Rifuwo Leri Humaka Eka Xikwembu

LOKO u tshembeka eka Xikwembu, xana xi ta ku katekisa hi rifuwo? Kumbexana swi nga ha endleka ku nga ri hi rifuwo leri a wu ri languterile. Anakanya hi Mariya mana wa Yesu. Ntsumi Gabriyele yi humelele eka Mariya kutani yi n’wi byela leswaku u ‘tsakeriwe swinene’ hi Xikwembu nileswaku a a ta veleka N’wana wa Xikwembu. (Luka 1:28, 30-32) Kambe a a nga fuwanga. Loko Mariya a humesa xitlhavelo endzhaku ka ku velekiwa ka Yesu u nyikele hi “magugurhwana mambirhi kumbe swituvana swimbirhi,” ku nga leswi hi ntolovelo swisiwana a swi nyikela hi swona eka Yehovha.—Luka 2:24; Levhitika 12:8.

Xana leswi Mariya a a ri xisiwana swi vula leswaku Xikwembu a xi nga n’wi katekisanga? Ku hambana ni sweswo, loko a ta va a endzele Elizabeta loyi a nga xaka rakwe, “Elizabeta [u tale] hi moya lowo kwetsima, a huwelela hi ku huwelela lokukulu a ku: ‘[Mariya] u katekile exikarhi ka vavasati, naswona mbhandzu wa khwiri ra wena wu katekile!’” (Luka 1:41, 42) Mariya u ve ni lunghelo ro va mana wa N’wana wa Xikwembu loyi a rhandzekaka.

Yesu hi byakwe a a nga fuwanga. A nga lo velekiwa a tlhela a kurisiwa hi vatswari lava nga swisiwana ntsena kambe u tlhele a va xisiwana vutomi byakwe hinkwabyo. U tshame a byela wanuna un’wana loyi a a lava ku va mudyondzisiwa wakwe a ku: “Timhungubye ti ni mincele ni tinyenyana ta tilo ti ni byetlelo, kambe N’wana wa munhu a nga na ndhawu yo veka nhloko yakwe.” (Luka 9:57, 58) Hambiswiritano, leswi Yesu Kreste a swi endleke loko a ha ri laha misaveni, swi endle leswaku vadyondzisiwa vakwe va va ni rifuwo lerikulu. Muapostola Pawulo u tsale a ku: “U ve xisiwana hi mhaka ya n’wina, leswaku mi fuwa hikwalaho ka vusiwana byakwe.” (2 Vakorinto 8:9) Xana u va nyike rifuwo ra muxaka muni vadyondzisiwa vakwe? Naswona ku vuriwa yini hi namuntlha?

I Rifuwo Ra Muxaka Muni?

Hakanyingi rifuwo ri endla leswaku munhu a nga vi na ripfumelo tanihi leswi munhu loyi a fuweke a nga ha tshembelaka eka mali yakwe ematshan’weni yo tshembela eka Xikwembu. Yesu u te: “Ku ta va nchumu wo nonon’hwa swinene eka lava nga ni mali leswaku va nghena  emfun’weni wa Xikwembu!” (Marka 10:23) Swi le rivaleni leswaku rifuwo leri Yesu a ri nyikeke valandzeri vakwe a ku nga ri mali.

Entiyisweni Vakreste vo tala va lembe-xidzana ro sungula a va ri swisiwana. Loko wanuna loyi a velekiweke a lamarile a kombela mali, Petro u n’wi hlamule a ku: “Silivhere ni nsuku a ndzi na swona, kambe leswi ndzi nga na swona ndzi ku nyika swona: Hi vito ra Yesu Kreste wa Munazareta, famba!”—Mintirho 3:6.

Marito ya mudyondzisiwa Yakobo ma kombisa leswaku vandlha ra Vukreste a ri vumbiwa hi swisiwana. U tsale a ku: “Yingisani, vamakwerhu lava rhandzekaka. Xikwembu xi hlawule lava nga swisiwana hi langutelo ra misava leswaku va fuwa eripfumelweni ni ku va vadyandzhaka va mfumo, lowu xi wu tshembiseke lava xi rhandzaka, a hi swona ke?” (Yakobo 2:5) Ku engetela kwalaho, muapostola Pawulo u tlhele a vula leswaku a va talanga “lava tlhariheke hi tlhelo ra nyama” kumbe “lava nga ni matimba” kumbe “va le vukosini” lava vitaniweke leswaku va va swirho swa vandlha ra Vukreste.—1 Vakorinto 1:26.

