Leswi Hi Nga Swi Dyondzaka Eka Yesu

Malunghana Ni Vugandzeri Bya Ntiyiso

Xana Xikwembu xi amukela vugandzeri hinkwabyo?

▪ Yesu a a va twela-vusiwana vanhu lava a va kanganyisiwe hi vukhongeri bya mavunwa. U lemukise hi “vaprofeta va mavunwa lava taka va ambale nguvu ya nyimpfu, kambe endzeni va ri timhisi leti kakatlulaka.” (Matewu 7:15) Xana u swi xiyile leswaku vanhu van’wana va tiendla vanhu va vukhongeri leswaku va ta endla swilo swo biha?

Loko Yesu a khongela eka Xikwembu u te: “Rito ra wena i ntiyiso.” (Yohane 17:17) Kutani Xikwembu a xi byi amukeli vugandzeri lebyi lwisanaka ni leswi Bibele yi swi vulaka. Loko Yesu a vulavula ni vakanganyisi van’wana va vukhongeri, u va byele leswaku Xikwembu a xi ma kongomisa eka vona marito lama nge: “Va tama va ndzi gandzela swa hava, hikuva va dyondzisa swileriso swa vanhu va swi endla tidyondzo leti nga enawini.”—Matewu 15:9.

Xana byi kona vugandzeri bya ntiyiso?

▪ Loko Yesu a hlangana ni wansati wa Musamariya loyi a a kanganyisiwe hi vugandzeri bya mavunwa, u n’wi byele marito lawa: “Mi gandzela lexi mi nga xi tiviki . . . Vagandzeri va ntiyiso va . . . ta gandzela Tatana hi moya ni ntiyiso, hikuva, hakunene, Tatana u lava lavo tano leswaku va n’wi gandzela.” (Yohane 4:22, 23) Swi le rivaleni leswaku vugandzeri bya ntiyiso byi kona.

Yesu u te: “A ndzi endli nchumu hi ku tisungulela; kambe ndzi vulavula swilo leswi hilaha Tatana a ndzi dyondziseke hakona.” Kutani Yesu a swi tiva leswaku vugandzeri lebyi a a dyondzisa ha byona a ku ri byona ntsena bya ntiyiso. (Yohane 8:28) Hikokwalaho u te: “Hi mina ndlela ni ntiyiso ni vutomi. A nga kona loyi a taka eka Tatana handle ko ta ha mina.” (Yohane 14:6) Leswi vagandzeri va ntiyiso va tshinelaka eka Tatana hi vun’we va fanele va va ni vun’we evugandzerini byin’we bya ntiyiso.

 U nga va tiva njhani vagandzeri va ntiyiso?

▪ Mukreste i munhu loyi a landzelaka Yesu Kreste. Xiya tindlela ta mune leti valandzeri va Yesu va vonakaka ha tona leswaku va tekelela xikombiso xakwe.

1. Loko Yesu Kreste a khongela Yehovha u te: “Ndzi va tivise vito ra wena.” (Yohane 17:26) Vakreste va ntiyiso na vona va ha endla hilaha ku fanaka.

2. Yesu a a chumayela hi Mfumo wa Yehovha naswona u rhume vadyondzisiwa vakwe leswaku na vona va endla hilaha ku fanaka hi ku va va chumayela hi yindlu ni yindlu. U te: “Emutini kumbe eximutanini xin’wana ni xin’wana lexi mi nga ta nghena eka xona, lavisisani loyi swi n’wi fanelaka.” Endzhakunyana ka sweswo u byele valandzeri vakwe a ku: “Hikokwalaho fambani mi ya endla vanhu va matiko hinkwawo va va vadyondzisiwa.” (Matewu 10:7, 11; 28:19) Namuntlha u nga va vona hi ku olova Vakreste va ntiyiso hikuva va hambeta va endla ntirho wolowo.

3. Yesu u arile ku nghenelela eka swa tipolitiki. Xisweswo, u vule marito lawa malunghana ni valandzeri vakwe: ‘Vona a hi xiphemu xa misava, tanihi leswi na mina ndzi nga riki xiphemu xa misava.’ (Yohane 17:14) Vagandzeri va ntiyiso va fanele va tiviwa hi ku ka va nga hlanganyeli eka swa tipolitiki.

4. Yesu a a rhandza vanhu van’wana handle ka vutianakanyi. U te: “Hinkwavo va ta tiva leswaku mi vadyondzisiwa va mina, loko mi rhandzana.” (Yohane 13:35) Vakreste va ntiyiso va khathalelana naswona a va katseki etinyimpini.

Vugandzeri bya ntiyiso byi nga ku vuyerisa njhani?

▪ Leswaku u va evugandzerini bya ntiyiso u fanele u tiva Yehovha. Loko u nghenisa vutivi hi Xikwembu swi ta endla leswaku u hanya hi ndlela leyinene naswona u ta xi rhandza hi mbilu ya wena hinkwayo. Yehovha u va tshembisa vutomi lebyi nga heriki lava n’wi rhandzaka. Yesu u te: “Leswi swi vula vutomi lebyi nga heriki, ku nghenisa ka vona vutivi ha wena, Xikwembu xi ri xin’we xa ntiyiso.”—Yohane 17:3.

Leswaku u kuma rungula leri engetelekeke vona ndzima 15 ya buku leyi nge Xana Bibele Yi Dyondzisa Yini Hakunene? yi kandziyisiwe hi Timbhoni ta Yehovha.

[Xifaniso lexi nga eka tluka 16]

“Tivoneleni vaprofeta va mavunwa lava taka va ambale nguvu ya nyimpfu, kambe endzeni va ri timhisi leti kakatlulaka.”—Matewu 7:15