RAVEKA i vito leri tolovelekeke etindhawini to tala namuntlha. Xana u tiva un’wana loyi a nga ni vito rero?— * Raveka a ri munhu wa nkoka ebukwini leyi tivekaka swinene emisaveni hinkwayo, ku nga Bibele. I yini leswi u swi tivaka ha yena?— Hi fanele hi swi navela ku dyondza hi Raveka hikuva xikombiso xakwe xi nga hi pfuna ku tirhela Xikwembu xa ntiyiso, ku nga Yehovha.

Raveka i wansati wa vumbirhi loyi Bibele yi vulavulaka ha yena loyi a veke mugandzeri wa Yehovha. Xana wa swi tiva leswaku a ku ri mani wansati wo sungula loyi Bibele yi vulaka leswaku a a gandzela Yehovha?— A ku ri Sara, nsati wa Abrahama. Loko se a dyuharile, Sara u ve mana wa Isaka— loyi o va swakwe. Sweswi a hi voneni ndlela leyi Raveka a a tiyimisele ha yona ku tsakisa Yehovha ni ndlela leyi a hlanganeke na Isaka ha yona.

Ku hundze malembe yo tlula 60 ku sukela loko Xikwembu xi rhumele Abrahama na Sara etikweni ra Kanana va suka eHarani. Loko Abrahama na Sara va dyuharile, Xikwembu xi va tshembise leswaku va ta va ni n’wana loyi va nga ta n’wi thya vito ra Isaka. Na wena u nga yi vona ndlela leyi vatswari vakwe a va n’wi rhandza ha yona. Sara u fe a ri ni malembe ya 127, hi nkarhi wolowo n’wana wakwe Isaka se a ri wanuna naswona u twe ku vava swinene hikwalaho ko feriwa hi mana wakwe. Abrahama a a nga swi lavi leswaku Isaka a teka nsati wa le Kanana hikuva vanhu va kwalaho a va nga n’wi gandzeli Yehovha. U rhumele nandza wakwe Eliyezere leswaku a ya lavela Isaka nsati exikarhi ka maxaka ya Abrahama eHarani, laha a ku ri mpfhuka wa tikhilomitara to tlula 800!—Genesa 12:4, 5; 15:2; 17:17, 19; 23:1.

 Eliyezere ni malandza man’wana ya Abrahama va fike eHarani va ri ni tikamela ta khume va rhwale timbuva ni tinyiko ta mutekiwa. Va fike va yima exihlobyeni hikuva Eliyezere a swi tiva leswaku nindzhenga vanhu va ta va ta kela swifuwo ni mindyangu ya vona mati. Loko a ri kwalaho, Eliyezere u khongele leswaku loyi a faneleke a n’wi hlawula leswaku a va nsati wa Isaka u fanele loko a n’wi kombela mati a angula hi ku vula marito lawa: “Nwana, naswona ndzi ta tlhela ndzi nwisa ni tikamela ta wena.”

Leswi hi swona leswi endlekeke! Raveka loyi a ri nhwanyana “loyi a a koka-mahlo swinene” u fikile exihlobyeni. Loko Eliyezere a n’wi kombela mati, Raveka u te: “Ndzi ta kela ni tikamela ta wena.” Loko a ri karhi “a ya ka mati exihlobyeni hi ku phindha-phindha,” Eliyezere a n’wi langute “hi ku hlamala.” Ringeta ku vona xiendlakalo xexo hi mahlo ya mianakanyo! Leswaku a nwisa tikamela teto ta khume kukondza ti kolwa, Raveka a a fanele a ti kela mati yo ringana tilitara ta 1 000!

Eliyezere u nyike Raveka tinyiko to saseka naswona u tive leswaku a ri n’wana wa Bethuwele, xaka ra Abrahama. Raveka u rhambe Eliyezere ni vanghana vakwe ekaya ka vona leswaku va ya ‘etlela kona vusiku byebyo.’ Hiloko a rhanga a tsutsuma a ya byela vandyangu wakwe hi ta vaendzi lava Abrahama a va rhumeke ku suka eKanana leswaku va ta vonana na vona.

Loko Labani makwavo wa Raveka a vona tinyiko to durha leti nyikiweke makwavo wakwe ni ku tiva leswaku Eliyezere a ri mani, u va rhambile leswaku va nghena ekaya ka vona. Kambe Eliyezere u te: “A ndzi nge dyi ndzi nga si vulavula timhaka ta mina.” Kutani u hlamusele leswi Abrahama a n’wi rhume swona. Sweswo swi tsakise Bethuwele ni nsati wakwe swin’we na Labani, kutani va pfumela leswaku Raveka a va nsati wa Isaka.

Loko Eliyezere ni lava a ri na vona va hete ku dya, va etlele kwalaho. Hi mixo lowu landzelaka Eliyezere u te: “Ndzi tshikeni ndzi ya eka n’wini wanga.” Kambe mana wa Raveka swin’we ni buti wakwe a va lava leswaku va tshama “kwalomu ka masiku ya khume.” Loko Raveka a vutisiwile loko a ta namba a famba na vona u hlamule a ku: “Ndzi tiyimiserile ku famba.” U nambe a famba na Eliyezere. Loko va fika, u ve nsati wa Isaka.—Genesa 24:1-58, 67.

Xana u ehleketa leswaku Raveka swi n’wi oloverile ku siya vandyangu ni vanghana vakwe a ya etikweni ra le kule swinene, laha a swi tiva leswaku swi nga ha endleka a nga ha tlheli a va vona?— A swi n’wi olovelanga. Hambiswiritano, Raveka u katekisiwile hikwalaho ka leswi a a tiyimisele ku endla leswi tsakisaka Yehovha. U ve exikarhi ka rixaka leri Yesu Kreste, Muponisi wa hina a velekiweke eka rona. Ku fana na yena, na hina hi ta katekisiwa loko hi tiyimisela ku endla leswi tsakisaka Yehovha.—Varhoma 9:7-10.