Loko ku ri hi leswaku rifuwo leri Yesu a ri nyikeke valandzeri vakwe a ku nga ri mali, xana i rifuwo ra muxaka muni leri a va nyikeke rona? Eka papila leri Yesu a ri rhumeleke vandlha ra le Smirna u te: “Ndzi tiva nhlomulo ni vusiwana bya wena—kambe u fuwile.” (Nhlavutelo 2:8, 9) Hambileswi Vakreste va le Smirna a va ri swisiwana, va kume rifuwo leri a ri ri ra nkoka ku tlula silivhere kumbe nsuku. A va fuwile hikwalaho ka leswi a va ri ni ripfumelo va tlhela va tshembeka eka Xikwembu. Ripfumelo hi roxe i ra risima hikuva “a hi ra vanhu hinkwavo.” (2 Vatesalonika 3:2) Entiyisweni lava nga riki na ripfumelo i swisiwana emahlweni ka Xikwembu.—Nhlavutelo 3:17, 18.

Rifuwo Leri Munhu A Va Ka Na Rona Hikwalaho Ko Va Ni Ripfumelo

Xana ripfumelo i ra nkoka hi tindlela tihi? Lava nga ni ripfumelo eka Xikwembu va vuyeriwa eka “ku fuwa ka musa wa xona ni ku  tiyisela ni ku va ni mbilu yo leha.” (Varhoma 2:4) Va tlhela va ‘rivaleriwa swivi swa vona’ hikwalaho ka ripfumelo leri va nga na rona eka gandzelo ra nkutsulo ra Yesu. (Vaefesa 1:7) Ku engetela kwalaho, va ni vutlhari lebyi “rito ra Kreste” ri byi nyikaka lava nga ni ripfumelo. (Vakolosa 3:16) Loko va khongela eka Xikwembu hi ripfumelo, “ku rhula ka Xikwembu loku tlulaka miehleketo hinkwayo” ku ta rindza timbilu ta vona ni mianakanyo ya vona ku va tisela ku eneriseka ni ntsako.—Vafilipiya 4:7.

Ku engetela eka mikateko leyi hinkwayo, lava nga ni ripfumelo eka Xikwembu hi N’wana wa xona Yesu Kreste va ni ntshembo wo tsakisa, wo kuma vutomi lebyi nga heriki. Ma tolovelekile marito ya Yesu Kreste lama nge: “Xikwembu xi rhandze misava swinene xi kala xi nyikela hi N’wana wa xona la tswariweke a ri swakwe, leswaku un’wana ni un’wana loyi a kombisaka ripfumelo eka yena a nga lovisiwi kambe a va ni vutomi lebyi nga heriki.” (Yohane 3:16) Ntshembo lowu wu tiyisiwa loko munhu a kuma vutivi lebyi kongomeke hi Tatana ni N’wana, hikuva Yesu u tlhele a ku: “Leswi swi vula vutomi lebyi nga heriki, ku nghenisa ka vona vutivi ha wena, Xikwembu xi ri xin’we xa ntiyiso, ni loyi u n’wi rhumeke, Yesu Kreste.”—Yohane 17:3.

Hambileswi ku katekisiwa hi Xikwembu swi yelanaka ni vuxaka bya hina na xona, ha vuyeriwa eka ndlela leyi hi titwaka ha yona swin’we ni hi tlhelo ra nyama. Xiya xikombiso xa Dalídio wa le Brazil. Emahlweni ko va ni vutivi lebyi kongomeke hi Xikwembu a a ri xindzendzele. Leswi swi n’wi fayele muti. Ku engetela kwalaho a a tshama a nga ri na mali. Hiloko a sungula ku dyondza Bibele ni Timbhoni ta Yehovha naswona u xiye ku cinca lokukulu.

Leswi Dalídio a dyondzeke Bibele swi endle leswaku a fularhela mikhuva ya yena yo biha. U endle nhluvuko lowukulu hi ku hanya hi ku pfumelelana ni vutivi bya le Bibeleni lerova a ku: “A ndzi nghena barha ni barha ndzi byi kukutlela kambe sweswi ndzi nghena yindlu ni yindlu ndzi chumayela.” U ve muchumayeri wa nkarhi hinkwawo wa Rito ra Xikwembu. Nhluvuko wolowo a wu antswisanga rihanyo rakwe ntsena kambe wu tlhele wu antswisa xiyimo xakwe xa timali. Dalídio u tlhele a ku: “ Mali leyi a ndzi yi tirhisela byala, sweswi ndzi yi tirhisela ku pfuna vanhu lava pfumalaka kumbe ku xava swilo swa mina.” Nakambe u ni vanghana va xiviri hileswi a tihlanganisaka ni vanhu lava na vona va langutaka swilo hi ndlela leyi Xikwembu xi langutaka swilo ha yona. Dalidio sweswi u ni ku rhula ni ku eneriseka, ku nga swilo leswi a a nga ta swi nantswa loko a a nga tivi Xikwembu.

