Tshinela Eka Xikwembu

I Yini Leswi Yehovha A Swi Kombelaka Eka Hina?

Deteronoma 10:12, 13

MUNHU swi nga ha n’wi tikela ku endla xiboho xa leswaku u ta yingisa kumbe a nge yingisi. Loko munhu a khoma vanhu lava nga hansi ka yena hi voko ra nsimbi kumbe hi tihanyi, va nga ha n’wi yingisa kambe swi nga humi embilwini. Hambiswiritano, vagandzeri va Yehovha Xikwembu va n’wi yingisa hi ku ti rhandzela. Ha yini? Leswaku hi hlamula xivutiso xexo, a hi kambisiseni marito ya Muxe lama kumekaka eka Deteronoma 10:12, 13. *

Loko Muxe a katsakanya swilaveko swa Xikwembu u vutise xivutiso lexi tsakisaka lexi nge: “Xana i yini leswi Yehovha Xikwembu xa wena a swi lavaka eka wena?” (Ndzimana 12) Xikwembu xi ni mfanelo yo hi kombela xin’wana ni xin’wana lexi xi xi lavaka eka hina. Phela, i Hosi Leyi Lawulaka, Munyiki ni Muhlayisi wa vutomi. (Pisalema 36:9; Esaya 33:22) Yehovha u ni mfanelo yo hi kombela leswaku hi n’wi yingisa. Hambiswiritano, a nga hi sindzisi leswaku hi n’wi yingisa. I yini leswi a swi kombelaka eka hina? U lava leswaku hi n’wi ‘yingisa swi suka embilwini.’—Varhoma 6:17.

I yini leswi nga hi susumetelaka leswaku hi yingisa Xikwembu hi ku ti rhandzela? Muxe u boxe xivangelo xin’we lexi nge: “Chava Yehovha Xikwembu xa wena.” * (Ndzimana 12) Leswi a swi vuli ku chava Xikwembu hikwalaho ka leswi xi nga ha hi xupulaka kambe swi vula ku xixima Xikwembu ni ku hanya hi tindlela ta xona. Loko hi xi chava swinene Xikwembu, hi ta papalata ku endla swilo leswi xi hlundzukisaka.

Hikwalaho, i yini lexi faneleke xi hi susumetela ku yingisa Xikwembu? Muxe u ri: ‘Rhandza Yehovha Xikwembu xa wena u tlhela u n’wi tirhela hi mbilu ya wena hinkwayo ni hi moya-xiviri wa wena hinkwawo.’ (Ndzimana 12) Ku rhandza Xikwembu swi katsa swilo swo tala ku tlula ndlela leyi u titwaka ha yona. Buku yin’wana yi ri: “Marito lama tirhisiweke tanihi hi maendli eka Xiheveru lama kombetelaka eka ndlela leyi hi titwaka ha yona, minkarhi yin’wana ma kombetela eka swiendlo leswi veke kona hikwalaho ka ndlela leyi hi titwaka ha yona.” Buku leyi fanaka yi vula leswaku ku rhandza Xikwembu swi vula ku xi “endlela swiendlo swa rirhandzu.” Hi marito man’wana, loko hi rhandza Xikwembu hakunene, hi ta endla swilo hi ndlela leyi nga ta xi tsakisa.—Swivuriso 27:11.

Xana hi fanele hi xi yingisa ku fikela kwihi Xikwembu? Muxe u te: “Famba etindleleni [ta Xikwembu] hinkwato.” (Ndzimana 12) Yehovha u lava leswaku hi endla hinkwaswo leswi a hi kombelaka swona. Xana ku endla tano swi nga hi vuyerisa? Ina, swi nga hi vuyerisa.

Ku yingisa hi ku tirhandzela swi nga hi tisela mikateko. Muxe u tsale a ku: “Hlayisa . . . milawu . . . leyi ndzi ku lerisaka yona namuntlha, leswaku swi ku fambela kahle.” (Ndzimana 13) Milawu hinkwayo ya Yehovha, ku nga swilo hinkwaswo leswi a hi kombelaka swona, swi ta vuyerisa hina. I yini lexi nga hi tiyisekisaka leswaku sweswo swi ta hi vuyerisa? Bibele yi ri: “Xikwembu i rirhandzu.” (1 Yohane 4:8) Ku engetela kwalaho, xi hi nyike milawu yo tano, leyi vuyerisaka hina. (Esaya 48:17) Loko hi endla hinkwaswo leswi Yehovha a hi kombelaka swona, swi ta endla leswaku hi nga karhateki ngopfu sweswi swi tlhela swi hi tisela mikateko ya hilaha ku nga heriki loko ku fuma Mfumo wakwe. *

Loko hi langutane ni xiyimo lexi lavaka leswaku hi endla xiboho xa leswaku hi yingisa Yehovha kumbe hi nga n’wi yingisi, i xin’we xiboho xa vutlhari, ku nga ku n’wi yingisa hilaha ku heleleke naswona hi ku tirhandzela. Xiendlo xexo xa vutshembeki xi hi tshineta swinene eka Yehovha, loyi a nga Xikwembu xa rirhandzu lexi hi navelelaka leswinene.

[Tinhlamuselo ta le hansi]