MUAPOSTOLA PAWULO u tsalele Vakreste lava hanyeke exiphen’wini xo hetelela xa lembe-xidzana ro sungula C.E. a ku: “Tivoneleni.” Xana a a va lemukisa ha yini? “Swi nga ha endleka ku va ni un’wana loyi a nga ta mi phasa hi filosofi ni vuxisi bya hava hi ku ya hi ndhavuko wa vanhu.”—Vakolosa 2:8.

Ku nga khathariseki xilemukiso xa Pawulo, ku sukela exikarhi ka lembe-xidzana ra vumbirhi C.E., Vakreste van’wana va sungule ku tirhisa tidyondzo ta vativi va filosofi leswaku va hlamusela leswi va pfumelaka eka swona. Ha yini? A va lava ku amukeriwa hi vanhu lava dyondzekeke va Mfumo wa Rhoma ni ku tlhela va kota ku va hundzula.

Justin Martyr un’wana wa Vakreste lava, loyi a dumeke, a a pfumela leswaku Muvulavuleri wa Xikwembu a a tolovelane ni vativi va filosofi va Magriki emahlweni ko va Yesu a ta laha emisaveni. Hi ku ya hi Justin swin’we ni vadyondzisi van’wana lava a va dyondzisa dyondzo leyi fanaka, ku katseka ka filosofi swin’we ni tidyondzo ta mavunwa eka Vakreste swi endle leswaku ndlela leyi yo gandzela yi hangalaka emisaveni hinkwayo.

Ndlela leyi yo gandzela ya Vukreste leyi sunguriweke hi Justin Martyr yi ve leyi fambaka emahlweni eka ku hundzula vanhu. Hambiswiritano, ku pfumela eka tidyondzo tin’wana ta mavunwa swi endle leswaku vanhu va tlhela va sungula ku kholwa eka swilo swin’wana leswi nga riki ntiyiso naswona sweswo swi endle leswaku ku sunguriwa leswi sweswi van’wana va swi vulaka dyondzo ya Vukreste. Leswaku u kota ku swi vona leswaku tidyondzo leti ta mavunwa a hi ntiyiso, fananisa leswi tibuku leti ti swi vulaka ni leswi Bibele yi swi dyondzisaka hakunene.