Xana Mali I Xihlovo Xa Ntsako Wa Xiviri?

SONIA u velekeriwe eSpaniya. Loko a ha ri n’wana, a a ya eminhlanganweni ya Timbhoni ta Yehovha ni mana wakwe. Kambe loko se a kurile u rhurhele le London, eNghilandhi naswona loko se a ri kwalaho a a tirha eka khampani leyi lombisaka tikhampani letikulu ni mfumo timali.

Sonia a a wu rhandza ntirho wakwe. A a hola mali yo tala naswona a a tirhisana ni tikhampani leti lavaka ku lombiwa mali yo tala. A a wu tsakela ntirho lowu naswona a swi n’wi fambela kahle. Sonia a a tirha tiawara ta 18 hi siku naswona vusiku byin’wana a a etlela tiawara timbirhi kumbe tinharhu ntsena. A ku nga ri na xin’wana lexi a a xi endla handle ka ntirho wakwe. Hi ku copeta ka tihlo vutomi byakwe byi cincile hilaha ku heleleke. Sonia u khomiwe hi vuvabyi lebyi vavaka swinene byo oma swirho, kumbexana hikwalaho ka ntirho wakwe lowu a wu n’wi tsona nkarhi wo wisa. A a ri ni malembe ya 30 hi nkarhi wolowo.

Sonia a a ome rihlanguti naswona madokodela a ma nga tiyiseki leswaku a a ta tlhela a swi kota ku vulavula. Mana wakwe u nambe a ya eNghilandhi leswaku a ya n’wi khathalela. Loko Sonia a sungula ku famba nakambe, mana wakwe u te: “Ndzi ya eminhlanganweni ya vandlha, u boheka ku famba na mina hikuva a ndzi nge swi koti ku ku siya u ri wexe.” Sonia u pfumerile ku famba na yena. Xana vuyelo byi ve byihi?

Sonia u ri: “Hinkwaswo leswi ndzi swi tweke a ku ri ntiyiso. A swi tsakisa. Ndzi amukele ku fambiseriwa dyondzo ya Bibele leyi a yi huma eka un’wana wa lava ndzi xeweteke hi ntsako loko ndzi ya ro sungula eHolweni ya Mfumo. Lava a ndzi tolovelane na vona se a va nga ha ndzi endzeli, kambe vanghana va mina lavantshwa a va ri ni musa naswona a va ndzi khathalela.”

Hakatsongo-tsongo, Sonia u tlhele a sungula ku vulavula naswona hi xihatla u tiyise ni vuxaka byakwe na Yehovha. Ku nga si hela lembe u khuvuriwile. Vunyingi bya vanghana vakwe a ku ri Vakreste lava nga entirhweni wo chumayela wa nkarhi hinkwawo naswona a a yi vona ndlela leyi va tsakeke ha yona. Sonia u te: ‘Ndzi lava ku fana na vona. Ndzi lava ku nyika Yehovha Xikwembu leswi nga ematimbeni ya mina!’ Sweswi Sonia i muchumayeri wa nkarhi hinkwawo.

Xana Sonia u dyondze yini eka leswi n’wi humeleleke? “Hambileswi a ndzi hola mali yo tala, ntshikilelo ni ku chava ku lahlekeriwa hi ntirho a swi endla leswaku ndzi tshama ndzi karhatekile naswona ndzi nga tsakanga. Eku heteleleni ndzi swi vonile leswaku nchumu wa nkoka swinene evuton’wini i ku va ni vuxaka lebyinene ni Tata wa mina wa le tilweni, Yehovha. Sweswi ndzi ni ntsako wa xiviri.”

Muapostola Pawulo u tsale a ku: “Ku rhandza mali i rimitsu ra mixaka hinkwayo ya swilo swo biha, naswona hi ku lwela ku fikelela rirhandzu leri, van’wana va lahlekisiwile eripfumelweni naswona va titlhave hinkwako-nkwako hi switlhavi swo tala.” (1 Timotiya 6:10) Sonia hi byakwe u wu vonile ntiyiso wa marito lawa.