Swivutiso Swa Vahlayi

Xana Diyavulosi I Wa Xiviri?

Ina, Bibele yi dyondzisa leswaku Sathana Diyavulosi i munhu wa xiviri hakunene. Hambiswiritano, vaxopaxopi va Bibele a va pfumeli leswaku Diyavulosi i munhu wa xiviri. Va vula leswaku Sathana i nchumu wo karhi lowu yimelaka vubihi lebyi nga kona endzeni ka munhu.

Xana swi fanele swi hi hlamarisa leswi ku nga ni mavonelo yo hambana-hambana malunghana ni leswi Sathana a nga swona hakunene? Nikatsongo. Hi xikombiso: Xigevenga xi nga ha sula migandliso ya tintiho ta xona laha xi endleke kona vugevenga leswaku xi lahla vuthala, kutani xi ya emahlweni ni vugevenga bya xona handle ko tiveka leswaku i mani. Hilaha ku fanaka, Sathana i xigevenga lexikulu lexi nga vonakiki lexi kucetelaka mahanyelo yo biha. Yesu u hlamusele Sathana tanihi loyi a vangaka vubihi eka vanhu. Yesu u vitane Sathana a ku i “mufumi wa misava leyi.”—Yohane 12:31.

Xana Diyavulosi u huma kwihi? Eku sunguleni, u tumbuluxiwe a ri xivumbiwa xa moya lexi hetisekeke etilweni, ntsumi leyi leyi xandzukeke yi ve Diyavulosi loko yi navela ku gandzeriwa hi vanhu ematshan’weni yo va va gandzela Xikwembu. Rungula ra Bibele ri vulavula hi mbulavurisano lowu Sathana na Yesu va veke na wona laha misaveni, lowu eka wona Diyavulosi a paluxeke ku navela kakwe ko biha. Sathana u ringete ku xisa Yesu leswaku a ‘khinsama a n’wi gandzela.’—Matewu 4:8, 9.

Hilaha ku fanaka, loko a vulavula ni Xikwembu hilaha swi tsariweke hakona ebukwini ya Yobo, Sathana u boxe ku navela kakwe. A nge tshiki ku ya emahlweni a hlohlotela vanhu leswaku va fularhela Xikwembu.—Yobo 1:13-19; 2:7, 8.

Anakanya hi leswi: Loko Sathana a swi kotile ku vulavula na Yehovha Xikwembu swin’we na Yesu Kreste, xana swa twala leswaku Sathana i nchumu wo karhi lowu yimelaka vubihi lebyi nga kona endzeni ka vanhu? Entiyisweni a wu kona nchumu wo biha endzeni ka Xikwembu kumbe N’wana wa xona! Kutani swi le rivaleni leswaku Sathana i munhu wa xiviri—xivumbiwa xa moya xo homboloka lexi nga n’wi xiximiki Yehovha kumbe Yesu.

Ku hohloka ka mahanyelo ya vanhu i vumbhoni bya leswaku Diyavulosi u kona hakunene. Matiko ya misava ma tshika swakudya swo tala swi bola vanhu va ri karhi va sika hi ndlala. Matiko ma hlayisa matlhari lama kotaka ku dlaya vanhu hi vunyingi. Va thyakisa misava. Nilokoswiritano, vanhu vo tala a va swi tivi leswaku i yini lexi endlaka leswaku ku va ni vubihi swin’we ni mahanyelo lama nga ni khombo. Ha yini swi ri tano?

Bibele yi vula leswaku Sathana u “[pfale] miehleketo ya vanhu lava va nga pfumeriki.” (2 Vakorinto 4:4, Bibele—Mahungu Lamanene) Sathana u tirhisa nhlengeletano yakwe leyi nga vonakiki leswaku a kucetela vanhu. I “mufumi wa madimona.” (Matewu 12:24) Tanihi murhangeri wa ntlawa wo karhi wa tinsula-voya loyi a kotaka ku kongomisa ntlawa wa tinsula-voya a ri exihundleni, hikwalaho Sathana na yena u tirhisa nhlengeletano yakwe ya tintsumi to biha leswaku a lawula vanhu vo tala, lava vunyingi bya vona va nga yi xiyiki mintirho yakwe kumbe nkucetelo wakwe.

Ha tsaka leswi Bibele yi paluxaka Diyavulosi ni nhlengeletano yakwe! Xisweswo hi nga teka magoza yo lwisana ni nkucetelo wa Diyavulosi. Bibele yi hi khutaza leswi: “Tivekeni ehansi ka Xikwembu; kambe mi kaneta Diyavulosi, kutani u ta mi balekela.”—Yakobo 4:7.