Ndlela Leyi Vakreste Va Lembe-Xidzana Ro Sungula A Va Hanya Ha Yona

Laha A Va Tshama Kona

“A ndzi tshikanga ku mi . . . dyondzisa erivaleni ni hi yindlu ni yindlu.”—MINTIRHO 20:20.

LOKO U NGHENA hi nyangwa leyikulu, u nghena emutini wa lembe-xidzana ro sungula. Ku fana ni miti yin’wana, wu akiwe ehenhla ka ntshava. Loko u languta ehenhla u vona swintshabyana, laha u kotaka ku wu vona kahle muti wolowo. Ku ni miako yo hambana-hambana ya swigwili leyi nga ni muvala wo basa naswona yo tala ya yona yi ni mintanga leyi loko dyambu ri tlhavile ri endlaka leswaku yi saseka swinene. Laha hi kona laha swigwili swi tshamaka kona. Loko u languta ehansinyana, u vona tiyindlu leti nga akiwa hi tindlela to hambana-hambana. Tiyindlu ta van’wamabindzu swin’we ni ta vini va ndhawu lava nga fuwangiki ngopfu leti nga swithezi ti akiwe hi maribye naswona ti ni switarata leswi nga ni xikontiri. Loko u languta ehansinyana u vona tindhawu ta le matiko-xikaya. Eka tona ku ni swiyindlwana leswi nga tsakisiki leswi nga akiwa endhawini yin’we naswona swi languteka ku fana ni mabokisi etlhelo ka swindledyana.

Loko u ri karhi u famba eswitarateni sweswo, mpfumawulo ni nun’hwelo lowu u wu twaka wu ku byela leswi nga eku endlekeni endhawini yoleyo. Vavasati va va va ri eku swekeni, naswona nun’hwelo wa swakudya leswi va swi swekaka wu phomisa marha. U twa mpfumawulo wa swifuwo ni wa vana lava nga eku tlangeni. Vavanuna va va va khomekile hi ntirho eswitolo leswi nga ni pongo ni risema.

Vakreste a va kota ku tiwundla hi tlhelo ra moya etindlwini teto. A va kota ku hlela leswi va nga ta swi endla evuton’wini bya vona bya siku ni siku, a va tiletela hi tlhelo ra moya ni ku gandzela swin’we.

Tiyindlu Letitsongo Ku fana ni tiyindlu leti nga kona namuntlha, tiyindlu leti mindyangu yo tala a yi tshama eka tona a ti hambana hi ku ya hi xiyimo xa timali ta ndyangu wolowo. Tiyindlu ta kona letitsongo (1) a to va kamara rin’we leri nga ni munyama naswona ndyangu hinkwawo a wu tshama eka rona. To tala a ti akiwe hi switina swa  misava. Tin’wana a ti akiwe hi maribye. Kambe hinkwato ka tona masungulo ya tona a ma akiwe hi maribye.

Makhumbi ya le ndzeni a ma pulasiteriwile kasi fuloro ya kona a yi semendheriwile naswona nkarhi na nkarhi a swi fanele swi tshama swi ri karhi swi lunghisiwa. Tiyindlu leti a ti ri ni chimele leyi humesaka musi hi le lwangwini kumbe ekhumbini. To tala ta tona a ti nga ri na fanichara yo tala.

Lwangu ra kona a ri fuleriwe hi timhandzi ni tinhlanga naswona a ri seketeriwe hi mintsandza swin’we ni tinsika leti nga yimisiwa. Endzhaku ka loko va veketele timhandzi teto, a va teka vumba va byi phama leswaku mati ma nga ngheni. A va tirhisa xitepisi leswaku va kota ku khandziya ehenhla ka lwangu.

Hambileswi tiyindlu ta kona a ti ri ekusuhi na kusuhi, makaya ya Vakreste a ma fuwile hi tlhelo ra moya ma tlhela ma va ni ntsako.

Tiyindlu Ta Vanhu Lava Nga Fuwangiki Ngopfu Tiyindlu letikulu leti nga akiwa hi maribye leti nga ni swithezi swimbirhi (2) a ti ri ni kamara ra vaendzi. (Marka 14:13-16; Mintirho 1:13, 14) Kamara lerikulu ra le henhla a ku khomeriwa eka rona minhlangano naswona hakanyingi loko ku va ni nkhuvo a ku tirhisiwa rona. (Mintirho 2:1-4) Tiyindlu teto ni tin’wana letikulu (3) ta van’wamabindzu ni vini va ndhawu a ti akiwe hi switina swa semendhe ti tlhela ti phamiwa. Fuloro ya tona a yi semendheriwile naswona makhumbi ya le ndzeni a ma pulasiteriwile; kasi makhumbi ya le handle a ma lo chuchutiwa kunene.

Etindlwini teto a ku ri ni switepisi leswi a va ya ha swona ekamareni ra le henhla ni le lwangwini. Tiyindlu ta kona hinkwato ta swithezi a ti ri ni guma ematlhelo hinkwawo ya lwangu, leri a ri sivela ku wa kumbe timhangu tin’wana. (Deteronoma 22:8) Loko ku hisa, a swi va phyuphyisa ku tshama ehansi ka mindzhuti leyi va nga tiendlela yona leswaku va hlaya, va anakanyisisa, va khongela kumbe ku wisa eka yona. —Mintirho 10:9.

