Xana Vusweti I Vumbhoni Bya Leswaku Xikwembu A Xi Hi Rhandzi?

XIKWEMBU xi byele Vaisrayele va khale xi ku: “A nga kona exikarhi ka n’wina la faneleke a va xisiwana.” Leswi a swi ri hikwalaho ka nawu lowu xi va nyikeke wona, a wu va lerisa leswaku va khathalela swisiwana ni ku swi ntshunxa eswikweletini. (Deteronoma 15:1-4, 7-10) Hikwalaho, a ku nga fanelanga ku va ni swisiwana exikarhi ka Vaisrayele hikuva Yehovha u tshembise ku va katekisa. Hambiswiritano, nkateko wolowo a wu ti tshege hi ku va va yingisa Nawu, ku nga leswi Vaisrayele va tsandzekeke ku swi endla.

Kambe sweswo a swi nga vuli swona leswaku lava nga swisiwana a va nga amukeriwi hi Xikwembu, naswona lava fuweke a swi nga vuli swona leswaku va katekisiwe hi xona. Malandza yo tala yo tshembeka ya Xikwembu a ma ri swisiwana. Muprofeta Amosi a a risa tinyimpfu ni ku kha makuwa hi tinguva ta kona. (Amosi 1:1; 7:14) Emasikwini ya muprofeta Eliya loko ndlala yi wela tiko ra Israyele, Eliya u boheke ku titshega hi swakudya swa noni leyi a yi ri xisiwana, leyi hi ndlela ya singita mapa ni mafurha ya yona swi tshameke swi nga heli hi nkarhi wa ndlala. Eliya ni noni a va hundzukanga swigwili; Yehovha u lo va nyika ntsena leswi a va swi lava hi nkarhi wolowo.—1 Tihosi 17:8-16.

Swiendlakalo leswi nga languteriwangiki swi nga ha endla leswaku vanhu va va swisiwana hi ku copeta ka tihlo. Timhangu ni vuvabyi swi nga ha endla leswaku munhu a nga ha tirhi swa xinkarhana kumbe a nga ha swi koti ku tirha hilaha ku heleleke. Rifu ri nga ha endla leswaku vana va sala va nga ri ni vatswari kasi vavasati va sala va ri tinoni. Swiyimo swo tano a swi kombisi leswaku Xikwembu a xi va amukeli. Xikombiso xa Nawomi na Rhuti i xikombiso lexi khutazaka xa nkhathalelo lowu Yehovha a nga na wona eka swisiwana. Hambileswi Nawomi na Rhuti va saleke evusiwaneni hikwalaho ko feriwa hi vanuna va vona, Yehovha Xikwembu u va katekisile ni ku va khathalela hi ku va nyika swilaveko swa vona.—Rhuti 1:1-6; 2:2-12; 4:13-17.

Swi le rivaleni leswaku vusiwana a hi vumbhoni bya leswaku Xikwembu a xi hi rhandzi. Lava tshembekaka eka Yehovha Xikwembu va nga tshemba marito ya Hosi Davhida lama nge: “A ndzi ri jaha, kambe se ndzi dyuhele, kambe a ndzi si tshama ndzi vona munhu la lulameke a tshikiwa hi ku helela, hambi ku ri vana vakwe va lava xinkwa.”—Pisalema 37:25.

[Xifaniso lexi nga eka tluka 8]

Hambileswi Nawomi na Rhuti a va ri swisiwana, Xikwembu xi va katekisile xi tlhela xi va khathalela