Tshinela Eka Xikwembu

Xikwembu Xi Avanyisa Hi Vululami

Tinhlayo 20:2-13

VANHU va avanyisa hi ndlela leyi nga riki na vululami kumbe leyi vavaka kambe a swi tano hi Yehovha Xikwembu —la “rhandzaka vululami.” (Pisalema 37:28) Hambileswi a lehisaka mbilu a nga yi honisi milawu yakwe. U endla swilo hi vululami. Anakanya hi ndlela leyi a anguleke ha yona eka ku holovisana ni ku xandzuka, hilaha swi tsariweke hakona eka Tinhlayo ndzima 20.

Loko Vaisrayele va ri kusuhi ni ku heta riendzo ra vona ra le mananga va heleriwe hi mati. * Vanhu va sungule ku holovela Muxe na Aroni va ku: “Ha yini n’wina mi tise nhlengeletano ya Yehovha emananga lawa leswaku hina ni swifuwo swa hina swa ndzhwalo hi ta fela kona?” (Ndzimana 4) Vanhu a va vilela va vula leswaku mananga i ‘ndhawu yo biha’ leyi a yi ri hava “makuwa, vhinya ni magrenada”—mihandzu leyi fanaka ni leyi tinhlori ta Vaisrayele ti vuyeke na yona loko ti vuya eku kambeleni ka Tiko ra Xitshembiso emalembeni lama hundzeke—nileswaku “a ku [nga ri] na mati yo nwa.” (Ndzimana 5; Tinhlayo 13:23) Kahle-kahle, a va sola Muxe na Aroni hi leswi mananga a ma nga fani ni tiko leri a ri ri ni mihandzu yo tala leri xitukulwana xo sungula xa vagunguri xi aleke ku nghena eka rona!

Yehovha a nga va fularhelanga vagunguri volavo. Ematshan’weni ya sweswo u lerise Muxe ku endla swilo swinharhu: Ku teka nhonga yakwe, ku hlengeleta vanhu ni ku “vulavula ni ribye ematihlweni ya vona leswaku kunene ri humesa mati ya rona.” (Ndzimana 8) Muxe u yingise swileriso swimbirhi swo sungula kambe u tsandzeke ku yingisa xileriso xa vunharhu. Ematshan’weni yo vulavula ni ribye hi ripfumelo eka Yehovha, u karihele vanhu hi ku vula a ku: “Twanani, sweswi, n’wina vaxandzuki! Xana hi ta mi humesela mati eribyeni leri?” (Ndzimana 10; Pisalema 106:32, 33) Hiloko Muxe a ba ribye kambirhi “kutani mati yo tala ma sungula ku huma.”—Ndzimana 11.

Xisweswo Muxe na Aroni va endle xidyoho lexikulu. Xikwembu xi va byele leswi: “N’wina mi xandzukeleke xileriso xa mina malunghana ni mati ya Meriba.” (Tinhlayo 20:24) Leswi Muxe na Aroni va nga endlangiki hilaha Xikwembu xi va leriseke hakona, hi vona lava hundzukeke vaxandzuki. Vuavanyisi bya Xikwembu a byi ri byinene: Muxe na Aroni a va nga ta ha ri rhangela tiko ra Israyele ku ya eTikweni leri Tshembisiweke. Xana nxupulo wolowo a wu tika swinene? Doo! Hikwalaho ka swivangelo swo hlayanyana.

Xo sungula, Xikwembu a xi lerisanga Muxe leswaku avanyisa vanhu hi ku va byela leswaku i vaxandzuki. Xa vumbirhi, Muxe na Aroni va tsandzeke ku vangamisa Xikwembu. Xikwembu xi te: ‘A mi ndzi hlawulekisanga.’ (Ndzimana 12) Hi ku vula a ku “hi ta mi humesela mati,” Muxe u vulavule onge yena na Aroni hi vona lava a va ta nyika vanhu mati hi singita ku nga ri Xikwembu. Xa vunharhu, xigwevo xexo a xi fambisana ni vuavanyisi lebyi xi byi endleke enkarhini lowu nga hundza. Xikwembu xi alele xitukulwana xo sungula xa vaxandzuki ku nghena eKanana, kutani xi endle hilaha ku fanaka eka Muxe na Aroni. (Tinhlayo 14:22, 23) Xa vumune, Muxe na Aroni a ku ri varhangeri va Vaisrayele. Vanhu lava nga ni vutihlamuleri lebyikulu va ta tihlamulela eka Xikwembu.—Luka 12:48.

Yehovha u yima a tiyile eka leswi lulameke. Hikuva u rhandza vululami naswona a nga avanyisi vanhu hi ndlela leyi nga riki na vululami. Swi le rivaleni leswaku Muavanyisi wo tano u faneriwa hi ku va hi n’wi tshemba ni ku n’wi xixima.

[Nhlamuselo ya le hansi]