Xana Xikwembu Xi Tshamela Ku Hundzula Mianakanyo Ya Xona?

LOKO Bibele yi vulavula hi Xikwembu yi ri: “Yena a nga cinca-cinci ku fana ni ku hundzuluka ka ndzhuti.” Xikwembu xi vule hi ku tiyiseka xi ku: “Hi mina Yehovha; a ndzi hundzukanga.” (Yakobo 1:17; Malakiya 3:6) Hakunene Yehovha Xikwembu u hambanile ni vanhu van’wana lava swi tikaka ku va tsakisa lava nga tshembekiki hikwalaho ka leswi va tshamelaka ku cinca mianakanyo ya vona!

Hambiswiritano, vahlayi van’wana va Bibele va ti vutisa loko Xikwembu xi cince mianakanyo ya xona. Hi xikombiso, eku sunguleni Yehovha Xikwembu u nyike Vakreste matimba yo endla masingita kambe sweswo a swa ha ri tano. Eminkarhini ya khale Xikwembu a xi swi pfumelela ku teka tshengwe kambe sweswi a xa ha swi pfumeleli. Kasi hi ku ya hi Nawu wa Muxe, Yehovha a a lava leswaku vanhu va hlayisa siku ra Savata kambe sweswi a swa ha ri tano. Xana swikombiso leswi hinkwaswo a swi kombisi leswaku Xikwembu xa cinca-cinca?

Xo sungula hi fanele hi tiyiseka leswaku Xikwembu a xi nge pfuki xi cince milawu ya xona ya rirhandzu ni ya vululami. Nakambe “xikongomelo [xa xona] xa hilaha ku nga heriki” xa leswaku xi katekisa vanhu hi Mfumo wa xona a xi cincanga. (Vaefesa 3:11) Nilokoswiritano, tanihi leswi wena u nga cincaka ndlela leyi munhu a wu n’wi languta ha yona hikwalaho ka leswi a tshamelaka ku ku heta matimba, na Yehovha wa hundzuka loko swiyimo swi cinca.

Nakambe Xikwembu xi cinca swileriso leswi xi swi nyikeke vanhu va xona hi ku ya hi swiyimo ni swilaveko swa vona. Leswi a swi fanelanga swi hi hlamarisa. Xiya leswi muvalangisi loyi a nga ni vutshila a nga swi endlaka loko a vona khombo ro karhi. U ta byela ntlawa lowu a wu valangisaka  leswaku wu teka ndlela yin’wana leswaku wu balekela khombo rero. Hambiswiritano, xana sweswo swi vula leswaku u tshike ku ya emahlweni a va valangisa? Hikwalaho, a hi kambisiseni swikombiso swinharhu leswi ku vulavuriweke ha swona eku sunguleni leswi pfilunganyaka van’wana.

Ha Yini Ku Endliwa Ka Masingita Swi Herisiwile?

Ha yini Xikwembu xi nyike Vakreste va lembe-xidzana ro sungula matimba yo endla masingita? Kumbexana wa swi tiva leswaku loko Vaisrayele va ha ri rixaka leri hlawuriweke hi Xikwembu, hakanyingi a xi va endlela masingita ku kombisa leswaku xi na vona. Xikwembu xi tirhise Muxe leswaku xi kombisa matimba ya xona lama hlamarisaka loko xi kutsula Vaisrayele aEgipta ni ku va kongomisa emananga ku ya fika eTikweni ra Xitshembiso. Lexi vavisaka, nkarhi na nkarhi Vaisrayele a va nga ri kombisi ripfumelo eka Xikwembu. Loko Yehovha a hetelele a fularhele Vaisrayele ivi a simeka vandlha ra Vakreste, u nyike vaapostola ni vanhu van’wana matimba yo endla masingita. Hi xikombiso, muapostola Petro na Yohane va hanyise wanuna la tswariweke a lamarile naswona Pawulo u pfuxe wanuna loyi a a file. (Mintirho 3:2-8; 20:9-11) Masingita lawa va ma endleke ma pfune vanhu ku va Vakreste ematikweni yo tala. Kambe ha yini matimba wolawo yo endla masingita ma herisiwile?

Muapostola Pawulo u hlamusele xivangelo xa kona hi ku tirhisa xikombiso a ku: “Loko ndza ha ri xihlangi, a ndzi vulavula tanihi xihlangi, ndzi ehleketa tanihi xihlangi, ndzi anakanya tanihi xihlangi; kambe leswi sweswi ndzi nga wanuna, ndzi tshike mikhuva ya xihlangi.” (1 Vakorinto 13:11) Tanihi leswi vatswari va nga khomiki vana va vona lava nga ringaniki hi ndlela leyi fanaka, kutani Yehovha u cince ndlela leyi a a tirhisana ha yona ni vandlha ra Vakreste hi nkarhi lowu a ri nga ha ri “xihlangi.” Muapostola Pawulo u vule leswaku tinyiko ta moya lowo kwetsima to tanihi ku vulavula tindzimi timbe kumbe ku profeta, a “ti ta hela.”—1 Vakorinto 13:8.

Ha Yini A Swi Pfumeleriwa Ku Teka Tshengwe?

