Bulo Ni Muakelani—Moya Lowo Kwetsima I Yini?

TIMBHONI TA YEHOVHA ta swi rhandza ku bula ni vaakelani va tona hi Bibele. Xana u na xona xivutiso xa le Bibeleni lexi u tshameke u tivutisa xona? Xana ku ni leswi u lavaka ku swi tiva hi tidyondzo to karhi nileswi Timbhoni ta Yehovha ti swi pfumelaka? Loko swi ri tano, u nga kanakani ku ti vutisa loko u hlangana na tona. Ti ta swi tsakela ku ku pfuna.

Bulo leri landzelaka ri kombisa ndlela leyi Mbhoni ya Yehovha yi nga bulaka ha yona ni muakelani. Hi xikombiso, Scott la nga Mbhoni u endzele wanuna la vuriwaka Brad.

Xana U Vula Yini Loko U Vulavula Hi “Moya Lowo Kwetsima”?

Brad: Ndzi twe leswaku Timbhoni ta Yehovha a hi Vakreste naswona a ti pfumeli eka moya lowo kwetsima.

Scott: Sweswo a hi ntiyiso, hi Vakreste. Ku pfumela ka mina eka Yesu Kreste hi swona leswi endleke leswaku ndzi ku endzela mixo lowu. Phela hi Yena la leriseke valandzeri vakwe ku chumayela. Kambe ndzi kombela ku tiva leswaku u vula yini loko u vulavula hi “moya lowo kwetsima”?

Brad: Ndzi vula munhu wa vunharhu eka Vunharhu-un’we, loyi Yesu a tshembiseke ku hi rhumela yena. Mupfuni yoloye i wa nkoka eka mina. Ndzi lava ku vona ndlela leyi moya lowo kwetsima wu tirhaka ha yona evuton’wini bya mina.

Scott: Vanhu vo tala va vula tano. Ndzi tshame ndzi kambisisa leswi Bibele yi swi dyondzisaka hi mhaka leyi. Loko u ri ni nkarhi, ndzi nga tsakela ku ku komba leswi ndzi swi dyondzeke.

Brad: U nga ndzi komba.

Scott: A ndzi nga si ku byela vito ra mina, hi mina Scott. Wena u mani?

Brad: Hi mina Brad. Ndzi tsakela ku ku tiva.

Scott: Na mina ndzi tsakela ku ku tiva. Leswaku ndzi nga ku dyeli nkarhi, i nge ndzi bula na wena hi yinhla yin’we leyi khumbaka moya lowo kwetsima. U vule leswaku moya lowo kwetsima i mupfuni loyi Yesu a hi tshembiseke yena. Ndzi pfumelelana na wena emhakeni leyi. Kambe, xana u vula leswaku moya lowo kwetsima i munhu naswona u ringana ni Xikwembu?

Brad: Ina, hileswi ndzi dyondzisiweke swona.

Xana Moya Lowo Kwetsima I Munhu?

Scott: A hi kambisise rungula ra le Bibeleni leri nga ta hi pfuna ku vona loko moya lowo kwetsima ku ri munhu kumbe ku nga ri munhu. Kumbexana u ri toloverile rungula leri. Mintirho 2:1-4 yi ri: “Loko siku ra nkhuvo wa Pentekosta ri ya emahlweni, hinkwavo a va hlangane endhawini yin’we, kutani hi xitshuketa ku humelela huwa yi huma etilweni yi kotisa rimoyana leri hungaka hi rivilo ra matimba, yi tata yindlu hinkwayo leyi a va tshame eka yona. Hiloko ku vonaka tindzimi leti fanaka ni ndzilo eka vona, kutani ti avana, ha rin’we ri tshama  ehenhla ka un’wana ni un’wana wa vona, kutani hinkwavo va tala moya lowo kwetsima, va sungula ku vulavula hi tindzimi to hambana-hambana, hilaha moya a wu va nyika hakona leswaku va vulavula.”

Brad: A ndzi sunguli ku ri twa rungula leri.

Scott: Ndzi byele la, xana u ehleketa leswaku munhu a nga swi kota ku tata munhu un’wana?

Brad: A swi nge koteki sweswo.

