Ndlela Leyi Hi Swi Tivaka Ha Yona Leswaku—Xikwembu Xa Hi Khathalela Hakunene

XIVUTISO lexi nge: Loko Xikwembu xi hi rhandza, ha yini ku ri ni ku xaniseka ko tala hi ndlela leyi? I xivutiso xa khale kambe i xa nkoka naswona se ku hele magidi ya malembe vanhu va ri karhi va anakanyisisa ha xona. Kumbexana u pfumelelana na swona leswaku loko u rhandza munhu wo karhi a wu swi lavi ku n’wi vona a xaniseka naswona loko a ri ekhombyeni a wu ta ringeta ku n’wi pfuna. Hikwalaho vo tala a va pfumeli leswaku Xikwembu xa hi khathalela hikwalaho ka ku xaniseka loku andzeke laha misaveni. Kutani i swa nkoka leswaku hi rhanga hi kambisisa vumbhoni lebyi kombisaka leswaku Xikwembu xa hi rhandza hakunene naswona xa hi khathalela.

Ntumbuluko Wu Kombisa Leswaku Xikwembu Xa Hi Rhandza

Yehovha Xikwembu “hi [Yena] la endleke tilo ni misava ni lwandle ni swilo hinkwaswo leswi nga eka swona.” (Mintirho 4:24) Loko hi anakanyisisa hileswi Yehovha a swi endleke, hakunene hi fanele hi gimeta hileswaku wa hi  khathalela. Hi xikombiso, anakanya hi swilo leswi ku nyikaka ntsako. Xana wa swi rhandza swakudya swo nandziha? Yehovha a a ta va a endle muxaka wun’we ntsena wa swakudya leswaku hi kota ku hanya. Ematshan’weni ya sweswo, u endle swakudya swo tala leswi phomisaka marha. Hilaha ku fanaka, Yehovha u khavise misava hi mirhi yo tala yo saseka, hi swiluva ni swilo swin’wana swo saseka leswi hi swi vonaka laha misaveni, leswaku hi tiphina hi vutomi.

Nakambe anakanya hi ndlela leyi hi vumbiweke ha yona. Ku va lava kotaka ku tsakela swilo swo karhi, vuswikoti bya hina byo tsakela vuyimbeleri ni ku tlangela vuxongi, a swi hi pfuni leswaku hi kota ku hanya ntsena kambe hinkwaswo ka swona i tinyiko leti humaka eka Xikwembu leti endlaka leswaku hi tsakela vutomi. Nakambe anakanya hi vuxaka bya wena ni vanhu van’wana. Xana u kona loyi a nga swi tsakeriki ku va swin’we ni vanghana lavanene kumbe ku angarhiwa hi munhu loyi a n’wi rhandzaka? A nga kona, hikuva vuswikoti lebyi hi nga na byona byo rhandza vanhu van’wana i nyiko leyi humaka eka Xikwembu lexi nga ni rirhandzu! Leswi Xikwembu xi vumbeke vanhu va ri ni vuswikoti byo rhandza, mfanelo yoleyo yi fanele yi ri xiphemu xa vumunhu bya xona.

Bibele Yi Hi Tiyisekisa Leswaku Xikwembu Xa Hi Rhandza

Bibele yi hi byela leswaku Xikwembu i rirhandzu. (1 Yohane 4:8) Rirhandzu ra xona a ri vonaki ntsena eka ntumbuluko kambe ri tlhela ri vonaka eRitweni ra xona, ku nga Bibele. Hi xikombiso, Bibele yi hi nyika nkongomiso lowu hi pfunaka leswaku hi va ni rihanyo lerinene, lowu hi khutazaka leswaku hi va lava ringaniselaka eka swilo hinkwaswo naswona wu hi lemukisa hi vudakwa ni makolo.—1 Vakorinto 6:9, 10.

Bibele yi tlhela yi hi nyika nkongomiso wa vutlhari malunghana ni vuxaka bya hina ni van’wana, yi hi khutaza leswaku hi rhandzana hi tlhela hi kombisa van’wana xichavo ni musa. (Matewu 7:12) Yi sola swiendlo ni mahanyelo lama vangaka ku xaniseka—makwanga, rihlevo, mavondzo, vuoswi ni ku dlaya. Loko un’wana ni un’wana a a ringeta ku hanya hi ndzayo leyinene leyi kumekaka eMatsalweni, entiyisweni a ku ta va ku nga ri na ku xaniseka ko tala emisaveni hinkwayo.

Hambiswiritano, ndlela leyikulu leyi Xikwembu xi kombiseke rirhandzu ra xona ha yona, a ku ri ku nyikela hi N’wana wa xona, Yesu, leswaku a kutsula vanhu. Yohane 3:16 yi ri: “Xikwembu xi rhandze misava swinene xi kala xi nyikela hi N’wana wa xona la tswariweke a ri swakwe, leswaku un’wana ni un’wana loyi a kombisaka ripfumelo eka yena a nga lovisiwi kambe a va ni vutomi lebyi nga heriki.” Xisweswo, Yehovha se u ri endlile lunghiselelo ro herisa rifu hi ku helela swin’we ni muxaka wun’wana ni wun’wana wa ku xaniseka.—1 Yohane 3:8.

Swi le rivaleni leswaku ku ni vumbhoni byo tala bya leswaku Yehovha wa hi rhandza. Leswi swi kombisa leswaku a swi n’wi tsakisi ku hi vona hi ri karhi hi xaniseka. U ta teka goza ro herisa ku xaniseka. A hi fanelanga hi va ni ku kanakana malunghana ni mhaka leyi—Bibele yi hi byela hi ku kongoma ndlela leyi Xikwembu xi nga ta ku herisa ha yona xaniseka.

[Xifaniso lexi nga eka tluka 4]

Vuswikoti byo rhandza vanhu van’wana i nyiko leyi humaka eka Xikwembu lexi nga ni rirhandzu