Ntlhantlho Wa Xiphiqo Lexi Karhataka Misava Hinkwayo

KU XANISEKA ku kona emisaveni hinkwayo naswona va tele lava tikarhatelaka ku pfuna lava xanisekaka. Hi xikombiso, va ta vutshunguri va tirha nkarhi lowu engetelekeke eswibedlhele leswaku va pfuna vanhu lava vabyaka kumbe lava vavisekeke. Vatimeri va ndzilo, maphorisa, vanhu lava vekaka milawu swin’we ni va swilamulela-mhangu va ringeta hi matimba ku hunguta kumbe ku sivela leswaku van’wana va nga xaniseki. Matshalatshala wolawo ma pfuna vanhu hi ndlela yo karhi, kambe ku hava munhu kumbe nhlengeletano yo karhi leyi nga kotaka ku herisa ku xaniseka emisaveni hinkwayo. Ku hambana ni sweswo, Xikwembu xi nga swi kota naswona ku nga ri khale xi ta tisa ntlhantlho wa xiphiqo lexi karhataka misava hinkwayo.

Buku yo hetelela ya Bibele yi hi tiyisekisa yi ku: “[Xikwembu] xi ta sula mihloti hinkwayo ematihlweni ya vona, rifu a ri nge he vi kona, hambi ku ri  ku kolola, ni xirilo ni xitlhavi a swi nge he vi kona. Swilo swo sungula swi hundzile.” (Nhlavutelo 21:4) Xiya leswi katsekaka eku hetisekeni ka xitshembiso lexi. Xi katsakanya xikongomelo xa Xikwembu xa ku herisa ku xaniseka hinkwako. Xi ta endla sweswo hi ku herisa tinyimpi, ndlala, vuvabyi ni ku kala vululami swin’we ni vanhu hinkwavo vo biha emisaveni. A ku na munhu ni un’we loyi a nga swi endlaka sweswo.

Leswi Mfumo Wa Xikwembu Wu Nga Ta Swi Endla

Xikwembu xi ta hetisisa swikongomelo swa xona hi ku tirhisa munhu un’wana loyi a landzelaka xona hi matimba evuakweni hinkwabyo, ku nga Yesu Kreste loyi a pfuxiweke eku feni. Nkarhi wa ta lowu Yesu a nga ta fuma tanihi Hosi handle ko kanetiwa emisaveni hinkwayo. Vanhu a va nge he fumiwi hi tihosi leti nga vanhu, ku nga ha va tipresidente kumbe van’watipolitiki. Ematshan’weni ya sweswo, va ta fumiwa hi Hosi yin’we ni hulumendhe yin’we, ku nga Mfumo wa Xikwembu.

Mfumo wolowo wu ta herisa tihulumendhe hinkwato ta vanhu. I khale Bibele yi profete yi ku: “Xikwembu xa le tilweni xi ta veka mfumo lowu wu nga ta ka wu nga lovisiwi. Mfumo lowu wu nga ka wu nga hundziseriwi eka vanhu van’wana. Wu ta pfotlosa kutani wu herisa mimfumo leyi hinkwayo, kambe wona wu ta tshama hilaha ku nga riki na makumu.” (Daniyele 2:44) Vanhu emisaveni hinkwayo va ta va ni vun’we ehansi ka hulumendhe yo lulama, ku nga Mfumo wa Xikwembu.

Loko Yesu a ha ri emisaveni tanihi munhu, minkarhi yo tala a a vulavula hi Mfumo. U vulavule hi wona exikhongelweni xa xikombiso naswona u lerise vadyondzisiwa vakwe leswaku va khongela hi ndlela leyi: “Mfumo wa wena a wu te. Ku rhandza ka wena a ku endleke emisaveni, hilaha ku endlekaka hakona etilweni.” (Matewu 6:10) Xiya leswaku Yesu u vule leswaku Mfumo lowu wu fambisana ni ku endliwa ka ku rhandza ka Xikwembu laha misaveni naswona i ku rhandza ka Xikwembu leswaku ku xaniseka ku herisiwa emisaveni hinkwayo.

Hulumendhe yo lulama ya Xikwembu yi ta tisa mikateko leyi ku nga riki na hulumendhe na yin’we ya munhu leyi yi nga kotaka ku yi tisa. Tsundzuka leswaku Yehovha u nyikele hi N’wana wakwe tanihi nkutsulo leswaku vanhu va ta kota ku kuma vutomi lebyi nga heriki. Ehansi ka vulawuri byo lulama bya Mfumo lowu, vanhu va ta endliwa lava hetisekeke hakatsongo-tsongo. Ku ta va ni vuyelo byihi? Yehovha “u ta mita rifu hi masiku, kunene Yehovha, Hosi leyi Lawulaka yi ta sula mihloti eswikandzeni hinkwaswo.”—Esaya 25:8.