Hambileswi minkarhi yo tala mindyangu yoleyo a yi rhurhela maxaka ya wona, tiyindlu teto leti nga ni makamara lamakulu a ti ri ni ndhawu leyi eneleke yo tshama eka yona, makamara yo etlela eka wona, xitanga lexikulu ni kamara ro dyela eka rona.

Tiyindlu Ta Xiyimo Xa Le Henhla Tiyindlu leti a ti akiwe hi ndlela leyi Varhoma va akaka ha yona (4) a ti nga fani naswona a ti nga ringani. Makamara ya kona lamakulu a ku ri tindhawu to dyela eka tona (leti nga ni masofa) naswona emakamareni wolawo hi kona laha ndyangu a wu tiendlela swilo swo hambana-hambana. Tiyindlu tin’wana a ti ri ni swithezi swimbirhi kumbe swinharhu (5) kumbe ti sasekisiwe hi mintanga.

Tiyindlu tin’wana swi nga ha endleka leswaku a ti ri ni fanichara yo tala naswona tin’wana a ti sasekisiwe hi timhondzo ta ndlopfu ni nsuku. A ti ri ni  swilo swo tala leswinene swo tanihi tipompi ta mati ni makamara yo hlambela eka wona. Swi nga ha endleka leswaku fuloro ya kona a yi endliwe hi mapulanga kumbe hi mavulu ya mivala yo hambana-hambana naswona ti rhendzeriwe hi mirhi ya rihlaza ya mikedari. A ti ri ni switiko swo orhela ndzilo. Emafasitereni ya kona a va hingakanya timhandzi leswaku va sivela swigevenga naswona makhethenisi a ma endla leswaku vanhu va nga swi voni leswi humelelaka endzeni ka yindlu. Switshamo swa le mafasitereni a swi endliwe hi maribye yo tiya.—Mintirho 20:9, 10.

Ku nga khathariseki tiyindlu leti a va tshama eka tona, Vakreste va lembe-xidzana ro sungula a va ri ni malwandla naswona a va ri ni moya wo amukela vaendzi. Valanguteri va miganga ni va swifundzha a swi nga va tikeli ku kuma ndhawu leyi va nga ta tshama eka yona kukondza va heta vutirheli bya vona emutini wolowo.—Matewu 10:11; Mintirho 16:14, 15.

‘Kaya Ra Simoni Na Andriya’ Yesu u amukeriwe hi mandla mambirhi “ekaya ra Simoni na Andriya.” (Marka 1:29-31) Swi nga ha endleka leswaku yindlu ya vaphasi lava va tinhlampfi a yi ri exikarhi ka tiyindlu leti a ti akiwe endhawini yin’we (6) naswona a yi nga ri ya xiyimo xa le henhla.

Minyangwa ya tiyindlu teto ni mafasitere a swi langutane ni ndhawu leyi nga rivala, leyi hakanyingi a ku endleriwa mintirho ya siku ni siku eka yona, leyi katsaka ku sweka, ku baka, ku sila mavele, ku hungasa ni ku dyela eka yona.

Tiyindlu ta xithezi xin’we ta le Kapernawume a ti akiwe hi maribye ya vholkheno. Switepisi swa hala handle leswi yaka ekamareni ra le henhla a swi semendheriwile kumbe swi hoxiwe tithayilisi naswona a swi ri ni mintsandza yo khomelela eka yona. (Marka 2:1-5) Hakanyingi fuloro ya le ndzeni a yi andlariwa mete.

Exikarhi ka tiyindlu leti a ku ri ni switarata ni swindledyana ekusuhi ni ribuwa ra Lwandle ra Galeliya. Muti wa Kapernawume a wu ri ndhawu ya kahle ya vaphasi va tinhlampfi lava a va tihanyisa hi ku phasa tinhlampfi elwandle.

“Hi Yindlu Ni Yindlu” Tiyindlu ta Vakreste va lembe-xidzana ro sungula a ti nga fani—tin’wana a ku ri kamara rin’we leri nga akiwa hi switina swa misava kasi letikulu ni ta xiyimo xa le henhla a ti akiwe hi maribye.

Tiyindlu teto a ku nga ri ndhawu yo tshama eka yona ntsena. A ti tlhela ti tirhiseriwa ku letela ndyangu hi tlhelo ra moya. Etindlwini teto, mindyangu a yi gandzela swin’we. Minkarhi yin’wana a yi hlangana swin’we etindlwini teto leswaku yi ta dyondza Matsalwa ni ku tiphina swin’we ni vapfumeri-kulobye. Leswi a va swi dyondza loko va ri emakaya ya vona, a va swi tirhisa loko va hetisisa ntirho wa vona wa nkoka wo chumayela ni ku dyondzisa “hi yindlu ni yindlu” etikweni hinkwaro ra Rhoma.—Mintirho 20:20.