Ndlela Leyi U Nga Yi Twisisaka Ha Yona Bibele

1. Kombela Xikwembu Leswaku Xi Ku Pfuna

Ninfa, loyi a tshamaka eItaly u ri: “A ku ri ni nkarhi lowu a ndzi hlaya Bibele loko ndzi nga siya eku etleleni. A a ndzi endla tano hikwalaho ka leswi a ndzi swi tiva leswaku i Rito ra Xikwembu. Hambileswi a ndzi nga swi rhandzi ku hlaya, a ndzi lava ku tiva leswi Xikwembu xi swi tsaleke eka yona. A ndzi tiyimisele ku yi hlaya hinkwayo. Loko ndza ha ku sungula ku yi hlaya a swi ndzi olovela ku yi twisisa kambe loko ndzi fike eka swiyenge leswi ndzi swi kumeke swi tika ku swi twisisa ndzi nambe ndzi tshika.”

XANA na wena u tshame u humeleriwa hi mhaka yo fana ni leyi humeleleke Ninfa? Vanhu vo tala yi va humelerile. Hilaha hi hlayeke hakona eka xihloko lexi hundzeke, Yehovha Xikwembu, loyi Bibele yi humaka eka yena, u lava leswaku hi yi twisisa. Kambe, xana u nga yi twisisa njhani? Nchumu wo sungula lowu u faneleke u wu endla i ku kombela Xikwembu leswaku xi ku pfuna.

Vaapostola va Yesu a va tekiwa va ri lava nga “dyondzekangiki, lava tolovelekeke” hikuva a va nga nghenanga swikolo swa vafundhisi swo dyondzela timhaka ta vukhongeri. (Mintirho 4:13) Nilokoswiritano, Yesu u va tiyisekise leswaku a va ta swi kota ku twisisa Rito ra Xikwembu. Njhani? Yesu u te: “Mupfuni, la nga moya lowo kwetsima, loyi Tatana a nga ta n’wi rhumela hi vito ra mina, u ta mi dyondzisa swilo hinkwaswo.” (Yohane 14:26) Xikwembu xi tirhise moya wolowo lowo kwetsima kumbe matimba lama tirhaka leswaku xi vumba misava ni swilo hinkwaswo leswi hanyaka  eka yona. (Genesa 1:2) Xi tlhele xi wu tirhisa ku huhutela vanhu va kwalomu ka 40 lava xi va tirhiseke ku tsala mianakanyo ya xona eBibeleni. (2 Petro 1:20, 21) Moya wolowo xi nga wu nyika lava lavaka ku twisisa Bibele.

Xana u nga wu kuma njhani moya lowo kwetsima wa Xikwembu? U fanele u wu kombela u ri ni ripfumelo ra leswaku u ta wu kuma. Entiyisweni, swi nga ha lava leswaku u kombela hi ku phikelela. Yesu u te: “Hambetani mi kombela, mi ta nyikiwa. Loko n’wina . . . mi tiva ndlela ya ku nyika vana va n’wina tinyiko letinene, Tatana la nge tilweni u ta nyika moya lowo kwetsima hilaha ku tlurisaka swinene eka lava n’wi kombelaka!” (Luka 11:9, 13) Yehovha u tiyimisele ku va nyika moya lowo kwetsima lava wu kombelaka hi mbilu hinkwayo. Matimba wolawo lama tirhaka ma nga ku pfuna leswaku u twisisa nhlamuselo ya marito lama huhuteriweke lama tsariweke eBibeleni eka malembe ya magidi lama hundzeke. Moya wa Xikwembu wu nga tlhela wu ku pfuna ku vona ndlela leyi u nga ri tirhisaka ha yona evuton’wini bya wena rungula leri pfunaka leri nga eBibeleni.—Vaheveru 4:12; Yakobo 1:5, 6.

Nkarhi wun’wana ni wun’wana loko u hlaya Bibele khongela eka Xikwembu u xi kombela leswaku xi ku nyika moya wa xona lowo kwetsima leswaku wu ku pfuna ku yi twisisa.