Van’wana va nga ha vutisa: ‘Ha yini Xikwembu xi nga tekanga goza khale? Xana xa ha yimele yini?’ Yehovha a a ta va a teke goza khale leswaku a herisa ku xaniseka hinkwako hambi ku ri ku ku sivela. Ematshan’weni ya sweswo, u ku pfumelerile leswaku ku ya emahlweni, ku nga ri hi xivangelo xa vutianakanyi, kambe leswaku vana va yena va laha misaveni va ta vuyeriwa hilaha ku nga heriki. Vatswari lava nga ni rirhandzu va nga pfumelela vana va vona leswaku va xaniseka ntsena loko va tiva leswaku sweswo swi ta va vuyerisa. Hilaha ku fanaka, ku ni swivangelo leswi twalaka leswi endlaka leswaku Yehovha a pfumelela vanhu leswaku va xaniseka swa xinkarhana naswona swivangelo sweswo swa hlamuseriwa eBibeleni. Leswi swi katsa ntshunxeko wo tihlawulela, xidyoho swin’we ni timhaka leti khumbaka mfanelo ya Yehovha yo fuma. Bibele yi tlhela yi hlamusela leswaku, ku ringana nkarhi wo karhi, xivumbiwa xo biha xa moya xi pfumeleriwile leswaku xi fuma misava. *

A hi nge swi koti ku hlamusela swivangelo sweswo hinkwaswo eka matluka lawa ma nga ri mangani, nilokoswiritano ku ni tinhla timbirhi ta nkoka leti nga hi nyikaka ntshembo ni nchavelelo. Yinhla yo sungula: Yehovha u ta herisa ku xaniseka hinkwako loku hi nga ha vaka hi langutane na kona. Ku engetela kwalaho, Xikwembu xi hi tiyisekisa xi ku: “Swilo swo sungula a swi nge tsundzukiwi, hambi embilwini a swi nge ti.” (Esaya 65:17) Xikwembu xi ta herisa mbitsi ni ku xaniseka hilaha ku heleleke, ku nga leswi vangiwaka hi vubihi lebyi xi byi pfumeleleke swa xinkarhana.

Yinhla ya vumbirhi hi leyi: Xikwembu xi veke nkarhi lowu nga hundzukiki lowu ha wona xi nga ta herisa ku xaniseka. Tsundzuka leswaku muprofeta Habakuku u vutise Yehovha leswaku xana a a ta pfumelela madzolonga ku fikela rini. Yehovha u hlamule a ku: “Xivono xa ha ri xa nkarhi lowu vekiweke . . . A xi nge hlweli.” (Habakuku 2:3) Hilaha hi nga ta swi vona hakona eka xihloko lexi landzelaka, “nkarhi lowu vekiweke” wu tshinele.

[Nhlamuselo ya le hansi]

 [Bokisi leri nga eka tluka 7]

Matsalwa Lama Vulavulaka Hi Vumundzuku Lebyinene

A KU NGE HE VI NI TINYIMPI:

“N’wina vanhu tanani, vonani swiendlo swa Yehovha, ndlela leyi a vekeke ha yona swilo leswi hlamarisaka emisaveni. U herisa tinyimpi ku ya fika emakumu ya misava.”—Pisalema 46:8, 9.

KU PFUXIWA KA LAVA FEKE:

“Ku ta va ni ku pfuxiwa ka lava lulameke ni ka lava nga lulamangiki.”—Mintirho 24:15.

SWAKUDYA LESWI NGA TA ENELA VANHU HINKWAVO:

“Ku ta va ni mavele yo tala emisaveni; ma ta khapakhapa etinhlohlorhini ta tintshava.”—Pisalema 72:16.

A KU NGE HE VI NA VUVABYI:

“Ku hava munhu la tshamaka kona la nga ta ku: ‘Ndza vabya.’”—Esaya 33:24.

VANHU VO HOMBOLOKA A VA NGE HE VI KONA:

“Loko ku ri lavo homboloka, va ta dlayiwa emisaveni; kasi loko ku ri vaxengi, va ta tsuvuriwa eka yona.”—Swivuriso 2:22.

KU LULAMA KU TA ANDZA:

“Waswivo! Hosi [Kreste Yesu] yi ta fuma hi ku tshembeka; kasi tihosana, ti ta va tihosana hi vululami.”—Esaya 32:1.

[Swifaniso leswi nga eka tluka 7]

Mfumo wa Xikwembu wu ta herisa ku xaniseka hinkwako loku hi nga ha vaka hi langutane na kona