Tinhlamulo Ta Swivutiso Swa Mune Malunghana Ni Makumu

YESU KRESTE u profete leswaku hi ku famba ka nkarhi ‘makumu ma ta fika.’ Loko a vulavula hi nkarhi wolowo u te: “Ku ta va ni nhlomulo lowukulu lowu ku nga si tshamaka ku humelela lowu fanaka na wona hi mpfhuka misava yi va kona ku fikela sweswi, e-e, naswona a wu nge he tlheli wu va kona.”—Matewu 24:14, 21.

Leswi Yesu a nga swi vula malunghana ni makumu swin’we ni tindzimana tin’wana leti vulavulaka hi mhaka leyi eBibeleni, swi tlakusa swivutiso swo tala swa nkoka. Ha yini u nga pfuli Bibele ya wena kutani u twa ndlela leyi yi swi hlamulaka ha yona swivutiso sweswo?

1 I Yini Leswi Nga Ta Herisiwa?

Bibele a yi dyondzisi swona leswaku misava leyi hi hanyaka eka yona yi ta herisiwa. Mupisalema u te: “[Yehovha] u simeke misava etindhawini leti a ti endleleke tona; a yi nge tsekatsekisiwi hilaha ku nga riki na makumu, kumbe hi masiku.” (Pisalema 104:5) Hi hala tlhelo, Bibele a yi dyondzisi swona leswaku ku ta va ni ndzilo emisaveni hinkwayo lowu nga ta herisa swilo hinkwaswo leswi hanyaka. (Esaya 45:18) Yesu u vule leswaku ku ni vanhu lava nga ta pona loko makumu ma fika. (Matewu 24:21, 22) Kutani i yini leswi Bibele yi vulaka leswaku swi ta herisiwa?

Tihulumendhe ta vanhu leti tsandzekeke ku fuma hi ndlela leyinene ti ta herisiwa. Xikwembu xi huhutele muprofeta Daniyele ku tsala a ku: “Xikwembu xa le tilweni xi ta veka mfumo lowu wu nga ta ka wu nga lovisiwi. Mfumo lowu wu nga ka wu nga hundziseriwi eka vanhu van’wana. Wu ta pfotlosa kutani wu herisa mimfumo leyi hinkwayo, kambe wona wu ta tshama hilaha ku nga riki na makumu.”—Daniyele 2:44.

Nyimpi ni ku thyakisiwa ka misava swi ta herisiwa. Loko Pisalema 46:9 yi hlamusela leswi Yehovha a nga ta swi endla yi ri: “U herisa tinyimpi ku ya fika emakumu ya misava. Vurha u byi tshova hi le xikarhi naswona u tshovelela fumu; tigolonyi u ti hisa endzilweni.” Hi hala tlhelo, Bibele yi dyondzisa leswaku Xikwembu xi ta “lovisa lava onhaka misava.”—Nhlavutelo 11:18.

Vugevenga ni vuhomboloki swi ta herisiwa. Bibele yi tshembisa leswi: “Lavo lulama hi vona lava nga ta tshama emisaveni, naswona lava va  pfumalaka xisandzu hi vona lava nga ta sala eka yona. Loko ku ri lavo homboloka, va ta dlayiwa emisaveni; kasi loko ku ri vaxengi, va ta tsuvuriwa eka yona.” *—Swivuriso 2:21, 22.

2 Xana Makumu Ma Ta Fika Rini?

Yehovha Xikwembu u ‘veke nkarhi’ lowu faneleke lowu ha wona a nga ta herisa vubihi kutani a simeka Mfumo wakwe. (Marka 13:33) Kambe Bibele yi swi veka erivaleni leswaku a hi nge ri tivi siku leri makumu ma nga ta fika ha rona. Yesu u te: “Malunghana ni siku ra kona ni nkarhi wa kona a ku na munhu la swi tivaka, hambi ku ri tintsumi ta le matilweni hambi ku ri N’wana, kambe swi tiviwa hi Tatana ntsena.” (Matewu 24:36) Hambiswiritano, Yesu ni vadyondzisiwa vakwe va vule ka ha ri emahlweni leswaku swiyimo swi ta va njhani emisaveni loko makumu ma nga si fika. Loko swiendlakalo sweswo hinkwaswo swi endleka emisaveni hinkwayo hi nkarhi wun’we, sweswo swi ta va swi kombisa leswaku makumu se ma tshinele.