Yesu u kombise leswaku Xikwembu xi veke nawu malunghana ni vukati loko xi byela vatekani vo sungula xi ku: “Wanuna u ta siya tata wakwe ni mana wakwe naswona u ta namarhela nsati wakwe, kutani lavambirhi va ta va nyama yin’we.” (Matewu 19:5) Xisweswo vukati byi fanele byi va xiboho xa vutomi hinkwabyo eka vanhu vambirhi lava tekaneke. Hambiswiritano, hi nkarhi lowu Xikwembu xi hlengeleteke Vaisrayele leswaku va va tiko ni ku va nyika Nawu, ku teka tshengwe swi sungule ku va mukhuva lowu tolovelekeke. Hambileswi Xikwembu ku nga riki xona lexi sunguleke mhaka ya leswaku vanhu va teka tshengwe kumbe ku va khutaza ku endla tano, xi veke milawu leyi a yi lawula ku tekana koloko. Loko ku simekiwa vandlha ra Vakreste, Rito ra Xikwembu ri swi yirise hi ku kongoma ku teka tshengwe.—1 Timotiya 3:2.

Yehovha Xikwembu u pfumelela swilo swo karhi leswaku swi endleka kukondza ku fika nkarhi lowu a nga ta swi lulamisa ha wona. (Varhoma 9:22-24) Yesu u kombise leswaku Yehovha u yi pfumelele swa xinkarhana mikhuva leyi nga riki enawini leyi khumbaka timhaka ta vukati hileswi a a tiva “ku nonon’hwa ka timbilu” ta Vaisrayele.—Matewu 19:8; Swivuriso 4:18.

 Ha Yini Ku Hlayisa Savata Swi Ve Swa Nkarhinyana?

Xikwembu xi simeke ku hlayisa Savata vhiki rin’wana ni rin’wana endzhaku ka loko xi kutsule Vaisrayele aEgipta. Hi ku famba ka nkarhi xileriso xexo xi katsiwe eka Nawu lowu nyikiweke tiko hinkwaro. (Eksoda 16:22-30; 20:8-10) Muapostola Pawulo u vule leswaku Yesu u tinyikerile leswaku a va gandzelo kutani “[a herisa] . . . Nawu wa swileriso lowu nga ni swileriso swa nawu,” naswona a “hlangula tsalwa leri tsariweke hi voko.” (Vaefesa 2:15; Vakolosa 2:14) Kutani leswi ‘herisiweke’ ni ku ‘hlanguriwa’ a swi katsa nawu wa Savata, hikuva Bibele yi ya emahlweni yi ku: “Hikokwalaho ku nga tshuki ku va ni munhu loyi a mi avanyisaka hi ku dya ni ku nwa kumbe emhakeni ya nkhuvo kumbe ku tlangela ku thwasa ka n’weti kumbe savata.” (Vakolosa 2:16) Ha yini Xikwembu xi nyike vanhu Nawu lowu katsaka ni ku hlayisa Savata?

Muapostola Pawulo u tsale a ku: “Nawu wu hundzuke mukongomisi wa hina la yisaka eka Kreste.” U tlhele a ku: “Leswi sweswi ripfumelo ri fikeke, a ha ha ri ehansi ka mukongomisi.” (Vagalatiya 3:24, 25) Xikwembu a xi cincanga miehleketo ya xona kambe xi tirhise Savata tanihi lunghiselelo ra nkarhinyana leswaku xi dyondzisa vanhu va xona leswaku va fanele va va ni nkarhi wo anakanyisisa hi timhaka leti khumbaka vugandzeri bya Xikwembu. Hambileswi nawu wa Savata a wu ri wa xinkarhana, a wu kombetela enkarhini lowu taka loko vanhu va ta wisa hilaha ku nga heriki emaxangwini ya vona ya nyama ni lama khumbaka vuxaka bya vona na Yehovha.—Vaheveru 4:10; Nhlavutelo 21:1-4.

Xikwembu Lexi Tshembekaka Ni Lexi Nga Ni Rirhandzu

Swikombiso leswi kumekaka eBibeleni leswi tlhuvutsiweke laha henhla swi kombisa leswaku Yehovha Xikwembu u nyikele swileriso swo hambana-hambana hi minkarhi leyi nga faniki. Kambe sweswo a swi vuli swona leswaku Xikwembu xi cinca-cinca mianakanyo ya xona. Kambe Xikwembu a xi endla hi ku ya hi swilaveko ni swiyimo swa vanhu va xona swo hambana-hambana naswona sweswo a xi swi endlela ku va pfuna. Ninamuntlha xa ha endla tano.

Tanihi leswi Yehovha a nga cinciki milawu ya yena, ha swi tiva leswi hi faneleke hi swi endla leswaku hi n’wi tsakisa. Ku tlula kwalaho, hi nga tiyiseka leswaku hinkwaswo leswi Xikwembu xi hi tshembiseke swona swi ta hetiseka. Yehovha u ri: “Hinkwaswo leswi ndzi swi tsakelaka ndzi ta swi endla . . . Ndzi swi vumbile, ndzi ta tlhela ndzi swi endla.”—Esaya 46:10, 11.

[Marito lama tshahiweke exihlokweni lama nga eka tluka 21]

Xikwembu a xi nge pfuki xi cince milawu ya xona ya rirhandzu ni vululami

[Marito lama tshahiweke exihlokweni lama nga eka tluka 22]

Pawulo u vule leswaku hi ku famba ka nkarhi tinyiko ta moya lowo kwetsima a “ti ta hela”

[Marito lama tshahiweke exihlokweni lama nga eka tluka 23]

Vukati a byi fanele byi va xiboho xa vutomi hinkwabyo eka vanhu vambirhi lava tekaneke