Xiya xikombiso xin’wana xa Renato loyi na yena a antswiseke vutomi byakwe hi ku va ni ripfumelo eka Yehovha Xikwembu. Namuntlha loko wo vona ndlela leyi a tsakeke ha yona swin’we ni ndlela leyi a n’wayitelaka ha yona, a wu nge tshembi leswaku u tshame a khomiwa hi ndlela yo biha evuton’wini byakwe. Loko a ha ku velekiwa, mana wakwe u n’wi cukumetile. U n’wi siye endzeni ka nkwama lowu a wu ri ehansi ka bence, a halahariwile, a ri na mafela-ngati naswona rhumbu leri a a dya ha rona loko a ha ri ndzeni ka mana wakwe a ri nga si tsemiwa. Vavasati vambirhi lava a va hundza hi kwalaho va vone nkwama lowu a wu ri ehansi ka bence wu ri karhi wu tshukatshuka. Eku sunguleni a va ehleketa leswaku un’wana a nga ha va a siye ximanga lexitsongo. Loko va kuma leswaku a ku ri ricece, va nambe va ku milenge mimbirhi va ya exibedlhele xa le kusuhi va ya kuma mpfuno.

Un’wana wa vavasati volavo a a ri Mbhoni ya Yehovha, u byele Rita hi mhaka yoleyo loyi na yena a a ri Mbhoni. Rita u veleke tincece to tala ti lovile naswona a a ri ni n’wana un’we wa nhwanyana. A a lava n’wana wa mufana hi mbilu  yakwe hinkwayo kutani u endle xiboho xo teka Renato a va n’wana wakwe.

Rita u byele Renato loko a sungula ku tlharihanyana leswaku a a nga ri mana wakwe wa xiviri. Kambe u n’wi khathalele hi rirhandzu a tlhela a ti karhatela ku n’wi dyondzisa milawu ya Bibele. Loko a ri karhi a kula u sungule ku tsakela rungula leri nga eBibeleni. U ye a yi tlangela swinene ndlela yo hlamarisa leyi a ponisiweke ha yona. Minkarhi hinkwayo u khapakhapa mihloti loko a hlaya marito ya mupisalema Davhida lama nge: “Loko tatana na manana vo ndzi tshika, Yehovha u ta ndzi teka.”—Pisalema 27:10.

Leswaku Renato a kombisa leswaku wa swi tlangela leswi Yehovha a n’wi endleleke swona, u khuvuriwile hi 2002 kutani hi lembe leri landzelaka a va muchumayeri wa nkarhi hinkwawo. Ni sweswi a nga va tivi vatswari vakwe va xiviri naswona kumbexana a nge pfuki a va tivile. Hambiswiritano, Renato u vona onge nyiko ya nkoka swinene i ku tiva Yehovha ni ku va ni ripfumelo eka yena tanihi Tata wakwe la nga ni rirhandzu ni la khathalaka.

Swi nga endleka leswaku na wena u lava ku va ni vuxaka lebyikulu ni Xikwembu, ku nga leswi nga antswisaka vutomi bya wena. Lunghelo ro va ni vuxaka byo tano na Yehovha Xikwembu ni N’wana wakwe Yesu Kreste ri pfulekele vanhu hinkwavo, swigwili ni swisiwana. A byi nge hi tiseli rifuwo kambe byi ta endla leswaku hi va ni ku rhula ni ku eneriseka, leswi mali hinkwayo emisaveni yi nga ta ka yi nga swi xavi. Ma tiyisile marito lama kumekaka eka Swivuriso 10:22 lama nge: “Nkateko wa Yehovha—hi wona lowu fuwisaka, naswona a nga engeteli ku vaviseka eka wona.”

Yehovha Xikwembu u kombise leswaku u va tsakela swinene vanhu lava taka eka yena hi ku vula a ku: “Kunene loko a wu yingise swileriso swa mina! Kutani ku rhula ka wena a ku ta fana ni nambu, ni ku lulama ka wena a ku ta fana ni magandlati ya lwandle.” (Esaya 48:18) Naswona u tshembisa leswaku lava taka eka yena hi xikongomelo lexinene va ta vuyeriwa swinene hi ku vula a ku: “Ku titsongahata ni ku chava Yehovha swi tisa rifuwo, ku vangama ni vutomi.”—Swivuriso 22:4.

[Marito lama tshahiweke exihlokweni lama nga eka tluka 6]

Ku va ni ripfumelo eka Xikwembu swi endla leswaku u va ni ku rhula, ku eneriseka ni ntsako

[Xifaniso lexi nga eka tluka 5]

Hambileswi ndyangu wa ka va Yesu wa laha misaveni a wu ri swisiwana, Xikwembu xi wu katekisile swinene