Ndlela Leyi Vakreste Va Lembe-xidzana Ro Sungula A Va Hanya Ha Yona

“Lava Tirhaka Ekaya”

“Kuteloko va khoma ndlela yena a nghena eximutanini xin’wana. Hiloko wansati un’wana la vuriwaka Marta a n’wi amukela a va muendzi endlwini. Wansati loyi nakambe a a ri ni makwavo wa xisati la vuriwaka Mariya, loyi yena, a a tshame hansi hi le milengeni ya Hosi naswona a a ya emahlweni a yingisa rito ra yona. Marta, hi hala tlhelo, a a rivatiwa hi ku tirha mintirho yo tala. Kutani a tshinela ekusuhi a ku: ‘Hosi, xana a swi na mhaka eka wena leswi makwerhu a ndzi siyeke ndzi ri swanga ndzi tirha swin’wana? Hikokwalaho, n’wi byele leswaku a ta ndzi pfuna.’ Hosi yi hlamula yi ku eka yena: ‘Marta, Marta, u vilela ni ku karhatekela swilo swo tala. Kambe, i swilo switsongo leswi lavekaka, kumbe xin’we ntsena. Loko ku ri Mariya, u hlawule xiavelo lexinene, naswona a nge tekeriwi xona.’”—LUKA 10:38-42.

SWI LE rivaleni leswaku Marta a a ri wansati wa migingiriko. A swi kanakanisi leswaku vanhu vo tala a va vulavula kahle hi yena. Hi ku ya hi ndhavuko wa Vayuda va lembe-xidzana ro sungula, wansati la fanelekaka a a voniwa eka ndlela leyi a yi endlaka ha yona mintirho ya le kaya ni hikwalaho ka vuswikoti byakwe byo khathalela swilaveko swa ndyangu wakwe.

Nakambe vavasati va Vakreste va lembe-xidzana ro sungula a va khutaziwa ku va “lava tirhaka ekaya.” (Tito 2:5) Kambe a va ri ni lunghelo ni vutihlamuleri lebyi engetelekeke byo dyondzisa van’wana hi ripfumelo ra vona ra Vukreste. (Matewu 28:19, 20; Mintirho  2:18) Hi yihi yin’wana ya “mintirho yo tala” leyi vavasati va Vayuda va lembe-xidzana ro sungula a va ri na yona? Naswona hi yihi dyondzo leyi hi nga yi kumaka eka marito lawa Yesu a ma byeleke Mariya?

“Ku Tirha Mintirho Yo Tala” Wansati wa Muyuda a a pfuka hi mahlamba-ndlopfu. (Swivuriso 31:15) Endzhaku ko lunghiselela vandyangu wakwe mukapu, a a fanele a heleketa vana vakwe va majaha exikolweni xa varhabi. Vana vakwe va vanhwanyana a va sala ekaya va dyondzisiwa mintirho leyi nga ta va pfuna leswaku va va vavasati lava fanelekaka.

Manana ni vana vakwe va vanhwanyana a va sungula siku hi ku endla mintirho leyi tolovelekeke ya le kaya, a va chela mafurha etimbonini (1), va kukula (2) ni ku senga timbuti leti a va tifuwile (3). Endzhaku ka sweswo, a va endla xinkwa lexi nga ta dyiwa hi siku rero. Vana va vanhwanyana a va ta rhanga hi ku sefa mapa (4) kutani endzhaku ka sweswo va sila mavele (5). Manana a a teka mapa a ma hlanganisa ni mati ni comela. A a ta pfuva mbila (6) kutani a yi tshika yi sala yi kukumuka loko yena a ya emahlweni ni mintirho yin’wana ya le kaya. Hi hala tlhelo, vana va vanhwanyana a va wungula ntswamba wa mbuti lowu ku nga ta endliwa chizi ha wona (7).

Loko va heta ku endla sweswo, manana ni vana vakwe va vanhwanyana a va ya endhawini ya vuxaviselo ya le kusuhi. Loko manana a ri kwalaho, a a twa nun’hwelo wa swinyunyeteri swo hambana-hambana, pongo ra swifuwo ni ra vaxavi lava vutisaka ntsengo wa swilo leswi xavisiwaka naswona a a xava swakudya leswi nga ta dyiwa siku rero (8). Swi nga ha endleka leswaku matsavu lama ha ku khiwaka ni nhlampfi leyi omisiweke a swi tshama swi ri kona eswakudyeni swa vona. Loko wansati wa kona a ri Mukreste, a a ta bula ni van’wana hi ripfumelo rakwe loko a ri endhawini ya vuxaviselo.—Mintirho 17:17.

