Swivutiso Swa Vahlayi . . .

Xana Timbhoni Ta Yehovha Ti Ku Languta Njhani Ku Hlangana Ka Vukhongeri?

▪ Hi ku ya hi World Christian Encyclopedia, ku ni vukhongeri bya kwalomu ka “10 000 byo hambana-hambana emisaveni hinkwayo.” Leswi hasahasa leyi nga evukhongerini yi nga twisa vanhu ku vava, vunyingi bya swirho swa byona swi ehleketa leswaku ku hlangana ka byona swi ta pfuna. Swi vona onge ku hlangana ka byona swi ta kondletela ku rhula ni vun’we emisaveni leyi avaneke.

Bibele yi khutaza vun’we. Muapostola Pawulo u fanise vandlha ra Vukreste ni miri wa munhu, laha xirho ha xin’we xi ‘hlanganisiwaka swin’we ni leswin’wana hi vun’we leswaku swi tirhisana.’ (Vaefesa 4:16) Hilaha ku fanaka, muapostola Petro u khutaze vapfumeri-kulobye a ku: “Hinkwenu ka n’wina vanani ni mianakanyo leyi fanaka.”—1 Petro 3:8.

Vakreste vo sungula a va hanya ni vanhu va mindhavuko ni vukhongeri byo hambana-hambana. Loko Pawulo a vulavula hi ku hlangana ka vukhongeri byo hambana-hambana u vutise a ku: “Munhu la pfumelaka u ni xiphemu xihi ni loyi a nga riki mupfumeri?” Kutani u lemukise Vakreste leswaku va ‘huma exikarhi ka vona.’ (2 Vakorinto 6:15, 17) Swi le rivaleni leswaku Pawulo a a kanetana ni mhaka ya ku hlangana ka vukhongeri. Ha yini a a kanetana na yona?

Pawulo u swi veke erivaleni leswaku Mukreste wa ntiyiso a nge hlangani ni munhu la nga riki Mukreste wa ntiyiso leswaku va gandzela swin’we. (2 Vakorinto 6:14) Sweswo swi nga dlaya ripfumelo ra Mukreste. Pawulo a a karhateka ku fana ni tatana la tivaka leswaku vana van’wana lava tshamaka ekusuhi na vona va ni mahanyelo yo biha. Tanihi mutswari la khathalaka, u ta hlawulela n’wana wakwe vana lava a faneleke a tlanga na vona. Leswi swi nga ha endleka leswaku swi nga va tsakisi vaakelani vakwe. Hambiswiritano, ku endla tano swi sirhelela n’wana wakwe eka minkucetelo yo biha. Hilaha ku fanaka, Pawulo a a swi tiva leswaku ku tihambanisa ni vukhongeri byin’wana swi ta sirhelela Vakreste eka mikhuva yo biha.

Hi ku endla tano, Pawulo a a tekelela Yesu. Hambileswi Yesu a vekeke xikombiso lexinene emhakeni yo kondletela ku rhula, a nga tihlanganisanga ni vukhongeri. Mintlawa yo tala ya vukhongeri, yo tanihi ya Vafarisi ni Vasaduki, a yi ri kona hi nkarhi wa vutirheli byakwe. Mintlawa yoleyo ya vukhongeri yi hlanganile leswaku yi kanetana na Yesu naswona yi tlhele yi boha kungu ro n’wi dlaya. Hi hala tlhelo, Yesu u lemukise valandzeri vakwe leswaku va “tivonela . . . eka dyondzo ya Vafarisi ni Vasaduki.”—Matewu 16:12.

Ku vuriwa yini hi namuntlha, xana xitsundzuxo xa le Bibeleni xo lwisana ni ku hlangana ka vukhongeri xa ha ri xa nkoka? Ina, leswi swi tano hikuva tidyondzo ta vukhongeri byo hambana-hambana a ti nge pfuki ti ve nchumu wun’we hikwalaho ka ku hlangana ka vukhongeri tanihi leswi oyili ni mati swi nga hlanganiki hambiloko swo virisiwa. Hi xikombiso, loko vanhu va vukhongeri byo hambana-hambana va hlangana leswaku va khongelela ku rhula, xana hi xihi xikwembu lexi va kombelaka eka xona? Ku nga va ku ri Xikwembu xa Vujagana xa Vunharhu-un’we? Xa Mahindu lexi vuriwaka Brahma? Xa Mabudha? Kumbe xin’wana?

Muprofeta Mikiya u profete leswaku “exiphen’wini xo hetelela xa masiku,” vanhu va matiko hinkwawo va ta ku: “Tanani, a hi tlhandlukeleni entshaveni ya Yehovha ni le ndlwini ya Xikwembu xa Yakobe; kutani u ta hi letela tindlela ta yena, hi ta famba emintileni ya yena.” (Mikiya 4:1-4) Kutani leswi tsalwa leri ri swi vulaka a swi ta hetiseka hi ku va misava hinkwayo yi va ni vun’we ni ku rhula, ku nga ri hikwalaho ka leswi vanhu va vukhongeri va hlanganeke, kambe hikwalaho ka leswi vanhu hinkwavo va nga evukhongerini byin’we bya ntiyiso.

[Xifaniso lexi nga eka tluka 27]

Hi 2008 loko swirho swa vukhongeri lebyikulu swi ri enhlengeletanweni

[Xihlovo Xa Kona]

REUTERS/​Andreas Manolis