Ku Velekiwa Hi Vuntshwa—Swi Tisa Ku Cinca Kwihi eVanhwini?

HA YINI Yesu a tirhise xiga lexi nge ‘ku velekiwa hi moya’ loko a vulavula hi ku khuvuriwa hi moya lowo kwetsima? (Yohane 3:5) Loko xiga lexi xi tirhisiwa tanihi xiga-ririmi, rito leri nge “velekiwa” ri vula “masungulo.” Hikwalaho, xiga lexi nge “ku velekiwa hi vuntshwa” xi vula “masungulo lamantshwa.” Hikokwalaho, xiga-ririmi lexi nge “veleka” ni lexi nge “velekiwa hi vuntshwa” swi kandziyisa leswaku ku ta va ni masungulo lamantshwa eka vuxaka lebyi vanhu lava khuvuriweke hi moya lowo kwetsima va vaka na byona ni Xikwembu. Ku cinca hi ku helela ka vuxaka byolebyo ku endlekisa ku yini?

Loko muapostola Pawulo a hlamusela ndlela leyi Xikwembu xi va lunghiseleleke ha yona vanhu leswaku va ya fuma etilweni, u tirhise xifaniso xa mhaka leyi endlekaka endyangwini. U tsalele Vakreste va le nkarhini wakwe leswaku Xikwembu a xi ta va mutswari wa vona, xisweswo xi va khoma “kukota vana.” (Vagalatiya 4:5; Vaheveru 12:7) Leswaku u vona ndlela leyi xikombiso xa ku wundliwa hi mutswari un’wana xi hi pfunaka ha yona ku twisisa ku cinca loku vaka kona loko munhu a khuvuriwa hi moya lowo kwetsima, tlhela u kambisisa xifaniso xa jaha leri a ri lava ku ya tsarisa exikolweni xa swichudeni swa rixaka ro karhi.

Ku Cinca Loku Vaka Kona Loko U Wundliwa Hi Mutswari Un’wana

Eka xifaniso xexo, jaha rolero leri a ri nga ri ra rixaka ro karhi, a ri nga swi koti ku tsarisa exikolweni xa swichudeni swa rixaka ro karhi. Kambe siku rin’wana swilo swi cincile. Ri tekiwe ximfumo hi tatana un’wana wa rixaka rolero leswaku a ri wundla. Xana sweswo swi xi cince njhani xiyimo xa jaha leri? Leswi se a ri tshama ni tatana loyi, ri nga ha va ri sungule ku va ni timfanelo leti fanaka ni ta vantshwa lavan’wana lava nga va rixaka rolero ku katsa ni mfanelo yo tsarisa exikolweni xexo. Ku wundliwa ka rona hi tatana loyi swi ri pfulele ndlela.

Xikombiso lexi xi kombisa swilo leswi humelelaka hi mpimo lowukulu eka lava velekiwaka hi vuntshwa. Xiya ku yelana kun’wana loku nga kona. Jaha leri leri ku vulavuriwaka ha rona eka xifaniso lexi ri ta amukeriwa exikolweni ntsena loko ri fikelela swilaveko leswi laviwaka hi xikolo xexo, ku nga ku va wa rixaka ro karhi. Kambe rona hi roxe a ri nga ta swi kota ku fikelela xilaveko xexo. Hilaha ku fanaka, vanhu van’wana va ta va vafumi eMfun’weni wa Xikwembu kumbe eka hulumendhe ya le tilweni, kambe loko ntsena va fikelela xilaveko xo amukeriwa, ku nga xa “ku velekiwa ra vumbirhi.” Kambe vona hi voxe a va nge swi koti ku fikelela xilaveko xexo hikuva Xikwembu hi xona xi endlaka leswaku va velekiwa hi vuntshwa.