Scott: A hi tlhele hi hlaya ndzimana 17 eka ndzima leyi fanaka. Xiphemu xo sungula xa ndzimana yoleyo xi ri: “‘Emasikwini yo hetelela,’ ku vula Xikwembu, ‘Ndzi ta chululela mpimo wo karhi wa moya wa mina ehenhla ka nyama ya muxaka wun’wana ni wun’wana.’” Ndzi byele la, xana Xikwembu xi nga chululela mpimo wa xona eka Xikwembu xin’wana lexi ringanaka na xona?

Brad: A swi nge koteki sweswo.

Scott: Yohane Mukhuvuri u tirhise nhlamuselo leyi hambaneke yo tala hi moya lowo kwetsima leyi nga eka Matewu 3:11. Ndzi kombela u yi hlaya.

Brad: “Loko ku ri mina, ndzi mi khuvula hi mati hileswi mi hundzukeke; kambe loyi a taka endzhaku ka mina wa ndzi tlula hi matimba, loyi maphaxani ya yena swi nga ndzi faneriki ku ma hluvula. Yena u ta mi khuvula hi moya lowo kwetsima ni hi ndzilo.”

Scott: U hlaye kahle. Xana u swi xiyile leswi Yohane Mukhuvuri a vulaka leswaku moya lowo kwetsima wu ta swi endla?

Brad: Ina, u vulavule hi ku khuvuriwa hi moya lowo kwetsima.

Scott: U tiyisile. Xiya leswaku u tlhele a vulavula hi ku khuvuriwa hi ndzilo. Swi le rivaleni leswaku ndzilo a hi munhu. Xana u ehleketa leswaku ndzimana leyi yi vula leswaku moya lowo kwetsima i munhu?

Brad: A hi munhu.

Scott: Hi ku ya hi Matsalwa lawa hi ma hlayeke, swi le rivaleni leswaku moya lowo kwetsima a hi munhu.

Brad: Wa vurisa.

Moya Lowo Kwetsima I “Mupfuni” Hi Ndlela Yihi?

Scott: Eku sunguleni u vule leswaku moya lowo kwetsima i “mupfuni.” Eka Yohane 14:26, Yesu u kombetele eka wona tanihi “mupfuni.” A hi fambisane swin’we loko ndzi yi hlaya: “Mupfuni, la nga moya lowo kwetsima, loyi Tatana a nga ta n’wi rhumela hi vito ra mina, u ta mi dyondzisa swilo hinkwaswo ni ku mi tsundzuxa swilo hinkwaswo leswi ndzi mi byeleke swona.” Vanhu van’wana va vula leswaku tsalwa leri ri seketela mhaka ya leswaku moya lowo kwetsima i munhu la nga ta hi pfuna ni ku hi dyondzisa.

Brad: Hileswi na mina ndzi tivaka swona.

Scott: Swi nga ha endleka leswaku eka tsalwa leri Yesu u tirhise xiga-ririmi. Xiya leswi a swi vuleke hi vutlhari eka Luka 7:35: “Hambiswiritano, vutlhari byi kombisiwa byi ri lebyi lulameke hi vana va byona hinkwavo.” Xana u nga vula leswaku vutlhari i munhu naswona byi ni vana?

Brad: Sweswo a swi nge endleki. U tiyisile loko u vula leswaku Yesu u tirhise xiga-ririmi.

Scott: Ndzi pfumelelana na wena. Yesu a a vula leswaku vutlhari byi vonaka hi mihandzu. Minkarhi yo tala Bibele yi tirhisa xiga-ririmi lexi vuriwaka ximunhuhatwa, lexi hlamuselaka swilo leswi nga hanyiki, swi tikombaka onge swa hanya. Na hina ha xi tirhisa xiga-ririmi xexo loko hi vulavula. Hi xikombiso, loko dyambu ri tlhavile, xana a hi nge vuli hi ku, “Pfula makhetenisi leswaku dyambu ri nghena”?

Brad: Hi nga vula.

Scott: Xana u nga vula leswaku dyambu i munhu la nga ta nghena endlwini ya wena ku fana ni muendzi?

Brad: A swi kona sweswo, phela ko va xiga-ririmi.

Scott: Kutani loko Yesu a vulavula hi moya lowo kwetsima tanihi mupfuni kumbe mudyondzisi, xana swi nga ha endleka leswaku a a tirhisa xiga-ririmi?

Brad: Ndzi ehleketa tano. Phela sweswo swi fambisana ni Matsalwa lawa u ma hlayeke malunghana ni ku chuluriwa ka moya lowo kwetsima ni ku va vanhu va khuvuriwa hi wona.  Kambe loko moya lowo kwetsima ku nga ri munhu, xana i yini?

