Swivutiso Swa Vahlayi . . .

I Yini Holo Ya Mfumo?

▪ Holo ya Mfumo i yindlu leyi Timbhoni ta Yehovha ti gandzelaka eka yona. Emisaveni hinkwayo, ku ni Tiholo ta Mfumo ta makume ya magidi. Vhiki ni vhiki, mavandlha yo tlula 105 000 ya Timbhoni ta Yehovha ma hlangana eka tona.

Eka Holo yin’wana ni yin’wana ya Mfumo ku khomiwa minongonoko ya dyondzo ya Bibele swin’we ni tinkulumo. To tala ta tona ti ni xiteji naswona loyi a fambisaka minhlangano u yima eka xona. Hakanyingi ku ni switulu swa le xikarhi ka 100 na 300. Holo ya Mfumo yi nga ha tlhela yi va ni kamara rin’we kumbe ku tlula, hofisi ni layiburari leyitsongo leyi nga ni minkandziyiso leyi sekeriweke eBibeleni swin’we ni tibuku tin’wana leti xirho xin’wana ni xin’wana evandlheni xi nga ti tirhisaka ku endla ndzavisiso.

Hambiswiritano, eHolweni ya Mfumo a wu nge kumi swifaniso kumbe swilo swin’wana leswi nga kona etikerekeni ta Vujagana. Ku hava tialitari, swifaniso kumbe swihambano. Ha yini? Timbhoni ta Yehovha ti pfumela leswaku ku tirhisa swilo swo tano swi lwisana ni xileriso lexi nga eBibeleni xo va hi “[balekela] ku gandzela swifaniso swa hava.” (1 Vakorinto 10:14; Yohane 4:24) Tikereke to tala ni titempele ti khavisiwe ku tlula mpimo. Ku hambana na tona, nchumu wun’wana ni wun’wana lowu nga eTiholweni ta Mfumo wu ni xikongomelo naswona a ti khavisiwanga ku tlula mpimo. Lexi nga xa nkoka hileswi dyondzisiwaka endzeni ka muako wolowo ku nga ri ndlela leyi wu langutekaka ha yona.

Ha yini holo leyi yi vitaniwa Holo ya Mfumo? Minhlangano leyi vaka kona eHolweni ya Mfumo yi dzike ngopfu eka tidyondzo ta Bibele ni le ka rungula ra “mfumo wa Xikwembu,” lowu a ku ri nhloko-mhaka ya vutirheli bya Yesu. (Luka 4:43) Kutani vito leri nge Holo ya Mfumo, leri holo leyi yi thyiweke rona hi va-1930, ri hlamusela xikongomelo xa miako leyi, ku nga ku yisa vugandzeri bya ntiyiso emahlweni ni ku tirha tanihi ndhawu leyi Timbhoni ti leteriwaka eka yona leswaku ti hetisisa ntirho wo chumayela ‘mahungu lamanene ya mfumo.’ (Matewu 24:14) Xisweswo, Tiholo ta Mfumo a ti tirhiseriwi minkhuvo kumbe timhaka ta mabindzu. Mali yo aka, yo khathalela holo ni yo hakelela swilaveko swin’wana yi huma eka minyikelo ya ku tirhandzela. A ku na puleti ya munyikelo leyi hundzisiwaka. Ematshan’weni ya sweswo, ku ni bokisi leri vekiwaka endhawini yin’we leswaku un’wana ni un’wana loyi a tsakelaka ku nyikela, a kota ku nyikela eka rona.

Tiholo ta Mfumo ti tirhiseriwa xikongomelo xin’we emisaveni hinkwayo, kambe a ti ringani naswona a ti fani. Maakelo ya kona ma hambana hi ku ya hi switirhisiwa swo aka leswi nga endhawini yoleyo, xiyimo xa maxelo ni hi ku ya hi xiyimo xa timali xa Timbhoni ta Yehovha ta le ndhawini yoleyo. Miako yin’wana yi akiwe hi switina, mapulanga ni maribye. Tin’wana ti nga ha akiwa hi timhandzi ta mirhi ya misengele kutani ti fuleriwa hi byanyi.

Nkarhi hinkwawo vaendzi va amukelekile ku ta eminhlanganweni leyi khomeriwaka eHolweni yihi na yihi ya Mfumo. (Vaheveru 10:25) Vhiki ni vhiki ku ni nkulumo ya le rivaleni, leyi nhloko-mhaka ya yona yi sekeriweke eBibeleni naswona yi pfuna swirho swa vandlha leswi tshamaka swi ri kona swin’we ni vaendzi. Ha yini u nga endzeli Holo ya Mfumo ya le ndhawini ya ka n’wina?

[Xifaniso lexi nga eka tluka 31]

Malawi, eAfrika

[Swifaniso leswi nga eka tluka 31]

Nghilandhi, eGreat Britain