VUKHONGERI lebyi amukelekaka eka Xikwembu byi hi dyondzisa leswaku hi anakanya hi swilo leswinene ni ku hi komba ndlela yo antswisa mahanyelo ya hina. Vukhongeri lebyi byi hi pfuna leswaku hi ya emahlweni hi endla leswinene. Hi swi tivisa ku yini leswaku vukhongeri lebyi amukelekaka eka Xikwembu bya swi endla sweswo?

Xiya leswi muapostola Pawulo a swi tsaleleke Vakreste va lembe-xidzana ro sungula lava a va tshama eKorinto ni le Grikiya. Muti wolowo wa khale a wu dume hi ku va ni mahanyelo yo biha. Pawulo u lemukise a ku: “Loko ti ri timbhisa, kumbe vagandzeri va swifaniso swa hava, kumbe vaoswi, kumbe vanhu lava hlayiseriweke swikongomelo leswi nga riki swa ntumbuluko, kumbe vavanuna lava etlelaka ni vavanuna-kulobye, kumbe makhamba, kumbe vanhu va makwanga, kumbe swidakwa, kumbe varhuketeri, kumbe vadyeleri, va nga ka va nga yi dyi ndzhaka ya mfumo wa Xikwembu.” Kutani Pawulo u ye emahlweni a ku: “Kambe hi leswi van’wana va n’wina a mi ri swona. Kambe mi hlantswiwile mi basa, mi kwetsimisiwile, mi vuriwe lava lulameke hi vito ra Hosi ya hina Yesu Kreste ni hi moya wa Xikwembu xa hina.” (1 Vakorinto 6:9-11, Vuhundzuluxeri Bya Misava Leyintshwa Bya Matsalwa Yo Kwetsima) Vukhongeri lebyi amukelekaka eka Xikwembu byi pfune vanhu lava eku sunguleni a va nga ri na mahanyelo lamanene leswaku va va lava baseke va tlhela va va malandza lama lulameke ya Xikwembu.

Ku hambana ni sweswo, Bibele yi ri: “Hikuva ku ta va ni nkarhi lowu va nga ta ka va nga tiyiseli eka dyondzo leyi hanyisaka, kambe, hi ku landza ku navela ka vona, va ta tihlengeletela vadyondzisi leswaku tindleve ta vona ti ta nyangalatiwa.”—2 Timotiya 4:3, Vuhundzuluxeri Bya Misava Leyintshwa Bya Matsalwa Yo Kwetsima.

Xana vukhongeri lebyi u byi tivaka byi endlisa ku yini emhakeni leyi? Xana byi hanya hi milawu ya le Bibeleni ya mahanyelo? Kumbe, xana byi yi ba hi makatla ndzayo leyi nga eRitweni ra Xikwembu, byi byela vanhu ‘leswi nyangalataka tindleve ta vona’?

Leswaku u kota ku tiva vukhongeri lebyi humesaka mihandzu leyinene, ha yini u nga tinyiki nkarhi wo hlamula swivutiso leswi landzelaka?

LESWI BIBELE YI SWI DYONDZISAKA:

“Vukati a byi xiximeke exikarhi ka hinkwavo, ni sangu ra vukati ri nga vi ni xilo lexi nyamisaka, hikuva Xikwembu xi ta avanyisa timbhisa ni vaoswi.”—Vaheveru 13:4, Vuhundzuluxeri Bya Misava Leyintshwa Bya Matsalwa Yo Kwetsima.

XIVUTISO:

Xana vukhongeri lebyi byi dyondzisa leswaku loko wanuna ni wansati va lava ku tshama swin’we va fanele va tekana hi ku ya hi nawu?

LESWI BIBELE YI SWI DYONDZISAKA:

Loko Yesu a vutisiwe loko xi ri kona xivangelo xo dlaya vukati, u te: “Un’wana ni un’wana la tshikaka nsati wa yena, loko ku nga ri hi mhaka ya vunghwavava, kutani a teka un’wana, wa oswa.”—Matewu 19:9, Bibele—Mahungu Lamanene.

XIVUTISO:

Xana vukhongeri lebyi byi yingisa nkongomiso wa Yesu kutani byi pfumelela leswaku vanhu va nga dlaya vukati ni ku tlhela va nghenela byin’wana ntsena loko va endle vuoswi?

LESWI BIBELE YI SWI DYONDZISAKA:

“Chavani vuoswi! Xidyoho xin’wana ni xin’wana lexi munhu a xi endlaka xi le handle ka miri wa yena; kambe loyi a oswaka ú dyohela miri wa yena.”—1 Vakorinto 6:18, Bibele—Mahungu Lamanene.

“Vaxisati va vona va hundzule ntirho wa vona wa ntumbuluko wu va lowu lwisanaka ni ntumbuluko; naswona hi ku fanana hambi va ri vaxinuna va tshike maendlelo ya ntumbuluko eka  vaxisati kutani va hisiwa ngopfu hi ku navelana ka vona ko biha, vaxinuna va endla leswi thyakeke ni vaxinuna-kulobye, kutani va amukela hakelo leyi heleleke, leyi a yi fanela xidyoho xa vona.”—Varhoma 1:26, 27, Vuhundzuluxeri Bya Misava Leyintshwa Bya Matsalwa Yo Kwetsima.

XIVUTISO:

Xana vukhongeri lebyi byi dyondzisa leswaku ku tikhoma ko biha ka rimbewu exikarhi ka wanuna ni wansati kumbe vanhu va rimbewu leri fanaka i xidyoho?

LESWI BIBELE YI SWI DYONDZISAKA:

“Mi nga tolovelani ni loyi a vuriwaka “makwerhu” kasi i muoswi, kumbe i munhu wa makwanga, kumbe i mugandzeri wa swikwembu swa hava, kumbe i murhukani, kumbe i xidakwa, kumbe i muxisi; munhu lowo tano, hambi ku ri ku dya mi nga dyi na yena.” (1 Vakorinto 5:11, Bibele—Mahungu Lamanene) Xana ku fanele ku humelela yini hi lava tivulaka Vakreste kambe va ri vadyohi lava nga hundzukiki? Rito ra Xikwembu ri ri: “Susani-ke lowo biha exikarhi ka n’wina.”—1 Vakorinto 5:13, Bibele Ya Xitsonga.

XIVUTISO:

Xana vukhongeri lebyi byi susa xirho xin’wana ni xin’wana xa byona lexi nga hundzukiki hileswi xi honisaka milawu leyi nga eBibeleni?