XANA u ehleketa leswaku swa tika ku endla swilo leswinene? *— Loko nhlamulo ya wena ku ri ina, vanhu vo tala a va ta pfumelelana na wena. Hambi ku ri vanhu lavakulu va kuma swi tika ku endla leswi va swi tivaka kahle leswaku i swinene. A hi voneni leswaku ha yini Yosiya a swi n’wi tikela ngopfu ku endla swilo leswinene. Xana wa swi tiva leswaku Yosiya a ku ri mani?—

Yosiya a ku ri n’wana wa Amoni, hosi ya Yuda, loyi a a ri ni malembe ya 16 ntsena loko Yosiya a velekiwa. Amoni a a homboloke ngopfu ku fana na Hosi Manase, tata wakwe. Entiyisweni, Manase u ve hosi yo homboloka ngopfu ku ringana malembe yo tala. Kambe u khomiwe hi Vaasiriya kutani va ya n’wi pfalela ekhotsweni etikweni ra Babilona leri a ri ri ekule swinene. Loko Manase a ri ekhotsweni, u kombele Yehovha leswaku a n’wi rivalela naswona Yehovha u n’wi rivalerile.

Loko Manase a ntshunxiwile evuhlongeni, u tlhelele eYerusalema laha a fikeke a va hosi nakambe. Hi ku hatlisa u lulamise swilo swo biha leswi a swi endleke kutani a pfuna vanhu leswaku va tirhela Yehovha. Swi fanele swi n’wi twise ku vava loko n’wana wakwe Amoni a nga xi landzelanga xikombiso xakwe lexinene. Hi nkarhi wolowo Yosiya u velekiwile. Bibele a yi vuli nchumu malunghana ni leswaku Manase u hete nkarhi wo tanihi kwihi a ri ni ntukulu wakwe Yosiya. Kambe xana u ehleketa leswaku Manase a nga ha va a ringete ku n’wi pfuna leswaku a tirhela Yehovha?—

Loko Yosiya a ri ni malembe ya tsevu ntsena, Manase u file kutani Amoni tata wa Yosiya u ve hosi. Amoni u fume malembe mambirhi ntsena a nga si dlayiwa hi malandza yakwe. Kutani loko Yosiya a ri ni malembe ya nhungu u ve hosi ya Yuda. (2 Tikronika, ndzima 33) Xana u ehleketa leswaku ku endleke yini hi nkarhi wolowo? Xana Yosiya u hlawule ku tekelela xikombiso xo biha xa tata wakwe Amoni kumbe xikombiso lexinene xa kokwa wakwe Manase loyi a hundzukeke?—

Hambileswi Yosiya a a ha ri ntsongo, a a swi tiva leswaku u lava ku tirhela Yehovha. Kutani u yingise lava a va rhandza Yehovha ematshan’weni ya lava a va ri vanghana va tata wakwe. Yosiya a a ri na malembe ya nhungu ntsena, kambe a a swi  tiva leswaku i swinene ku yingisa vanhu lava rhandzaka Xikwembu. (2 Tikronika 34:1, 2) Xana wa swi lava ku tiva swo karhi hi lava pfuneke Yosiya ni ku va swikombiso leswinene eka yena?—

Un’wana wa lava vekeleke Yosiya xikombiso lexinene a ku ri muprofeta Sofaniya. A a ri xaka ra Yosiya, hikuva swi nga ha endleka leswaku a a ri ntukulu wa Hosi Hezekiya lowo lulama, tata wa Manase. Eku sunguleni ka ku fuma ka hosi Yosiya, Sofaniya u tsale buku ya Bibele leyi vitaniwaka hi vito rakwe. Sofaniya u lemukise vanhu vo homboloka hi swilo swo biha leswi a swi ta va humelela naswona swi le rivaleni leswaku Yosiya u yingise swilemukiso swoleswo.

Kutani un’wana loyi a vekeleke Yosiya xikombiso lexinene a ku ri Yeremiya, loyi kumbexana u tshameke u twa ha yena. Yeremiya na Yosiya a va ha ri majaha naswona va kulele etindhawini leti a ti vandzamanile. Yehovha u huhutele Yeremiya ku tsala buku ya Bibele leyi vitaniwaka hi vito rakwe. Loko Yosiya a fa enyimpini, Yeremiya u tsale risimu ro hlawuleka leri vitaniwaka risimu ra xirilo leswaku a phofula gome leri a a ri na rona. (2 Tikronika 35:25) Wa nga ehleketa hi ndlela leyi va nga ha va ka va khutazane ha yona leswaku va tshama va tshembekile eka Yehovha!

U ehleketa leswaku i yini leswi u nga swi dyondzaka eka Yosiya?— Loko wena, ku fana na yena, tata wa wena a nga ri mugandzeri wa Yehovha, xana u kona un’wana loyi a nga ku pfunaka leswaku u dyondza ha Yena? Kumbexana munhu yoloye i mana wa wena, kokwa wa wena kumbe un’wana wa maxaka ya wena. Kumbexana i munhu un’wana loyi a tirhelaka Yehovha, loyi mana wa wena a nga ta ku pfumelela leswaku u dyondza na yena Bibele.

Ku nga khathariseki leswaku i mani, Yosiya a a swi tiva leswaku u fanele a va munghana wa vanhu lava tirhelaka Yehovha, hambileswi a a ha ri ntsongo. Onge na wena u nga endla hilaha ku fanaka, u hlawula ku endla leswinene!