XANA u tshame u hetiwa matimba lerova u twa onge u nga lan’wa?— * Vo tala swi va humelerile. Muntshwa la vuriwaka Yeremiya na yena swi tshame swi n’wi humelela. Nilokoswiritano, a nga pfumelanga leswaku leswi vanhu van’wana va nga swi vula kumbe ku swi endla swi n’wi lan’wisa. Sweswi a hi vulavuleni hileswi endleke leswaku Yeremiya a va wo hlawuleka eka Xikwembu, hambileswi a a twa onge a nga lan’wa.

Loko Yeremiya a nga si velekiwa, Yehovha Xikwembu xa ntiyiso, u n’wi hlawurile leswaku a va muprofeta loyi a nga ta lemukisa vanhu hi swiendlo swa vona leswi nga n’wi tsakisiki. Xana wa swi tiva leswi Yeremiya a swi byeleke Yehovha endzhakunyana ka malembe?— U te: “Entiyisweni a ndzi swi tivi ku vulavula, hikuva ndza ha ri mufana.”

Xana u ehleketa leswaku Yehovha u n’wi angule njhani Yeremiya?— Hi ndlela ya musa kambe a nga debyisi voko, u te: “U nga vuli u ku, ‘Ndza ha ri mufana.’ Kambe u fanele u ya eka hinkwavo lava ndzi nga ta ku rhuma eka vona; u fanele u vulavula xin’wana ni xin’wana lexi ndzi nga ta ku lerisa xona. U nga chavisiwi.” Ha yini? Hikuva Yehovha u te: “Ndzi na wena leswaku ndzi ku kutsula.”—Yeremiya 1:4-8.

Hambiswiritano, hilaha swi boxiweke hakona, hi ku famba ka nkarhi Yeremiya u hele matimba. Leswi swi endliwe hileswi a hlekuriweke hikwalaho ko tirhela Xikwembu. U te: ‘Un’wana ni un’wana a a ndzi hleka siku hinkwaro ni ku ndzi hundzula xihlekiso.’ Kutani u vone swi antswa ku va a lan’wa. U te: “A ndzi nge vulavuli ha yena [Yehovha], naswona a ndzi nge he tlheli ndzi vulavula hi vito ra yena.” Xana u lan’wile hakunene?

Yeremiya u tlhele a ku: ‘Embilwini ya mina rito ra Yehovha ri fana ni ndzilo lowu hisaka lowu pfaleriweke emarhambyini ya mina, ndzi kale ndzi karhala ku kanya mbilu.’ (Yeremiya 20:7-9) Hambileswi minkarhi yin’wana Yeremiya a a chava, kambe rirhandzu leri a a ri na rona hi Yehovha a ri n’wi pfumelelanga leswaku a lan’wa. A hi voneni ndlela leyi Yeremiya a sirheleriweke ha yona hikwalaho ka leswi a nga lan’wangiki.

Yehovha u byele Yeremiya leswaku a lemukisa vanhu va muti wa Yerusalema leswaku va ta herisiwa loko va nga hundzuki eka tindlela ta vona to biha. Loko Yeremiya  a va lemukisa, vanhu va hlundzukile kutani va ku: “Munhu loyi u faneriwa hi ku avanyiseriwa rifu.” Nilokoswiritano, Yeremiya u va kombele leswaku va “[yingisa] rito ra Yehovha.” Hiloko a ku: ‘Mi fanele mi tiva leswaku loko mi ndzi dlaya, mi dlaya munhu la nga riki na nandzu hikuva Yehovha u ndzi rhume leswaku ndzi ta vulavula na n’wina.’ Xana wa swi tiva leswi humeleleke endzhaku ka sweswo?—

Bibele yi ri: “Tihosana ni vanhu hinkwavo va byela vaprista ni vaprofeta va ku: ‘Munhu loyi a nga faneriwanga hi ku avanyiseriwa rifu, hikuva u vulavule na hina hi vito ra Yehovha Xikwembu xa hina.’” Hikwalaho, leswi Yeremiya a nga pfumelangiki leswaku ku chava ku n’wi lan’wisa, Yehovha u n’wi sirhelerile. A hi voneni leswi nga humelela eka Yuriya muprofeta un’wana wa Yehovha loyi a nga endla hilaha ku hambaneke na Yeremiya.

Bibele yi ri: ‘Yuriya u ye emahlweni a profeta malunghana na Yerusalema hilaha Yeremiya a vuleke hakona.’ Xana wa swi tiva leswi Yuriya a swi endleke loko Hosi Yoyakimi a n’wi hlundzukela?— U khomiwe hi rhumbyana, kutani a tshika ku endla ku rhandza ka Xikwembu a balekela aEgipta. Hikwalaho, hosi yi rhumele vavanuna leswaku va n’wi landza. Loko va vuye na yena, xana wa swi tiva leswi hosi leyi yo homboloka yi swi endleke?— Yi n’wi dlaye hi banga!—Yeremiya 26:8-24.

Ha yini u nga vulaka leswaku Yeremiya u sirheleriwe hi Yehovha kasi Yuriya a nga n’wi sirhelelanga?— Yeremiya a nga ha va a chavile, ku fana na Yuriya, kambe Yeremiya a nga lan’wanga ku tirhela Yehovha naswona a nga balekanga. U tiyiserile. Hi dyondza yini eka xikombiso xa Yeremiya?— Hi dyondza leswaku minkarhi yin’wana swi nga ha tika ku endla ku rhandza ka Xikwembu, kambe minkarhi hinkwayo hi fanele hi xi tshemba hi tlhela hi xi yingisa.