Bibele Yi Hundzula Vutomi Bya Vanhu

HI WAHI magoza ya xiviri lawa khale ka xirho xa ntlawa wa tinsula-voya lexi a xi godzomberiwe hi mbangi xi nga ma teka leswaku xi hlula mikhuva leyi yo biha? I yini lexi nga pfuna munhu loyi a a rhandza vuyimbeleri lebyi nga riki byinene leswaku a tsemeta misisi yo leha naswona a hambana ni vuyimbeleri lebyi a a byi rhandza? I yini lexi susumeteleke wanuna un’wana loyi khale ka yena a nga lavi ku twa nchumu hi vukhongeri naswona a a nga yi xiximi hulumendhe leswaku a sungula ntirho wo chumayela? Twana leswi vanhu lava va swi vulaka.

“Ndzi Hlule Mukhuva Lowu A Wu Ndzi Godzomberile.”—PETER KAUSANGA

MALEMBE: 32

TIKO: NAMIBIA

MATIMU YAKWE: XIRHO XA NTLAWA WA TINSULA-VOYA LEXI A XI GODZOMBERIWE HI MBANGI

VUTOMI BYA MINA: Ndzi kulele eKehemu, ku nga ndhawu leyi nga xiphemu xa doroba ra Rundu. Vanhu va kona va tihanyisa hi ku xavisa n’wahuva, tihunyi ni makala.

Mana wa mina u fe loko ndzi ri ni malembe mambirhi kutani ndzi kurisiwe hi kokwana. A hi nga ri na swilo swo tala leswi vonakaka. Ndzi sungule ku delela hikwalaho ka ntshikilelo wa tintangha, kutani ndzi joyina ntlawa wa tinsula-voya exikolweni. Leswi swi endle leswaku hi sungula ku lwa ni vanhu, hi va chuhisa, hi yiva, hi ngungumerisa tidayimani, hi nwa byala ku tlula mpimo ni ku tirhisa swidzidziharisi hi ndlela yo biha. Ndzi tshame ndzi khomiwa kambirhi hikwalaho ka vukhamba ni vukanganyisi.

Loko ndzi ri eka gredi 10, ndzi tshike xikolo naswona ndzi hetelele ndzi rhurhe laha ndzi nga kulela kona leswaku ndzi ta hambana ni ntlawa wolowo wa tinsula-voya. A ndzi tibyela leswaku ndzi lava ku sungula vutomi lebyintshwa. Kambe mbangi a ya ha ndzi godzomberile. Minkarhi yin’wana a ndzi famba tikhilomitara to hlaya leswaku ndzi ya xava mbangi.

NDLELA LEYI BIBELE YI HUNDZULEKE VUTOMI BYA MINA HA YONA: Eku sunguleni ka 1999, ndzi hlangane ni Timbhoni ta Yehovha exitarateni naswona a ti fambisela vanhu minkandziyiso ya tona. Ti vulavule na mina hi ndlela ya xichavo naswona sweswo swi ndzi khumbile. Rungula leri ndzi nga ri hlaya eka nkandziyiso lowu ti ndzi nyikeke wona ri ndzi tiyisekisile leswaku ndzi kume vukhongeri bya ntiyiso. Loko ndzi sungula ku dyondza Bibele, ndzi xiye leswaku ndzi fanele ndzi cinca vutomi bya mina loko ndzi lava ku tsakisa Yehovha Xikwembu.

Kutani ndzi veke siku leri ha rona a ndzi ta tshika ku dzaha naswona ndzi papalate nchumu wun’wana ni wun’wana lowu nga endlaka leswaku ndzi dzaha. Ndzi tlhele ndzi byela vanghana va mina leswaku  va nga ha ndzi nyiki fole naswona va nga ha dzahi ekusuhi na mina. Nilokoswiritano, swilo a swi fambanga hilaha a ndzi swi lave hakona. Kambirhi ndzi tlhele ndzi wela entlhan’wini wa ku dzaha fole ni mbangi. Kambe leswi a swi ndzi hetanga matimba. A ndzi tshama ndzi ri karhi ndzi tsundzuka marito lama nga eka Swivuriso 24:16 lama nge: “Lowo lulama a nga ha wa ka nkombo, kunene u ta pfuka.” Eku heteleleni ndzi swi kotile ku hlula mukhuva lowu a wu ndzi godzomberile.

