwaswo.” (Matewu 6:31, 32) Yesu u vule leswaku Xikwembu xa swi tiva swilaveko swa hina.

BIBELE yi vula hi ku kongoma leswaku Xikwembu xa hi khathalela. (Pisalema 55:22; 1 Petro 5:7) Kutani loko xi khathala ha hina, ha yini hi weriwa hi maxangu yo tala namuntlha? Loko Xikwembu xi ri ni rirhandzu naswona xi ri ni matimba lamakulu, ha yini xi nga teki goza xi herisa maxangu?

Nhlamulo ya kona yi katsa mhaka leyi vanhu vo tala va nga yi tiviki—Sathana Diyavulosi i mufumi wa misava leyi yo homboloka. Loko Sathana a ringa Yesu u n’wi nyike mimfumo hinkwayo ya misava, a ku: “Ndzi ta ku nyika vulawuri lebyi hinkwabyo ni ku vangama ka byona, hikuva byi nyikiwe mina, naswona ndzi byi nyika hambi ku ri mani loyi ndzi rhandzaka ku n’wi nyika byona.”—Luka 4:5-7.

I mani loyi a vekeke Sathana ku va mufumi wa misava leyi? Loko vatswari va hina vo sungula, Adamu na Evha, va yingise Sathana kutani va fularhela milawu ya Xikwembu, entiyisweni va hlawule Sathana leswaku a va mufumi wa vona. Ku sukela loko va xandzukile, Yehovha Xikwembu u pfumelele leswaku ku hundza nkarhi wo karhi ku kombisa leswaku vulawuri bya Sathana byi tsandzekile hi ku helela. Yehovha a nga va sindzisi vanhu leswaku va n’wi tirhela, kambe u hi pfulele ndlela yo tlhelela eka yena.—Varhoma 5:10.

Leswi Xikwembu xi khathalaka hi hina, xi endle malunghiselelo ya leswaku Yesu a hi ntshunxa eka vulawuri bya Sathana. Ku nga ri khale, Yesu u “ta herisa la nga ni tindlela to vanga rifu, ku nga Diyavulosi.” (Vaheveru 2:14) Hi ku endla tano, u ta “herisa mintirho ya Diyavulosi.”—1 Yohane 3:8.

Misava leyi yi ta tlhela yi va paradeyisi. Hi nkarhi wolowo, Xikwembu “xi ta sula mihloti hinkwayo ematihlweni ya [vanhu], rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona. Swilo swo sungula swi [ta va se swi] hundzile.”—Nhlavutelo 21:4, 5. *

[Nhlamuselo ya le hansi]

[Marito lama tshahiweke exihlokweni lama nga eka tluka 8]

Misava leyi yi ta tlhela yi va paradeyisi