Swivutiso Swa Vahlayi

Xana Maxangu Lama Hi Welaka I Nxupulo Lowu Humaka Eka Xikwembu?

Xana evuton’wini bya wena u tshame u humeleriwa hi xiendlakalo lexi vavaka lexi endleke leswaku u tivutisa loko Xikwembu ku ri xona lexi endleke leswaku u weriwa hi khombo rolero? Ku khomiwa hi vuvabyi hi xitshuketa, ku humeleriwa hi mhangu leyi ku lamateke kumbe ku fa ka xirho xa ndyangu swi nga languteriwanga swi nga ha ku endla u ehleketa leswaku Xikwembu xi le ku ku xupuleni hi ku kongoma.

Ematshan’weni yo ehleketa sweswo, swi fanele swi ku chavelela ku tiva leswaku Xikwembu xi lava leswaku vanhu va tsaka naswona va nga humeleriwi hi swilo swo biha. Sweswo swi vonaka hileswi loko Xikwembu xi tumbuluxe vanhu vo sungula, xi va vekeke “entangeni wa Edeni,” ku nga ntanga lowu fanaka ni paradeyisi, laha a va ta hanya handle ko humeleriwa hi maxangu.—Genesa 2:15.

Lexi vavisaka, vanhu volavo vo sungula va hlawule ku lahla lunghelo rolero leri tsakisaka kutani va xandzukela Xikwembu hi vomu. Sweswo swi va vangele maxangu yo tala swin’we ni vana va vona hinkwavo, ku katsa na hina. Ha yini? Xiyimo lexi xi nga fanisiwa ni vuyelo lebyi nga vaka kona loko nhloko ya ndyangu yi nga hakeli mali ya yindlu leyi va tshamaka eka yona. Ndyangu hinkwawo wu nga hlongoriwa endlwini yoleyo kutani va sungula ku xaniseka. Hilaha ku fanaka, vanhu hinkwavo va le ku xanisekeni ku sukela loko vatswari va hina vo sungula va xandzukele Xikwembu. (Varhoma 5:12) Eka malembe yo tala lama hundzeke, Yobo, wanuna wo lulama u tshame a vula leswaku loko ku vava ni maxangu lawa a a ri na wona ma nga ‘vekiwa exikalweni,’ a ma ta “tika ku tlula ni sava ra malwandle.”—Yobo 6:2, 3.

Nchumu wun’wana lowu hi vangelaka maxangu hileswi hi nga swi kotiki ku vona swilo leswi nga ta humelela enkarhini lowu taka. Hi xikombiso, ehleketa hi munhu loyi a qachaka vanhu leswaku va aka tiyindlu endhawini leyi ku talaka ku va ni mindzilo kutani loko ti hela a ti xavisa. Leswi wena u nga yi tiviki mhaka yoleyo, u xave yin’wana ya tiyindlu toleto kutani u tshama eka yona. Xana u ta va u nga tiveki ekhombyeni lerikulu wena ni ndyangu wa wena? Loko mo tshuka mi humeleriwa hi khombo ro karhi, xana mi nga swi teka ku ri ku xupuriwa hi Xikwembu? Ntiyiso wa mhaka leyi wu tsariwe eBibeleni: “Un’wana ni un’wana la nga riki na ntokoto u pfumela rito rin’wana ni rin’wana, kambe lowo tlhariha u xiyisisa magoza yakwe.”—Swivuriso 14:15.

Hambiswiritano, swa chavelela ku tiva leswaku hambileswi hinkwerhu hi nga weriwaka hi maxangu, Xikwembu xi ni xikongomelo xo ntshunxa vanhu emaxangwini ku nga ri khale. Loko nkarhi wu fika, u nge he tlheli u xaniseka, u vona vanhu va xaniseka hambi ku ri ku twa hi ta maxangu. Ku hlunama, switlhavi, rifu ni ku rila swi ta va “swi hundzile.” (Nhlavutelo 21:4) Nakambe nchumu wun’wana lowu tsakisaka i xitshembiso xa leswaku vanhu va nge he tlheli va aka tiyindlu ni ku byala swimila leswaku swi onhiwa hi tinyimpi kumbe timhangu ta ntumbuluko. Ematshan’weni ya sweswo, ntirho wa mavoko ya vona va ta wu “tirhisa hi xitalo.”—Esaya 65:21-25.

Loko wa ha rindzele nkarhi lowu Xikwembu xi nga ta herisa maxangu hi ku helela, i yini leswi u nga swi endleka leswaku u hunguta vuyelo bya wona? Nchumu wo sungula ni wa nkoka swinene, Bibele yi hi khutaza leswaku hi “nga titshegi hi ku twisisa ka [hina vini],” kambe hi “tshemba Yehovha hi mbilu ya [hina] hinkwayo.” (Swivuriso 3:5) Lava nkongomiso ni nchavelelo eka yena. Yingisa swileriso swa Xikwembu leswi nga eBibeleni. Swi ta ku pfuna leswaku u endla swiboho leswinene naswona swi ta ku sirhelela eka maxangu wolawo lama nga papalatekaka.—Swivuriso 22:3.