Siku Ra Nkoka Swinene eMatin’wini

I siku leri Yesu Kreste a feke ha rona. Ha yini rifu ra Yesu a ri ri ra nkoka? Hikwalaho ka swivangelo swo hlayanyana.

Ku va Yesu a tshame a tshembekile kukondza a fa swi kombise leswaku munhu a nga swi kota ku tshama a tshembekile eka Xikwembu.

Rifu ra Kreste ri tlhele ri pfulela van’wana lunghelo ro va vafumi-kulobye na yena etilweni. Ku engetela kwalaho, ri pfulele vanhu vo tala ndlela yo kuma vutomi lebyi nga heriki emisaveni leyi nga paradeyisi.

Hi vusiku bya le mahlweni ka rifu ra Yesu, u tirhise xinkwa xo kala comela ni vhinyo yo tshwuka tanihi swifanekiselo swa gandzelo rakwe. Nakambe u byele vadyondzisiwa vakwe a ku: “Tshamani mi ri karhi mi endla leswi leswaku mi ndzi tsundzuka.” (Luka 22:19) Xana u ta ri tsundzuka siku leri ra nkoka?

Timbhoni ta Yehovha ta ku rhamba hi mandla mambirhi leswaku u hlanganyela na tona loko ti tsundzuka Xitsundzuxo xa rifu ra Yesu. Nan’waka siku rero ri ta tsundzukiwa hi Ravumune, April 9, endzhaku ka ku pela ka dyambu. U nga ha ya u ya hlanganyela na tona eHolweni ya Mfumo leyi nga ekusuhi ni laha u tshamaka kona. Hi kombela leswaku u vutisa Timbhoni ta Yehovha ta le ndhawini ya ka n’wina malunghana ni nkarhi ni ndhawu leyi xitsundzuxo xi nga ta khomeriwa kona.