Manana la nga Mukreste a a ta tirhisa nkarhi wolowo wa ku ya emakete ni loko a vuya ku dyondzisa vana vakwe milawu ya Matsalwa nileswaku va yi rhandza. (Deteronoma 6:6, 7) A a ta tlhela a va dyondzisa ndlela yo va vaxavi lava nga ni vutshila.—Swivuriso 31:14, 18.

Ntirho wun’wana lowu vavasati a va wu endla siku ni siku a ku ri ku ya exihlobyeni (9). Laha a va fika va ka mati ya ndyangu hinkwawo, kumbexana va tlhela va tibulela ni vavasati van’wana lava na vona va nga ta eku keni ka mati. Loko va tlhelela ekaya, manana ni vana vakwe va vanhwanyana a va fika va sungula ku baka. A va rhanga hi ku andlala mbila epanini kutani va yi hoxa exitofini lexi ana se xi hisaka (10) lexi hakanyingi a xi ri hala handle. Loko va ri karhi va tiphina hi nun’hwelo wa xinkwa swin’we ni mabulo, a va xi languta loko xi ri karhi xi wupfa.

Endzhaku ka sweswo a va ya enambyeni wa le kusuhi leswaku va ya hlantswa swiambalo (11). Vavasati a va rhanga hi ku hlantswa swiambalo hi munyu wa photheziyamu, ku nga xisibi lexi endliweke hi nkuma wa swimilana swo karhi. Endzhaku ko basisa swiambalo ni ku swi kama,  vavasati a va swi aneka eswihlahleni ni le maribyeni leswaku swi oma.

Loko se va vuyile ni swiambalo, manana ni vana vakwe va vanhwanyana a va fika va tshama eka guma leri nga ematlhelo ka lwangu leswaku va rhunga (12) swiambalo leswi nga handzuka va nga si swi veka laha swi tshamaka kona. Endzhaku ka sweswo, vanhwanyana a va ta dyondzisiwa ku rhunga (13). Loko va heta sweswo, se a ku ri nkarhi wa leswaku vavasati va sungula ku sweka swakudya swa ni madyambu (14). Vanhu vo tala a va ri ni malwandla, kutani loko ndyangu wu lunghiselela swakudya swa wona leswi katsaka xinkwa, matsavu, chizi, nhlampfi leyi omisiweke ni mati yo titimela, a wu endla swo tala leswaku wu ta kota ku fihluta ni vaendzi.

Loko vana va lunghekela ku ya eku etleleni nimadyambu, a va totiwa mafurha ematsolweni. Kutani vatswari a va tirhisa rivoni leswaku va hlayela vana va vona switori leswi humaka eMatsalweni va tlhela va khongela na vona. Loko wanuna a titwa a tshamisekile ekaya, a a ta va ni xivangelo lexinene xo vula marito lama tolovelekeke lama nge: “A nga kumiwa hi mani nsati la fanelekaka? Ntikelo wakwe wu wu tlula ekule wa tikorala.”—Swivuriso 31:10.

Ku Hlawula “Xiavelo Lexinene” A swi kanakanisi leswaku vavasati lava nga Vakreste va lembe-xidzana ro sungula a va ri ni “mintirho yo tala” leyi a yi endla leswaku va tshama va khomekile. (Luka 10:40) Hilaha ku fanaka, vavasati va namuntlha, ngopfu-ngopfu vamanana, va tshama va khomekile. Swilo leswi nga kona swa manguva lawa swi olovise mintirho yin’wana leyi endliwaka ekaya. Kambe vamanana vo tala swiyimo swa vona swi koxa leswaku va boheka ku khathalela mindyangu ya vona hi hala tlhelo va ri karhi va tirha mintirho yo tihanyisa.

Ku nga khathariseki mintlhontlho leyi va langutanaka na yona, namuntlha vavasati vo tala lava nga Vakreste va landzela xikombiso xa Mariya, loyi ku vulavuriweke ha yena eku sunguleni ka xihloko lexi. Va rhangisa swilo swa moya. (Matewu 5:3) Va yi khathalela kahle mindyangu ya vona, hilaha Matsalwa ma va khutazaka hakona. (Swivuriso 31:11-31) Kambe va tlhela va landzela nawu lowu Yesu a wu byeleke Marta. Tanihi wansati wa moya, Marta u xi tekele enhlokweni xitsundzuxo xa rirhandzu lexi a xi kumeke. Vavasati lava nga Vakreste a va pfumeli leswaku mintirho ya vona ya le kaya yi va sivela ku dyondza hi Xikwembu (15) kumbe ku vulavula ni van’wana hi ripfumelo ra vona. (Matewu 24:14; Vaheveru 10:24, 25) Xisweswo va hlawula “xiavelo lexinene.” (Luka 10:42) Sweswo swi endla leswaku va rhandziwa hi Xikwembu, hi Kreste ni hi mindyangu ya vona.—Swivuriso 18:22.