Tshinela Eka Xikwembu

Lexi Lavaka Leswaku Swilo Swi Hi Fambela Kahle

Yoxuwa 1:6-9

VATSWARI lava khathalaka va langutele ku vona vana va vona swi va fambela kahle, va hanya vutomi lebyi nga ni xikongomelo ni lebyi enerisaka. Hilaha ku fanaka, Yehovha, Tata wa hina la nge matilweni, u lava leswaku vana vakwe va laha misaveni swilo swi va fambela kahle. U kombisa leswaku wa hi khathalela hi ku hi byela ndlela leyi swilo swi nga hi fambelaka kahle ha yona. Hi xikombiso, xiya marito lama a ma byeleke Yoxuwa, lama nga eka Yoxuwa 1:6-9.

Anakanya hi xifaniso lexi kombisiweke exineneni. Endzhaku ka rifu ra Muxe, Yoxuwa u ve murhangeri wa Vaisrayele lava a va endla timiliyoni. Loko Vaisrayele va ri karhi va tilunghiselela ku nghena etikweni leri Xikwembu xi ri tshembiseke vatata wa vona, Xikwembu xi nyike Yoxuwa ndzayo yo karhi. Loko a yi tirhisa, a yi ta n’wi pfuna leswaku swi n’wi fambela kahle. Kambe ndzayo leyi a yi nga ta vuyerisa Yoxuwa ntsena. Loko na hina hi yi tirhisa, swilo swi ta hi fambela kahle.—Varhoma 15:4.

Yehovha u byele Yoxuwa leswaku u fanele a va ni xivindzi a tlhela a tiya—a nga n’wi byelanga kan’we kambe u n’wi byele kanharhu. (Tindzimana 6, 7, 9) Swi le rivaleni leswaku Yoxuwa a a fanele a va ni xivindzi ni matimba leswaku swilo swi n’wi fambela kahle loko a rhangela tiko ri ya eTikweni leri Tshembisiweke. I yini leswi a swi ta n’wi pfuna leswaku a kota ku va ni xivindzi a tlhela a tiya?

Yoxuwa a a ta kuma xivindzi ni matimba eka matsalwa lama huhuteriweke. Yehovha u te: “Tiya ngopfu leswaku u khathalela ku endla hi ku landza nawu hinkwawo lowu Muxe nandza wa mina a ku leriseke wona.” (Ndzimana 7) Swi nga ha endleka hi nkarhi wolowo Yoxuwa a a ri ni tibuku ti nga ri tingani ntsena ta Bibele leti tsariweke. * Hambiswiritano, ku va ni Rito ra Xikwembu a swi nga vuli swona leswaku swilo a swi ta n’wi fambela kahle. Yoxuwa a a fanele a endla swilo swimbirhi leswaku a kota ku vuyeriwa eka rona.

Xo sungula, Yoxuwa a a fanele a nghenisa rito ra Xikwembu embilwini yakwe nkarhi na nkarhi. Yehovha u te: “U fanele u [ri] hlaya hi rito ra le hansi nhlikanhi ni vusiku.” (Ndzimana 8) Buku yin’wana yi ri: “Xikwembu a xi lerisa Yoxuwa leswaku a tsundzuka Nawu wa xona ‘hi ku wu hlaya hi rito ra le hansi’ kumbe ‘ku anakanyisisa ha wona.’” Ku hlaya swin’we ni ku anakanyisisa hi Rito ra Xikwembu siku ni siku a swi ta pfuna Yoxuwa leswaku a kota ku langutana ni swiphiqo leswi a a ta hlangavetana na swona.

Xa vumbirhi, Yoxuwa a a fanele a tirhisa leswi a swi dyondzeke eRitweni ra Xikwembu. Yehovha u te eka yena: “U ta hisekela ku endla hi ku landza hinkwaswo leswi tsariweke eka [rona]; hi kona u nga ta endla ndlela ya wena yi humelela.” (Ndzimana 8) Leswaku Yoxuwa a humelela a swi ti tshege hi ku endla ku rhandza ka Xikwembu. Hakunene a a ta humelela! Minkarhi hinkwayo ku rhandza ka Xikwembu ka humelela.—Esaya 55:10, 11.

Yoxuwa u yingise ndzayo ya Yehovha. Hikwalaho, u hanye nkarhi wo leha a tlhela a hanya vutomi lebyi enerisaka tanihi mugandzeri wa Yehovha la tshembekeke.—Yoxuwa 23:14; 24:15.

Xana u lava ku hanya vutomi lebyi enerisaka ku fana na Yoxuwa? Yehovha u lava leswaku swilo swi ku fambela kahle. Ku va ni Rito ra yena, ku nga Bibele, a swi enelanga. Wanuna un’wana wo tshembeka loyi ku nga khale a ri Mukreste u te: “Hlaya Bibele kutani u tirhisa leswi u swi hlayaka.” Loko nkarhi na nkarhi u nghenisa rito ra Xikwembu embilwini ya wena naswona u tirhisa leswi u swi hlayaka evuton’wini bya wena, kutani na wena ku fana na Yoxuwa ‘u ta endla ndlela ya wena yi humelela.’

[Nhlamuselo ya le hansi]