Loko ndzi ya ndzi dyondza hi Yehovha, a ndzi ya ndzi lava ku n’wi endla munghana wa mina lonkulu. Ndzimana yin’wana ya Bibele leyi ndzi khumbeke mbilu i Pisalema 27:10 leyi nge: “Loko tatana na manana vo ndzi tshika, Yehovha u ta ndzi teka.” Loko ndzi ya ndzi dzika swinene eku kambisiseni ka mina Bibele, ndzi vone ntiyiso wa marito wolawo. Ndzi twe onge Yehovha i Tata wa mina wa xiviri la ndzi khathalelaka.

Ndzi tlhele ndzi sungula ku tihlanganisa ni Timbhoni ta Yehovha. Loko ndzi ri na tona, a ndzi vona vunghana bya xiviri ni rirhandzu ra xiviri. A ndzi nga si tshama ndzi swi vona sweswo.

NDLELA LEYI NDZI VUYERIWEKE HA YONA: Hikwalaho ka mpfuno wa Yehovha ni Timbhoni, ndzi antswise ndlela leyi a ndzi ambala ni ku tilunghisa ha yona, mahanyelo ni mavulavulelo ya mina. Ndzi ehleketa leswaku vutomi bya mina byi cince hi ndlela leyi xivungwana xo biha xi cincaka ha yona xi va phaphatana ro saseka. Sweswi maxaka ya mina ma tibuma hi ku cinca loku ndzi ku endleke naswona se ma ndzi tshemba. Se ndzi tekile naswona ndzi tikarhatela ku va nuna la rhandzekaka eka nsati wanga ni ku va tatana la khathalelaka vana vakwe.

“Se Ndzi Hanya Vutomi Lebyi Nga Ni Xikongomelo.”—MARCOS PAULO DE SOUSA

MALEMBE: 29

TIKO: BRAZIL

MATIMU YAKWE: MUTLANGI WA VUYIMBELERI LEBYI NGA RIKI BYINENE

VUTOMI BYA MINA: Ndyangu wa ka hina a wu tshama edorobeni ra Jaguariuna, le São Paulo. Vatswari va mina a va ri Makhatoliki, kutani loko ndza ha ri xihlangi a ndzi tirha ealitarini. Leswi swi endle leswaku vana va xikolo va ndzi vitana Mufundhisi. Kutani loko ndzi ri ni malembe ya 15, ndzi sungule ku rhandza vuyimbeleri lebyi nga riki byinene bya rhok. Ndzi sungule ku tihlanganisa ni swiyimbeleri swa rhok ndzi tlhela ndzi fuwa misisi. Kutani hi 1996, Tatana u ndzi pfunile leswaku ndzi xava swichayachayana swa mina swo sungula swo yimbelela ha swona.

Hi 1998, ndzi joyine ntlawa lowu tlangaka swichayachayana swa rhok. Vuyimbeleri lebyi a byi tlangiwa a byi ri ni madzolonga ni nhlambha. A ndzi ma seketela madzolonga. Vuyimbeleri lebyi byi khumbe ndlela leyi ndzi ehleketaka ha yona, mahanyelo ya mina ni ndlela leyi ndzi swi langutaka ha yona swilo. Kutani ndzi ye ndzi tinyiketela swinene eka swilo leswi nga riki swinene naswona a ndzi rhandza madzolonga.

NDLELA LEYI BIBELE YI HUNDZULEKE VUTOMI BYA MINA HA YONA: Ndzi hlangane ni Timbhoni ta Yehovha ro sungula hi 1999. Ti kombele ku dyondza Bibele na mina hiloko ndzi pfumela, hambileswi a ndzo tipfumelela ntsena. Kambe leswi a ndzi swi dyondza eBibeleni swi cince ndlela leyi a ndzi byi languta ha yona vutomi.

Vanhu a va ndzi vitana “jaha ra misisi yo leha,” “mutlangi wa rhok wa ndhuma” kumbe “mutlangi wa ndhuma wa swigubu.” Kambe ndzi xiye leswaku  ku ya emahlweni ni vuyimbeleri lebyi swi endla leswaku ndzi va ni vutianakanyi, ndzi phikizana ni van’wana naswona leswi a swi nga ndzi enerisi. Ndzi tlhele ndzi xiya leswaku vayimbeleri lava a ndzi va xixima a va nga ri na xikongomelo evuton’wini. Hakatsongo-tsongo ndzi sungule ku swi xiya leswaku loko ndzi lava ku tsakisa Yehovha Xikwembu ndzi fanele ndzi tshika vuyimbeleri lebyi, lebyi khutazaka mahanyelo yo biha swin’we ni ku gandzela swikwembu swa hava.