Tipolitiki, ku nga khathaleriwi ka ntumbuluko ni ku cinca ka swilo swi va khumbe swinene vanhu. Loko Yesu a hlamula xivutiso lexi vadyondzisiwa vakwe va n’wi vutiseke xona malunghana ni makumu u te: “Tiko ri ta pfukela tiko rin’wana ni mfumo wu ta pfukela mfumo wun’wana, ku ta va ni ku tsekatseka ka misava ku suka endhawini yin’wana ku ya eka yin’wanyana, ku ta va ni ku kayivela ka swakudya. Leswi i ku sungula ka switlhavi swa maxangu.” (Marka 13:8) Muapostola Pawulo u te: “Emasikwini yo hetelela ku ta fika minkarhi ya mangava leyi swi nonon’hwaka ku langutana na yona. Hikuva vanhu va ta va lava tirhandzaka, varhandzi va mali, lava titivaka, lava titlakusaka, vasandzi, lava nga yingisiki vatswari, lava nga nkhensiki, lava nga tshembekiki, lava nga riki na xinakulobye xa ntumbuluko, lava nga laviki ntwanano hambi wu ri wihi, valumbeti, lava nga tikhomiki, lava nga ni tihanyi, lava nga rhandziki vunene, vaxengi, lava omeke tinhloko, lava tikukumuxaka hi ku tinyungubyisa, lava rhandzaka mintsako ku ri ni ku rhandza Xikwembu.”—2 Timotiya 3:1-5.

Ntirho wo chumayela hi tindzimi to hambana-hambana wu karhi wa endliwa emisaveni hinkwayo. Yesu u te: “Mahungu lamanene lawa ya mfumo ma ta chumayeriwa emisaveni hinkwayo leyi akiweke leswaku byi va vumbhoni ematikweni hinkwawo; kutani hi kona makumu ma nga ta fika.”—Matewu 24:14.

3 I Yini Leswi Nga Ta Endleka Endzhaku Ka Loko Makumu Se Ma Hundzile?

Bibele a yi dyondzisi swona leswaku vanhu lavanene va ta tekiwa va ya tshama etilweni hilaha ku nga heriki. Yesu u dyondzise leswaku xikongomelo xa Xikwembu hi vanhu xi ta hetiseka loko a ku: “Va tsaka lava nga ni moya wo rhula, hikuva va ta dya ndzhaka ya misava.” (Matewu 5:5; 6:9, 10) Bibele yi tshembisa leswaku vanhu lava faka makumu ma nga si fika va ta pfuxiwa. (Yobo 14:14, 15; Yohane 5:28, 29) Kutani i yini leswi nga ta endleka endzhaku ka sweswo?

Yesu u ta ya emahlweni a fuma tanihi Hosi ya Mfumo wa Xikwembu a ri etilweni. Muprofeta Daniyele u te: “Ndzi ya emahlweni ndzi languta eswivonweni swa nivusiku, kutani waswivo, lahaya mapapeni ya le matilweni a ku ri ni loyi a fanaka ni n’wana wa munhu [ku nga Yesu la pfuxiweke] a ri karhi a ta; kutani a nghena eka Nkulukumba wa Masiku [Yehovha Xikwembu], a tshinetiwa swinene emahlweni ka Yena. Kutani [Yesu] a nyikiwa ku fuma ni xindzhuti ni mfumo, leswaku vanhu, vanhu va matiko ni tindzimi hinkwato va n’wi tirhela. Ku fuma ka yena i ku fuma loku tshamaka hilaha ku nga heriki loku ku nga ta ka ku nga hundzi, mfumo wakwe a wu nge lovisiwi.”—Daniyele 7:13, 14; Luka 1:31, 32; Yohane 3:13-16.

