Ndlela Leyi U Nga Yi Twisisaka Ha Yona Bibele

2. Yi Hlaye Handle Ko Yi Xopaxopa

Xana munghana wa wena u tshame a ku byela swilo swo biha hi munhu un’wana loyi u nga si tshamaka u hlangana na yena? Loko u hetelela u hlangane na yena munhu yoloye, xana leswi munghana wa wena a ku byeleke swona swi ku pfale mahlo lerova u nga swi koti ku vona vutshila ni timfanelo letinene leti munhu yoloye a nga na tona? Nchumu wo fana ni wolowo wu nga endleka loko hi hlaya Bibele.

MUAPOSTOLA PAWULO u hi lemukise hi nchumu lowu nga humelelaka loko hi hlaya Bibele hi ri karhi hi yi xopaxopa. Malunghana ni Vayuda van’wana va le nkarhini wakwe, Pawulo u tsale a ku: “Ndzi mbhoni ya vona leswaku va xi hisekela Xikwembu; kambe ku nga ri hikwalaho ka vutivi lebyi kongomeke.”—Varhoma 10:2.

Vayuda van’wana va lembe-xidzana ro sungula a va nga swi lavi ku pfumela leswaku Yesu a a ri  Mesiya hambileswi Matsalwa ya Xiheveru a ma swi kombise erivaleni sweswo. Hinkwaswo leswi Yesu wa le Nazareta a swi endleke ni leswi n’wi humeleleke a swi fambisana hi ku helela ni leswi Matsalwa ya Xiheveru ni vuprofeta hinkwabyo byi swi vuleke malunghana na Mesiya. Kambe mavonelo lawa Vayuda va le nkarhini wakwe se a va ri na wona hi Yesu ma endle leswaku va nga ri twisisi Rito ra Xikwembu.

Xana hi nga dyondza yini emhakeni leyi? I swa nkoka ku hlaya Bibele handle ko yi xopaxopa. Mavonelo lawa muhlayi a nga ha vaka na wona hi swilo swo karhi ma nga ha n’wi pfala mahlo leswaku a nga wu twisisi ntiyiso lowu nga eBibeleni.

Hi xikombiso, profesa un’wana wa tidyondzo ta vukhongeri wa le xifundzheni xa le North Carolina, eU.S.A, u vula leswaku Bibele “yi tsariwe hi vanhu nileswaku yi ni mavonelo ya vanhu, lawa yo tala ya wona ma nga faniki naswona ma nge swi koti ku pfuna vanhu ku tiva ndlela leyi va faneleke va hanya ha yona.” Loko vanhu va teka Bibele yi ri buku leyi ‘tsariweke hi vanhu’ ku nga ri Xikwembu, kutani va nga tala ku yi ba hi makatla ndzayo ya yona leyi va nga yi rhandziki.

Ku hambana na sweswo, Bibele yi hi khutaza ku yi hlaya hi vukheta. Loko Matsalwa ma vulavula hi Vaberiya va le nkarhini wa Pawulo, ma ri: “Va amukele rito hi mapfundza lamakulu ya mianakanyo, va kambisisa Matsalwa hi vukheta siku ni siku ku vona loko swilo leswi swi ri tano.” (Mintirho 17:11) Ku fana ni Vaberiya, na wena u nga ha boheka ku tshika ku xopaxopa Bibele loko u yi hlaya hikwalaho ka leswi u nga ni mavonelo yo karhi ha yona. Hlaya Rito ra Xikwembu handle ko lava ku ri xopaxopa naswona tiyimisele ku lava ku tiva rungula leri tsakisaka leri humaka eka Xikwembu.