A ndzi byi rhandza vuyimbeleri lebyi swin’we ni misisi ya mina yo leha. A ndzi tivutisa loko ndzi ta swi kota ku hanya handle ka swona. Hi hala tlhelo, a ndzi ri munhu wa madzolonga ni ku hatla ndzi hlundzuka, kambe a ndzi swi tiva leswaku ndzi fanele ndzi dyondza ku swi lawula. Hambiswiritano, hikwalaho ko dyondza Bibele, ndzi sungule ku n’wi rhandza swinene Yehovha. Ku dyondza hi rirhandzu rakwe, ku lehisa kakwe mbilu ni tintswalo takwe swi endle leswaku ndzi n’wi rhandza swinene. Ndzi khongele Yehovha ndzi kombela leswaku a ndzi pfuna ndzi cinca naswona u ndzi pfunile. Ndzi vone ntiyiso wa marito lama nga eka Vaheveru 4:12 lama nge: “Rito ra Xikwembu ra hanya naswona ri ni matimba.”

Loko ndzi sungula ku ti hlanganisa ni Timbhoni ta Yehovha, ndzi xiye leswaku ti hambanile ni vanhu van’wana. A ku ri ro sungula eka mina ku vona rirhandzu ra xiviri. Rirhandzu rero ndzi tlhele ndzi ri vona emintsombanweni leyikulu leyi Timbhoni ti vaka na yona. Ndzi hlamarisiwe hi ndlela leyi vatirhi va ku tirhandzela lava hisekaka va tirhaka ha yona ku endla leswaku hinkwavo lava nga kona va vuyeriwa.

NDLELA LEYI NDZI VUYERIWEKE HA YONA: Hikwalaho ko pfuniwa hi Yehovha, sweswi ndza swi kota ku lawula ku hlundzuka ka mina. A ndza ha ri na vutianakanyi naswona a ndza ha tikurisi.

Swi ndzi tekele nkarhi wo leha ku va ndzi rivala hi vutomi bya mina bya khale, kambe sweswi a ndza ha byi tsundzuki nikatsongo. Sweswi se ndzi hanya vutomi lebyi nga ni xikongomelo. Swa ndzi tsakisa leswi ndzi dyondzaka ku rhandza vanhu van’wana naswona ndzi khathalaka ha vona.

“Ndza Tiphina Hileswi Ndzi Khathalaka Hi Vanhu Van’wana.”—GEOFFREY NOBLE

MALEMBE: 59

TIKO: UNITED STATES

MATIMU YAKWE: A NDZI LAVI KU TWA NCHUMU HI VUKHONGERI NASWONA A NDZI NGA YI XIXIMI HULUMENDHE

VUTOMI BYA MINA: Ndzi kulele eIpswich, le Massachusetts, ku nga ndhawu leyi nga eribuweni ra lwandle naswona vanhu vo tala va tirhela kona. Loko ndzi kula ndzi rhurhele endhawini leyi nga ti tshamela yoxe le Vermont. Hilaha vanhu vo tala va le Amerika N’walungu va hanyaka hakona, na mina swin’we ni ntombhi ya mina a hi hanya vutomi byo olova. Laha a hi tshama kona a ku nga ri na gezi, kutani a hi kufumerisa yindlu ya hina ni ku sweka hi tihunyi leti a hi ti rhotela enhoveni. A hi ri ni xihambukelo xa le handle naswona mati ya le pompini a ma kala swinene. A hi sukele tiko leri nga ni swilo hinkwaswo naswona ndlela leyi a hi languteka ha yona a yi swi kombisa sweswo. Siku rin’wana  ndzi kale ndzi tibuma hileswaku se ndzi hete tin’hweti ta tsevu ndzi nga si kama misisi ya mina.

Hi nkarhi wolowo tiko ra United States a ri katseka eNyimpini ya le Vietnam. Leswi swi khumbe ndlela leyi a ndzi ri languta ha yona fambiselo ra hulumendhe. Ndzi vone vukanganyisi byo tala eka hulumendhe ni le ka vukhongeri. A ndzi vona onge hulumendhe ni vukhongeri a swi va pfuni ha nchumu vanhu naswona munhu un’wana ni un’wana u fanele a tiendlela xiboho xa leswi nga swinene ni leswi nga riki swinene. Kutani a ndzi vona onge a swi bihanga ku va ndzi yiva nchumu wun’wana ni wun’wana lowu ndzi wu lavaka.

