“Nkarhi Wa Mina A Wu Nga Si Fika”

Muchayeri wa lori leyikulu yo rhwala thyaka u tsandzeke ku yi lawula. Hiloko yi huma egondzweni yi ya tlumba mpatswa wun’wana ni jaha ra malembe ya 23 lava a va tifambela hi milenge. Hi ku ya hi leswi vuriweke hi phepha-hungu ra le Dorobeni ra New York, mpatswa wolowo wu fele kwalaho kasi jaha rolero ri titivarile. Loko ri sisimuka kutani ri vona leswi humeleleke, ri rhange ri vula leswi: ‘Ndzi twa onge ndzo lorha. Xikwembu ndzi pfune.’ Nakambe ri te: “Nkarhi wa mina a wu nga si fika.”

KUMBEXANA u tshame u twa mhaka leyi fanaka ni leyi. Loko munhu a pona ri ahlamile, vanhu va ri, ‘Nkarhi wakwe a wu nga si fika,’ kambe loko munhu a fa emhangwini leyi nga tolovelekangiki, va gimeta hi ku vula leswi, ‘Nkarhi wakwe se a wu fikile’ kumbe va ku, ‘I ku rhandza ka Xikwembu.’ Ku nga khathariseki leswaku vanhu va pfumela leswaku swilo leswi va humelelaka evuton’wini swi vangiwa hi Xikwembu kumbe hi nchumu wun’wana, kambe dyondzo ya kona ya fana. Vanhu vo tala va pfumela leswaku swilo leswi va humelelaka evuton’wini ni vuyelo bya swona swi kunguhatiwile naswona ku hava lexi va nga xi endlaka ha swona. Nakambe mhaka yoleyo a yi vuriwi ntsena loko vanhu va fa kumbe loko va humeleriwa hi timhangu; naswona a yi sungulanga namuntlha.

Hi xikombiso, Vababilona va khale a va pfumela leswaku swilo leswi humelelaka vanhu swi lawuriwa hi tinyeleti ni mafambelo ya tona. Hikokwalaho a va languta ematilweni leswaku va vona swikombiso leswi nga ta va kongomisa. Magriki ni Varhoma a va gandzela swikwembu-kati leswi vhumbhaka vumundzuku, leswi minkarhi yin’wana matimba ya swona ya ku vona loko vanhu va ta va ni vumundzuku lebyinene kumbe byo biha a ma vonaka ma tlula hambi ku ri ya swikwembu swa vona leswikulu, Zewusi na Jupiter.

Ematikweni ya le Vuxeni, Mahindu ni Mabudha va pfumela leswaku leswi humelelaka munhu sweswi i vuyelo bya swiendlo leswi a swi endleke enkarhini lowu hundzeke nileswaku swiendlo leswi a swi endlaka sweswi swi kombisa leswi nga ta n’wi humelela enkarhini lowu taka. Vukhongeri byin’wana ku katsa ni tikereke to tala ta Vujagana, na byona byi pfumela eka tidyondzo ta leswaku swilo hinkwaswo leswi hi humelelaka swi kunguhatiwe hi Xikwembu naswona ku hava lexi hi nga xi endlaka leswaku hi lawula vuyelo bya kona.

Hikokwalaho a swi hlamarisi leswi vanhu vo tala va le nkarhini wa hina va ha pfumelaka leswaku swilo leswi va humelelaka evuton’wini, vuyelo bya swiendlo swa vona swa siku ni siku swin’we ni leswi nga ta va humelela enkarhini lowu taka, hinkwaswo ka swona swi kunguhatiwe hi Xikwembu naswona ku hava lexi va nga xi endlaka ha swona. Xana na wena u ehleketa tano? Xana swilo leswi tsakisaka ni leswi nga tsakisiki, mikateko ni makhombo—hambi ku ri ku velekiwa ni ku fa—swi kunguhatiwe hi Xikwembu hakunene? Xana swilo leswi ku humelelaka evuton’wini swi kunguhatiwe hi Xikwembu? A hi voneni ndlela leyi Bibele yi nga hi pfunaka ha yona ku hlamula swivutiso leswi.

[Laha Xifaniso Xi Humaka Kona eka tluka 3]

Ken Murray/New York Daily News