Leswi Hi Nga Swi Dyondzaka Eka Yesu

Malunghana Ni Vutomi Bya Ndyangu

I yini lexi nga endlaka leswaku vutomi bya mindyangu byi va lebyi tsakisaka?

Vukati i xiboho lexi kwetsimaka. Loko Yesu a vutisiwe leswaku swa pfumeleriwa ku dlaya vukati u te: “Xana a mi hlayanga leswaku loyi a va tumbuluxeke eku sunguleni u va endle va va waxinuna ni waxisati kutani a ku, ‘Hikwalaho ka sweswo, wanuna u ta siya tata wakwe ni mana wakwe naswona u ta namarhela nsati wakwe, kutani lavambirhi va ta va nyama yin’we’? Kutani a va ha ri vambirhi, kambe i nyama yin’we. Hikokwalaho, leswi Xikwembu xi swi paneke swin’we, ku nga tshuki ku va ni munhu la swi hambanisaka. . . . Mani na mani la tshikaka nsati wakwe, a teka un’wana, ku nga ri hi xivangelo xa vumbhisa, u endla vuoswi.” (Matewu 19:4-6, 9) Loko vatekani va landzela ndzayo ya Yesu naswona va tshembeka, ndyangu hinkwawo wu ta titwa wu sirhelelekile naswona wu ri ni ntsako.

I yini lexi endlaka leswaku loko mindyangu yi rhandza Xikwembu yi va leyi tsakeke?

Yesu u te: “‘U fanele u rhandza Yehovha Xikwembu xa wena hi mbilu ya wena hinkwayo ni hi moya-xiviri wa wena hinkwawo ni hi mianakanyo ya wena hinkwayo.’ Lexi hi xona xileriso lexikulu ni xo sungula eka hinkwaswo.” Hi xihi xileriso xa vumbirhi lexikulu? Yesu u te: “U fanele u rhandza warikwenu [ku katsa ni lava nga ekusuhi na wena, ku nga ndyangu wa wena] kukota loko u tirhandza.” (Matewu 22:37-39) Kutani nchumu wa nkoka lowu endlaka leswaku ndyangu wu va lowu tsakeke i ku va wu va ni vuxaka lebyinene ni Xikwembu, hikuva rirhandzu leri hi nga na rona eka Xikwembu ri hi susumetela leswaku hi rhandzana.

 I yini leswi nuna ni nsati va nga swi endlaka leswaku va tsakisana?

Vavanuna va tsakisa vasati va vona loko va landzela xikombiso xa Yesu. Yesu u titsone swo karhi leswaku a ta kombisa rirhandzu eka nsati wakwe wo fanekisela, ku nga vandlha. (Vaefesa 5:25) Yesu u te: ‘N’wana wa munhu a nga telanga ku tirheriwa, kambe u tele ku tirhela.’ (Matewu 20:28) Yesu a a nga va tshikileli kumbe ku va karihela vanhu lava nga ehansi kakwe, kambe a a va phyuphyisa. (Matewu 11:28) Hikwalaho, vavanuna va fanele va tirhisa vulawuri bya vona hi ndlela leyinene leyi nga ta vuyerisa swirho hinkwaswo endyangwini.

Vavasati na vona va nga tlhela va vuyeriwa eka xikombiso xa Yesu. Bibele yi ri: “Nhloko ya Kreste i Xikwembu.” Nakambe yi tlhela yi vula leswaku “nhloko ya wansati i wanuna.” (1 Vakorinto 11:3) Yesu a a nga swi teki ku ri ndzhwalo ku tiveka ehansi ka Xikwembu. A a n’wi xixima swinene Tata wakwe. Yesu u te: “Nkarhi hinkwawo ndzi endla swilo leswi n’wi tsakisaka.” (Yohane 8:29) Wansati loyi a titsongahatelaka vunhloko bya nuna wakwe hi ku tirhandzela ni hikwalaho ko chava Xikwembu, u hoxa xandla swinene emhakeni yo endla leswaku vutomi bya ndyangu wakwe byi tsakisa.

Vatswari va nga dyondza yini eka ndlela leyi Yesu a a va languta ha yona vana?

Yesu u hete nkarhi a ri ni vana, naswona a a swi tekela enhlokweni leswi va swi vulaka ni ndlela leyi va titwaka ha yona. Bibele yi ri: “Yesu a vitana tincece ti ta eka yena, a ku: ‘Tshikani vana lavatsongo va ta eka mina.’” (Luka 18:15, 16) Siku rin’wana vanhu van’wana va tshame va sandza vafana lava a va vulavula hi ripfumelo ra vona eka Yesu. Kambe Yesu u bumabumele vantshwa volavo loko a byela vasandzi volavo a ku: “Xana a mi si tshama mi hlaya leswi, ‘U lunghiselele swidzuniso swi huma emilon’wini ya swihlangi ni ya lava an’waka’?”—Matewu 21:15, 16.

Xana vana va nga dyondza yini eka Yesu?

Yesu u va vekele xikombiso lexinene vana malunghana ni ndlela leyi va faneleke va swi hisekela ha yona swilo leswi fambisanaka ni vugandzeri. Loko a ri ni malembe ya 12, u kumiwe “etempeleni a tshame exikarhi ka vadyondzisi, a va yingisela ni ku va vutisa.” Leswi swi ve ni vuyelo byihi? “Hinkwavo lava a va n’wi yingisile a va hlamala va nga heti hikwalaho ka ku twisisa kakwe ni tinhlamulo takwe.” (Luka 2:42, 46, 47) Hambiloko swi ri tano, vutivi byakwe a byi n’wi endlanga a titlakusa. Ematshan’weni ya sweswo, byi endle leswaku a va xixima swinene vatswari vakwe. Bibele yi ri: “A hambeta a tiveka ehansi ka vona.”—Luka 2:51.

Leswaku u kuma rungula leri engetelekeke, vona ndzima 14 ya buku leyi nge Xana Bibele Yi Dyondzisa Yini Hakunene? *

[Nhlamuselo ya le hansi]