1 Tshemba Bibele

“Matsalwa hinkwawo ma huhuteriwe hi Xikwembu naswona ma pfuna ku dyondzisa, ku tshinya, ku lulamisa swilo.”—2 Timotiya 3:16.

HA YINI SWI TIKA? Vanhu vo tala va vula leswaku Bibele i buku ntsena leyi tsariweke hi vanhu. Van’wana va pfumela leswaku matimu lama nga eBibeleni a hi ntiyiso. Kasi van’wana va vula leswaku ndzayo leyi nga eBibeleni a yi pfuni nchumu kumbe yi hundzeriwe hi nkarhi.

U NGA XI HLULA NJHANI XIHINGA XEXO? Hakanyingi vanhu lava nga yi tshembiki Bibele kumbe lava ehleketaka leswaku ndzayo ya yona a yi pfuni nchumu, a va lo endla ndzavisiso kutani va kuma leswaku swi tano. Va vula ntsena leswi va swi tweke eka van’wana. Hambiswiritano, Bibele ya lemukisa: “Un’wana ni un’wana la nga riki na ntokoto u pfumela rito rin’wana ni rin’wana, kambe lowo tlhariha u xiyisisa magoza yakwe.”—Swivuriso 14:15.

Ematshan’weni yo pfumela xin’wana ni xin’wana lexi u byeriwaka xona hi van’wana handle ko va vutisa swivutiso, ha yini u nga tekeleli xikombiso xa Vakreste lava hanyeke hi lembe-xidzana ro sungula lava a va tshama eBeriya, laha sweswi ku nga en’walungwini wa tiko ra Greece? A va nga pfumeli xin’wana ni xin’wana lexi a va byeriwa xona. Kambe a va dume hi ku “kambisisa Matsalwa hi vukheta siku ni siku ku vona loko swilo leswi swi ri tano.” (Mintirho 17:11) Hi ku komisa a hi kambisiseni swivangelo swimbirhi leswi nga ku endlaka u tshemba leswaku Bibele i Rito ra Xikwembu leri huhuteriweke.

Matimu lama nga eBibeleni ma pakanisa. Ku ringana malembe yo tala, vakaneti va Bibele va hehle Bibele naswona ninamuntlha va ha yi hehla hileswaku leswi yi swi vulaka malunghana ni mavito ya vanhu ni ya tindhawu i mavunwa. Kambe nkarhi na nkarhi, vumbhoni lebyi kumiwaka byi kombisa leswaku swihehlo swa vakaneti volavo a swi nga sekeriwanga helo naswona rungula leri nga eBibeleni ra tshembeka.

Hi xikombiso, vakambisisi va Bibele va tshame va vula leswaku a ku si tshama ku va ni Hosi ya Asiriya leyi vuriwaka Sargoni leyi ku vulavuriwaka ha yona eka Esaya 20:1. Hambiswiritano, hi va-1840, vayimburi va kume xigodlho xa hosi yoleyo loko va endla vuyimburi. Sweswi Sargoni i yin’wana ya tihosi leti tiviwaka swinene ta Asiriya.

Vakaneti va Bibele va vule leswaku a ku si tshama ku va ni munhu loyi a vuriwaka Pontiyo Pilato, ku  nga ndhuna-nkulu ya le Rhoma leyi leriseke leswaku Yesu a dlayiwa. (Matewu 27:1, 22-24) Kambe hi 1961 ku kumiwe ribye leri nga ni vito ra Pilato ni xikhundlha xakwe ekusuhi ni doroba ra Khezariya le Israyele.

Malunghana ni ku pakanisa ka matimu lama nga eBibeleni, nkandziyiso wun’wana wa buku leyi tsariweke hi October 25, 1999, wu te: “Vuyimburi bya manguva lawa byi swi kombise erivaleni hi tindlela leti nga tolovelekangiki leswaku timhaka ta khale ta swiphemu swa nkoka swinene swa Bibele, ku nga Testamente ya Khale ni Testamente Leyintshwa ta pakanisa—ti ni vumbhoni lebyi seketelaka timhaka ta vakokwana va khale va tiko ra Israyele, ku huma ka Vaisrayele aEgipta, tihosi ta le ndyangwini wa Davhida ni ndlela leyi a ku hanyiwa ha yona enkarhini wa Yesu.” (U.S. News & World Report) Hambileswi ku tshemba Bibele swi nga ti tshegangiki hi leswi kumiweke hi vuyimburi, kambe ku pakanisa ka matimu wolawo hi swona leswi a wu ta swi langutela eka buku leyi huhuteriweke hi Xikwembu.

Ndzayo ya vutlhari leyi nga eBibeleni yi vuyerisa vanhu va mixaka hinkwayo. Ka ha sele malembe yo tala leswaku vanhu va tshubula leswaku ku ni switsongwatsongwana ni ndlela leyi swi hangalasaka mavabyi ha yona evanhwini, Bibele yi khutaze mikhuva ya mbhasiso leyi ya ha tirhaka ninamuntlha. (Levhitika 11:32-40; Deteronoma 23:12, 13) Swirho swa ndyangu leswi tirhisaka ndzayo ya le Bibeleni malunghana ni ndlela leyi swi faneleke swi khomana ha yona ekaya swa tsaka. (Vaefesa 5:28–6:4) Munhu loyi a hanyaka hi milawu ya Bibele a nga ha va mutirhi wo tshembeka entirhweni kumbe a nga ha va muthori loyi a anakanyelaka swinene. (Vaefesa 4:28; 6:5-9) Vanhu va tshama va tsakile loko va tirhisa milawu ya Bibele. (Swivuriso 14:30; Vaefesa 4:31, 32; Vakolosa 3:8-10) Hi langutele leswaku Muvumbi wa hina a hi nyika ndzayo yo tano leyi pfunaka.

HI BYIHI VUYELO BYA KONA? Vutlhari lebyi nga eBibeleni byi nga tlharihisa hambi ku ri munhu loyi a nga riki na ntokoto. (Pisalema 19:7) Ku tlula kwalaho, loko se hi yi tshemba Bibele, yi nga hi pfuna leswaku hi teka goza leri landzelaka ra ku va ni ripfumelo leri tiyeke.

Leswaku u kuma rungula leri engetelekeke, vona ndzima 2 leyi nge, “Bibele I Buku Leyi Humaka Eka Xikwembu,” ebukwini leyi nge Xana Bibele Yi Dyondzisa Yini Hakunene? *

[Nhlamuselo ya le hansi]