Leswi Yesu A Swi Dyondziseke Hi Yena N’wini

“Yesu a a nga kanakani ku vula leswaku hi yena mani, u huma kwihi, ha yini a te laha misaveni ni leswi vumundzuku byi n’wi khomeleke swona.”—AUTHOR HERBERT LOCKYER.

EMAHLWENI ko va hi amukela leswi Yesu a swi dyondziseke ni ku va ni ripfumelo eka swona, ku ni leswi hi faneleke hi swi tiva ha yena. Xana a a ri mani? A a huma kwihi? A ku ri xihi xikongomelo xa vutomi byakwe? Eka tibuku ta Tievhangeli leti katsaka Matewu, Marka, Luka na Yohane, hi ta kuma tinhlamulo ta swivutiso leswi, eka leswi Yesu a nga swi vula.

U hanye etilweni a nga si ta laha misaveni Yesu u tshame a ku: “Abrahama a nga si va kona, mina a ndzi ri kona.” (Yohane 8:58) Abrahama u hanye emalembeni ya kwalomu ka 2 000 Yesu a nga si velekiwa. Kambe a a ri kona emahlweni ko va kokwa wa hina Abrahama loyi a a tshembekile a velekiwa. Xana Yesu a a hanya kwihi hi nkarhi wolowo? U te: “Ndzi xike hi le tilweni.”—Yohane 6:38.

N’wana wa Xikwembu Yehovha u ni vana vo tala lava nga tintsumi. Kambe Yesu u hlawulekile eka vona hinkwavo. U n’wi vitana “N’wana wa Xikwembu la tswariweke a ri swakwe.” (Yohane 3:18) Xiga lexi xi vula leswaku Yesu hi yena ntsena la vumbiweke hi Xikwembu hi ku kongoma. N’wana loyi, la tswariweke a ri swakwe hi yena loyi Xikwembu xi nga n’wi tirhisa ku vumba swilo leswin’wana hinkwaswo.—Vakolosa 1:16.

“N’wana wa munhu” Yesu u xi tirhise ko tala xiga lexi loko a vulavula hi yena n’wini. (Matewu 8:20) Kutani u swi veke erivaleni leswaku a a nga ri ntsumi leyi tihundzuleke munhu wa nyama kumbe munhu wa moya la tihundzuleke wa nyama. Kambe a a ri munhu wa xiviri. Hi ku tirhisa moya lowo kwetsima, Xikwembu xi hundzisele vutomi bya N’wana wa xona ku suka ematilweni a ta emisaveni hi ku endla leswaku wanhwana Mariya a tika. Leswi hi swona leswi nga endla leswaku Yesu a velekiwa a hetisekile naswona a nga ri na xidyoho.—Matewu 1:18; Luka 1:35; Yohane 8:46.

Mesiya la tshembisiweke Wansati wa Musamariya u tshame a byela Yesu a ku: “Ndza swi tiva leswaku Mesiya wa ta.” Hiloko Yesu a n’wi hlamula a ku: “Mina loyi a vulavulaka na wena ndzi yena.” (Yohane 4:25, 26) Rito leri nge “Mesiya” ni leri nge “Kreste” ma vula “Mutotiwa.” Yesu a a totiwe hi Xikwembu kumbe ku hlawuriwa hi xona leswaku a endla ntirho wo hlawuleka eku hetisiseni ka switshembiso swa xona.

Xivangelo-nkulu xo va a te emisaveni Yesu u tshame a ku: “Ndzi fanele ku vula mahungu lamanene ya mfumo wa Xikwembu, hikuva hi swona leswi ndzi rhumeriweke swona.” (Luka 4:43) Hambileswi a endleleke vanhu swilo swo tala leswinene, lexi a a tele xona a ku ri ku chumayela hi Mfumo wa Xikwembu. Leswi a swi dyondziseke hi Mfumo wolowo swi ta hlamuseriwa eka swihloko leswi landzelaka.

Yesu a a nga ri munhu la tolovelekeke. * Hilaha hi nga ta swi vona hakona, vutomi lebyi a nga byi hanya etilweni byi swi khumbe swinene leswi a nga swi vula loko a ri laha misaveni. Kutani a hi fanelanga hi hlamala leswi rungula leri a ri chumayeleke ri hundzuleke vutomi bya timiliyoni ta vanhu emisaveni hinkwayo.

[Nhlamuselo ya le hansi]