NDLELA LEYI BIBELE YI HUNDZULEKE VUTOMI BYA MINA HA YONA: Mina ni ntombhi ya mina hi sungule ku dyondza Bibele, kambe a hi nga twisisi nchumu. A ndzi tirhisa swidzidziharisi kambe a ndzi ringeta ku swi tshika. Ntombhi ya mina a yi lava leswaku hi cata naswona hi va ni vana. Hi nkarhi wolowo, wansati un’wana la nga Mbhoni ya Yehovha u hi endzerile kutani a sungula ku dyondza Bibele na hina.

Swi nga si ya kwihi, ndzi tshike mikhuva ya mina yo biha; kambe a swi ndzi tikela ku cinca ndlela leyi ndzi byi langutaka ha yona vulawuri bya hulumendhe. Nchumu wun’wana ni wun’wana lowu endliwaka a ndzi lava ku tiva vuxokoxoko bya wona. Loko ndzi kula a ku nga ri na loyi a ndzi sivela ku endla leswi ndzi swi lavaka, kutani ku hanya hi ku landzela milawu ya munhu wo karhi a swi ndzi tikela.

I khale ndzi tshemba leswaku ku ni Muvumbi, kambe a ndzi nga twisisi nchumu ha yena. Loko ndzi ya ndzi dyondza Bibele, ndzi sungule ku n’wi twisisa kahle Yehovha Xikwembu. Ndzi dyondze leswaku hinkwaswo leswi a swi languteleke eka mina u swi tsale ehansi. Milawu yakwe yi le rivaleni. Ndzi tlhele ndzi dyondza leswaku xikongomelo xakwe i ku endla misava yi va paradeyisi. (2 Petro 3:13) Mintiyiso leyi hinkwayo yi endle leswaku ndzi cinca vutomi bya mina leswaku ndzi ta n’wi gandzela kahle.

Lexi nga ndzi tsakisa no tlurisa i ku xiya leswaku Timbhoni ta Yehovha a ti hlanganyeli enyimpini. A ku nga ri na vukhongeri byin’wana lebyi a ndzi byi tiva lebyi landzelaka xileriso lexi xa le Bibeleni loko swi ta etimhakeni ta nyimpi.

A ndzi swi tiva leswaku loko ndzi lava ku tirhela Yehovha, ndzi fanele ndzi cinca ndlela leyi ndzi langutekaka ha yona. Eku sunguleni, a ndzi nga yi tolovelanga ndlela leyi Timbhoni ti ambalaka ha yona. Mina ni vanghana va mina a hi nga ri na swona swiambalo swo tanihi mahembe, maburuku lama xiximekaka kumbe tintangu. Hambi ku ri thayi a ndzi nga ri na yona! Ndzi tsemete misisi ya mina ndzi tlhela ndzi antswisa ndlela leyi ndzi langutekaka ha yona. Hambiswiritano, ndzi tsundzuka siku ro sungula leri ndzi nga ya entirhweni wo chumayela hi yindlu ni yindlu ha rona. Ndzi fike ndzi yima emahlweni ka fasitere hiloko ndzi vona ndlela leyi ndzi langutekaka ha yona. Kutani ndzi tivutise leswaku ‘I yini leswi ndzi nga swi endla?’ Eku heteleleni ndzi ye ndzi yi tolovela ndlela leyintshwa leyi a ndzi languteka ha yona.

NDLELA LEYI NDZI VUYERIWEKE HA YONA: Hi ku famba ka nkarhi ndzi cate ni ntombhi ya mina naswona ha ha tsakile evukatini bya hina. Havumbirhi bya hina hi kurise vana va hina vanharhu leswaku va rhandza Yehovha va tlhela va n’wi tirhela. Ndzi tlhele ndzi tiphina hi ku pfuna van’wana leswaku va dyondza mintiyiso ya le Bibeleni leyi nga ndzi pfuna leswaku ndzi cinca vutomi bya mina.

A ndzi tibuma hi ku tibyela leswaku a ndzi na mhaka nileswi vanhu van’wana va swi vulaka. Kambe sweswi ndza tiphina hileswi ndzi khathalaka hi vanhu van’wana ni ku va exikarhi ka vanhu lava khathalaka hi mina.

[Marito lama tshahiweke exihlokweni lama nga eka tluka 26]

“A ndzi famba tikhilomitara to hlaya leswaku ndzi ya xava mbangi”

[Marito lama tshahiweke exihlokweni lama nga eka tluka 28]

“Leswi a ndzi swi dyondza eBibeleni swi cince ndlela leyi a ndzi byi languta ha yona vutomi”

[Marito lama tshahiweke exihlokweni lama nga eka tluka 29]

“A ndzi nga yi tolovelanga ndlela leyi Timbhoni ti ambalaka ha yona”