I Yini Moya Lowo Kwetsima?

Scott: Eka Mintirho 1:8, Yesu u hi nyika nhlamuselo ya moya lowo kwetsima. Ndzi kombela u yi hlaya.

Brad: “Mi ta amukela matimba loko moya lowo kwetsima wu fika ehenhla ka n’wina, naswona mi ta va timbhoni ta mina eYerusalema swin’we ni le tikweni hinkwaro ra Yudiya ni le Samariya ni ku ya fika endhawini ya le kule swinene ya misava.”

Scott: Xiya leswaku Yesu u fanisa moya lowo kwetsima ni matimba. Eka tindzimana leti hi ti hlayeke, xana u ehleketa leswaku matimba lawa ma huma kwihi?

Brad: Ma huma eka Xikwembu.

Scott: U tiyisile. Moya lowo kwetsima i matimba lawa Xikwembu xi ma tirhiseke ku vumba vuako hinkwabyo. Genesa 1:2 yi vulavula hi moya lowo kwetsima loko yi ku: “Matimba lama tirhaka ya Xikwembu a ma ya hala ni hala ehenhla ka vuandlalo bya mati.” Rito ra Xiheveru leri hundzuluxeriweke ri va “matimba lama tirhaka” ri nga tlhela ri hundzuluxeriwa ri va “moya.” I matimba lama tirhaka lama nga vonakiki lawa Xikwembu xi ma tirhisaka ku hetisisa xikongomelo ni ku rhandza ka xona. A hi gimete hi ku hlaya Luka 11:13. Ndzi kombela u yi hlaya.

Brad: “Loko n’wina, hambiloko mi hombolokile mi tiva ndlela ya ku nyika vana va n’wina tinyiko letinene, Tatana la nge tilweni u ta nyika moya lowo kwetsima hilaha ku tlurisaka swinene eka lava n’wi kombelaka!”

Scott: Loko Tatana la nge tilweni a lawula moya lowo kwetsima, a wu nyika lava wu kombelaka, xana swa twala ku vula leswaku wu ringana na yena?

Brad: A swi twali. Se ndza yi twisisa mhaka leyi.

Scott: A ndzi lavi ku ku hlwerisa. U vule leswaku a wu na nkarhi wo tala. Kambe i nge ndzi ku vutisa xivutiso lexi, leswaku hi katsakanya bulo ra hina. Hi ku ya hi Matsalwa lawa hi ma hlayeke, xana moya lowo kwetsima i yini?

Brad: I matimba ya Xikwembu lama tirhaka.

Scott: U tiyisile. Eka Yohane 14:26, loko Yesu a vula leswaku moya lowo kwetsima i mupfuni ni mudyondzisi, a a tirhisa xiga-ririmi lexi vuriwaka ximunhuhatwa.

Brad: A ndzi nga swi tivi sweswo.

Scott: Ku na swin’wana leswi hi nga swi dyondzaka eka leswi Yesu a swi vuleke.

Brad: I yini?

Scott: Hi nga kombela Xikwembu leswaku xi hi pfuna hi moya wa xona lowo kwetsima loko hi langutane ni swiphiqo, naswona xi hi pfuna leswaku hi tiva ntiyiso hi xona.

Brad: Swi twala swi ri swinene, na mina ndzi fanele ndzi ehleketa hi yona mhaka leyi.

Scott: Ndzi nga si famba, hi leyi mhaka yin’wana leyi u nga anakanyisisaka ha yona. Leswi moya lowo kwetsima ku nga matimba ya Xikwembu lama tirhaka, u ta pfumelelana na mina leswaku Xikwembu xi nga tiendla xin’wana ni xin’wana lexi xi lavaka ku va xona.

Brad: U tiyisile.

Scott: Kutani ha yini xi nga tirhisi matimba ya xona lama nga pimekiki leswaku xi herisa vubihi hinkwabyo lebyi nga kona laha misaveni? Xana u tshame u tivutisa xivutiso lexi? *

Brad: Ina, ndzi tshame ndzi tivutisa.

Scott: U nga swi tsakela leswaku ndzi tlhela ndzi ku endzela vhiki leri taka hi nkarhi lowu fanaka leswaku hi ta bula hi mhaka leyi?

Brad: Ina, ndzi ta vona hi wena. U famba kahle.

[Nhlamuselo ya le hansi]