Lava nga ta fumiwa hi Mfumo wa Xikwembu va ta va ni rihanyo lerinene, va ta titwa va sirhelelekile naswona va ta tiphina hi vutomi lebyi nga heriki. Muprofeta Esaya u te: “Va ta aka tindlu va tshama eka tona; kunene va ta rima masimu ya vhinya va dya mihandzu ya wona. A va nge aki kutani ku tshama un’wana; a va nge rimi kutani ku dya un’wana.” (Esaya 65:21-23) Loko muapostola Yohane a tsala hileswi nga ta endleka enkarhini wolowo u te: “Waswivo! Ntsonga wa Xikwembu wu le  vanhwini, xi ta tshama na vona, naswona vona va ta va vanhu va xona. Xikwembu hi xiviri xi ta va na vona. Kutani xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona. Swilo swo sungula swi hundzile.”—Nhlavutelo 21:3, 4.

4 I Yini Leswi U Faneleke U Swi Endla Leswaku U Ta Pona Loko Makumu Ma Fika?

Muapostola Petro u swi vone ka ha ri emahlweni leswaku vanhu van’wana lava nga ta va va hanya enkarhini wa makumu va ta vungunya mhaka ya leswaku Xikwembu xi ta va pfuna vanhu xi tlhela xi herisa vubihi hinkwabyo lebyi nga kona laha misaveni. (2 Petro 3:3, 4) Hambiswiritano, Petro u khutaze lava hanyaka enkarhini wa hina leswaku va teka magoza lama landzelaka.

Dyondza eka leswi nga endleka. Petro u vule leswaku Xikwembu ‘a xi tshikanga ku xupula misava ya khale, kambe xi hlayise Nowa, muchumayeri wa leswo lulama ni van’wana va nkombo loko xi tisa ndhambhi ehenhla ka misava ya vanhu lava nga xiximiki Xikwembu.’ (2 Petro 2:5) Loko a vulavula hi vahlekuri volavo u te: “Hi ku navela ka vona, a va yi lemuki mhaka ya leswaku ku sukela khale a ku ri ni matilo ni misava leyi yimeke yi vumbana ehandle ka mati ni le xikarhi ka mati hi rito ra Xikwembu; naswona misava ya nkarhi wolowo yi lovisiwile ha wona loko mati ma yi  khubumeta. Kambe ha rona rito rero, matilo ni misava * leyi nga kona sweswi swi hlayiseriwe ndzilo naswona swa ha vekiwile ku fikela siku ra vuavanyisi ni ra ndzoviso wa vanhu lava va nga xi xiximiki Xikwembu.”—2 Petro 3:5-7.

Hanya hi milawu ya Xikwembu ya mahanyelo. Petro u vule leswaku lava navelaka ku pona loko makumu ma fika va ta kombisa “swiendlo swo kwetsima swa ku tikhoma ni swiendlo swa ku tinyiketela loku nga ni vukwembu.” (2 Petro 3:11) Xiya leswaku Petro u vulavula hi “swiendlo swo kwetsima” ni hi “swiendlo swa ku tinyiketela loku nga ni vukwembu.” Ku ni swo tala leswi katsekaka ku tlula ku vula leswaku u ni ripfumelo kumbe ku ringeta ku titshineta eka Xikwembu loko timhaka se ti bihile leswaku u ta pona loko ku fika makumu.

I swiendlo ni ku tinyiketela ka muxaka muni loku Xikwembu xi ku amukelaka? Ha yini u nga ringanisi leswi u swi tivaka ni leswi Bibele yi swi dyondzisaka emhakeni ya mahanyelo? Timbhoni ta Yehovha ti nga swi tsakela ku ku pfuna. Ti kombele leswaku ti ku komba laha tinhlamulo ta tona ti sekeriweke kona eBibeleni ya wena. Ku endla tano swi nga ha ku pfuna leswaku u langutela vumundzuku hi xivindzi naswona u ri ni ntshembo, ku nga khathariseki swilo leswi hi rhendzeleke leswi endlaka leswaku hi hanya hi ku chava.

[Tinhlamuselo ta le hansi]

[Marito lama tshahiweke exihlokweni lama nga eka tluka 7]

Misava a yi nge lovisiwi kambe ku ta lovisiwa lava yi onhaka