I yini lexi cinceke xiyimo xa jaha leri? I milawu leyi vekiweke malunghana ni ku wundliwa ka n’wana hi mutswari un’wana. I ntiyiso leswaku  milawu yoleyo a yi endlanga leswaku jaha leri ri va munhu un’wana. Kambe endzhaku ka loko hinkwaswo leswi a swi laviwa hi nawu swi endliwile, jaha leri ri lo cinca ri va xirho xa ndyangu wun’wana. Entiyisweni ri ve ni masungulo lamantshwa—onge hiloko ri velekiwe hi vuntshwa. Ri amukeriwe tanihi n’wana wa tatana loyi a nga wa rixaka rin’wana, leswi ri nyikeke mfanelo yo tsarisa exikolweni lexiya ni ku va xirho xa ndyangu lowu nga ta ri wundla.

Hilaha ku fanaka, Yehovha u cince xiyimo xa ntlawa wa vanhu lava nga hetisekangiki hi ku sungula endlelo ra le nawini ro va a va wundla tanihi vana vakwe. Muapostola Pawulo loyi a a ri xirho xa ntlawa wolowo u tsalele vapfumeri-kulobye a ku: “Mi amukele moya wa ku vekiwa tanihi vana, moya lowu hi huwelelaka ha wona hi ku: ‘Abba, Tatana!’ Moya hi woxe wu nyikela vumbhoni swin’we ni moya wa hina leswaku hi vana va Xikwembu.” (Varhoma 8:15, 16) Hikwalaho ka milawu ya ku wundliwa hi mutswari un’wana, Vakreste volavo va ve swirho swa ndyangu wa Xikwembu kumbe “vana va Xikwembu.”—1 Yohane 3:1; 2 Vakorinto 6:18.

I ntiyiso leswaku hambileswi vana volavo va tekiweke hi Xikwembu leswaku xi va mutswari wa vona, sweswo a swi xi cincanga xiyimo xa vona hikuva va ha ri vanhu lava nga hetisekangiki. (1 Yohane 1:8) Nilokoswiritano, hilaha Pawulo a hlamuseleke hakona, endzhaku ka loko swilo leswi lavekaka leswaku vana va wundliwa hi mutswari un’wana swi endliwile, va kuma xiyimo lexintshwa. Hi nkarhi lowu fanaka, moya wa Xikwembu wu endla leswaku vana volavo lava wundliwaka hi mutswari un’wana va va ni ntshembo lowu tiyeke wa leswaku va ta tshama na Kreste etilweni. (1 Yohane 3:2) Ntshembo wolowo lowu tiyeke lowu va nyikiweke wona hi moya lowo kwetsima wu endle leswaku va languta vutomi hi ndlela yin’wana. (2 Vakorinto 1:21, 22) Hakunene va va ni masungulo lamantshwa, onge hiloko va velekiwa hi vuntshwa.

Loko Bibele yi vulavula hi vana lava wundliwaka hi Xikwembu yi ri: “Va ta va vaprista va Xikwembu ni va Kreste, naswona va ta va tihosi swin’we na yena ku ringana malembe wolawo ya 1 000.” (Nhlavutelo 20:6) Vana lava wundliwaka hi Xikwembu va ta va tihosi swin’we na Kreste eMfun’weni wa Xikwembu kumbe eka hulumendhe ya le tilweni. Muapostola Petro u byele vapfumeri-kulobye leswaku a va ta kuma ‘ndzhaka leyi nga onhakiki ni leyi nga nyamangiki ni leyi nga vuniki’ leyi va ‘vekeriweke yona ematilweni.’ (1 Petro 1:3, 4) Yoleyo i ndzhaka ya risima hakunene!

Hambiswiritano, mhaka leyi ya vanhu lava nga ta fuma etilweni yi tlakusa xivutiso lexi. Loko lava velekiweke ra vumbirhi va ta fuma tanihi tihosi etilweni, xana i vamani lava va nga ta va fuma? Xivutiso xexo xi ta kambisisiwa eka xihloko lexi landzelaka.

[Xifaniso lexi nga eka tluka 10]

I yini leswi Pawulo a swi vuleke malunghana ni ku wundliwa hi mutswari un’wana?