A Va Ha Ma Chavi Makumu

EKU heleni ka va-1970, Gary na Karen a va tshemba leswaku ku lovisiwa ka misava ku le kusuhi swinene. Leswi swi endle leswaku va rhurha edorobeni kutani va ya tshama laha va nga ta tikumela xin’wana ni xin’wana lexi va xi lavaka handle ko titshega hi munhu un’wana. A va lava ku pona.

Leswaku va tiva ndlela leyi va faneleke va hanya ha yona, va xave tibuku, va nghena titlilasi, va endla ndzavisiso ni ku vulavula ni vanhu vo tala hilaha va nga kotaka hakona. Va tiendlele xirhapa xa matsavu va tlhela va byala mirhi ya 50 leyitsongo ya mihandzu eka xona. Va hlayise timbewu ni switirho. Va dyondze ku hlakula ni ku hlayisa swakudya. Munghana wa vona u va dyondzise ku dlaya swiharhi ni ku endla mintonga. Karen u dyondze ku kha miroho enhoveni leswaku va ta dya yona loko va nga ri na swakudya. Gary u dyondze ku tshivela ndzilo hi mpupurha, ku endla xitofu lexi tirhisaka tihunyi hi nsimbi ni ku tiakela yindlu leyi nga laviki swilo swo tala.

Karen u ri: “Hikwalaho ka swiyimo swo chavisa leswi a swi ri kona hi nkarhi wolowo, a ndzi ehleketa leswaku vanhu va ta lovisiwa ku nga ri khale.” Gary u ri: “Ku fana ni vantshwa van’wana, a ndzi tiyimisele ku herisa xihlawu-hlawu, Nyimpi ya le Vietnam ni vukanganyisi. Kambe ndzi hatle ndzi hela matimba. A ndzi vona onge vanhu va ta dlayetelana loko swiyimo swo ya emahlweni hi ndlela leyi a swi ri ha yona.”

Gary u ye emahlweni a ku: “Siku rin’wana nivusiku a ndzi nga ri na xo xi endla, hiloko ndzi teka Bibele ndzi yi hlaya ku suka eka Matewu ku ya eka Nhlavutelo. Endzhaku ka masiku  ya mune ndzi tlhele ndzi yi hlaya. Hi mixo wa siku ra vuntlhanu, ndzi byele Karen ndzi ku: ‘Hi hanya emasikwini yo hetelela. Ku nga ri khale Xikwembu xi ta teka goza ro basisa misava. Hi fanele hi tihlanganisa ni vanhu lava lavaka ku pona.’” Gary na Karen va sungule ku nghena eka vukhongeri byo hambana-hambana va lava vanhu lava lavaka ku tilunghiselela ku pona loko makumu ma fika.

Swi nga si ya kwihi, Mbhoni ya Yehovha yi va endzerile kutani va sungula ku dyondza Bibele na yona. Karen u ri: “A ndzi tsake ngopfu hikuva ndzi hlamuseriwe Matsalwa hi ndlela leyi twisisekaka. Ndzi kume ntiyiso lowu a ku ri khale ndzi wu lava, ku nga ntiyiso malunghana ni masiku ya makumu. Ndzi kume ntshembo lowu tiyeke hi vumundzuku. Kambe xa nkoka swinene, ndzi sungule ku aka vuxaka lebyi tiyeke ni Tata wa mina wa le tilweni, ku nga Muvumbi tlhelo Xikwembu xa vuako hinkwabyo.”

Gary u ri: “Ndzi sungule ku hanya vutomi lebyi nga ni xikongomelo. Loko ndzo sungula ku dyondza Bibele, swa ndzi tikela ku yi tshika. Ndzi hlaya vuprofeta bya Bibele, ndzi endla ndzavisiso ku va ndzi tiyiseka leswaku byi ta hetiseka naswona a ndzi kanakani leswaku Xikwembu xi ta teka goza ku nga ri khale. Ndzi tibyela leswaku, ‘Vanhu va fanele va tilunghiselela ku kuma vutomi lebyi Xikwembu xi hi tshembisaka byona, ku nga ri ku va va pona eka khombo leri taka ntsena.’” Gary na Karen va sungule ku va ni langutelo lerinene hi vumundzuku. Ematshan’weni yo karhateka hi ku fika ka makumu ya misava, va tiyiseka leswaku Xikwembu xi ta herisa swiphiqo leswi karhataka vanhu kutani xi endla misava yi va paradeyisi.

Endzhaku ka malembe yo tlula 25, i yini leswi Gary na Karen va swi endlaka sweswi? Karen u ri: “Ndzi hambeta ndzi kurisa rirhandzu leri ndzi nga na rona eka Yehovha Xikwembu ni ku tiyisa ripfumelo ra mina eka yena naswona ndzi ringeta ku pfuna van’wana leswaku na vona va endla leswi fanaka. Mina na Gary ha seketelana leswaku hi tiyisa vukati bya hina naswona hi gandzela Xikwembu swin’we. Hi ringeta ku tshama hi lunghekile naswona hi tiyimisele ku hanya vutomi byo olova leswaku hi ta pfuna vanhu van’wana.”

Gary u tlhele a ku: “Nkarhi na nkarhi ndzi khongelela leswaku Mfumo wa Xikwembu wu fika leswaku wu ta herisa ku xaniseka ka vanhu va timiliyoni. Nkarhi na nkarhi loko ndzi chumayela vanhu mahungu lamanene ya Mfumo wa Xikwembu, a ndzi khongelela leswaku ndzi kota ku pfuna hambi ko va munhu un’we ntsena leswaku a amukela ntshembo lowu humaka eBibeleni. Emalembeni yo tlula 25 lama hundzeke, Yehovha u xi hlamurile xikhongelo xexo. Mina na Karen hi tshemba leswaku ku nga ri khale Yehovha u ta tisa ku cinca laha misaveni naswona a ha ha ma chavi makumu.”—Matewu 6:9, 10; 2 Petro 3:11, 12.

[Xifaniso lexi nga eka tluka 9]

Sweswi Gary na Karen va tiphina hi ku pfuna van’wana leswaku va kuma ntshembo lowu nga eBibeleni