Chavelela Lava Feriweke Hilaha Yesu A Endleke Hakona

LAZARO, loyi a a tshama eBetaniya u sungule ku vabya swinene. Vamakwavo vakwe, ku nga Marta na Mariya, va rhumele vanhu leswaku va ya vitana munghana wa vona lonkulu Yesu. Kambe vuvabyi byakwe byi kale byi n’wi dlaya. Loko se a ri esirheni, vanghana va vona ni vaakelani va va endzerile leswaku va ta “va chavelela.” (Yohane 11:19) Yesu u hetelele a fikile eBetaniya leswaku a ya vona vanghana vakwe. Hi ku kambisisa leswi a swi vuleke ni leswi a swi endleke, hi nga dyondza swo karhi malunghana ni ku chavelela lava feriweke.

Vukona Bya Wena Byi Kombisa Leswaku Wa Khathala

Leswaku a ya eBetaniya, Yesu a a fanele a famba masiku mambirhi, a tsemakanya Nambu wa Yordani naswona a famba hi ndlela leyi jikajikaka ya le Yeriko ni ku gonya switsunga. Marta u tsutsumele eka Yesu leswaku a ya n’wi xeweta a ha ri ehandle ka muti. Endzhakunyana, loko Mariya a twa leswaku Yesu u fikile, na yena u tsutsume a ya n’wi vona. (Yohane 10:40-42; 11:6, 17-20, 28, 29) Hakunene vukona bya Yesu byi va chavelele swinene vamakwavo lava a va ri ni gome.

 Ninamuntlha vukona bya hina byi nga chavelela lava feriweke. Scott na Lydia, lava feriweke hi xifanyetana xa vona xa malembe ya tsevu eka mhangu, lexi vito ra xona ku nga Theo, va ri: “A hi lava ku seketeriwa hi vandyangu ni vanghana. Hi siku leri mhangu yi humeleleke ha rona, va te exibedlhele exikarhi ka vusiku.” I yini leswi vanghana volavo va swi vuleke? Scott na Lydia va ri: “Hi nkarhi wolowo a hi nga lavi va hi byela nchumu. Vukona bya vona a byi kombisa leswaku va khathala.”

Bibele yi vula leswaku loko Yesu a vona lava a va rila hikwalaho ka rifu ra Lazaro, u ‘karhatekile’ kutani “a humesa mihloti.” (Yohane 11:33-35, 38) Yesu a nga khomiwanga hi tingana ku rila emahlweni ka vanhu. A a ku twisisa ku vava loku a va ri na kona swin’we ni ndlela leyi a va titwa ha yona. Hi dyondza yini emhakeni leyi? Loko hi endzela lava feriweke, a hi fanelanga hi khomiwa hi tingana ku rila ni lava rilaka. (Varhoma 12:15) Kambe leswi a swi vuli swona leswaku hi fanele hi endla leswaku munhu la feriweke a rila. Van’wana a va swi lavi ku rila exikarhi ka vanhu.

Kombisa Ntwela-vusiwana Hi Ku Va La Yingisaka

Swi nga ha endleka leswaku Yesu a a ri ni swo tala swo swi vula leswaku a chavelela Marta na Mariya, kambe u va tshike va rhanga va vulavula. (Yohane 11:20, 21, 32) Loko a vulavula na Marta, u n’wi vutise xivutiso kutani a rhiya ndleve.—Yohane 11:25-27.

Ku va muyingiseri lonene swi kombisa leswaku wa khathala hakunene. Leswaku hi chavelela munhu la feriweke, hi fanele hi va vayingiseri lavanene. Hi nga kombisa leswaku hi vayingiseri lavanene hi ku vutisa swivutiso leswi nga ta endla leswaku munhu la feriweke a tiphofula. Kambe tivonele leswaku u nga n’wi sindzisi ku vulavula loko a nga swi lavi. Swi nga ha endleka leswaku u karhele naswona u lava ku wisa.

Vanhu van’wana lava feriweke va nga ha chuha ngopfu lerova va nga titwi ni loko va vulavula naswona va tshamela ku phindha-phindha mhaka leyi fanaka. Van’wana a va chavi ku vula ndlela leyi va titwaka ha yona. Mariya na Marta va byele Yesu va ku: “Hosi, loko a wu ri kona laha, makwerhu ingi a nga fanga.” (Yohane 11:21, 32) I yini leswi Yesu a swi endleke? U rhiye ndleve ni ku kombisa ntwela-vusiwana naswona a nga ringetanga ku va byela ndlela leyi a va fanele va titwa ha yona. Swi le rivaleni leswaku a a yi twisisa ndlela leyi a va titwa ha yona.

Loko u nga tiyiseki hileswi u nga swi vulaka loko u endzela munhu la feriweke, u nga ha sungula bulo hi ku vutisa u ku: “Xana wa swi tsakela ku vulavula hi mhaka leyi?” Rhiya ndleve loko a hlamula. N’wi langute exikandzeni naswona u ringeta ku twisisa ndlela leyi a titwaka ha yona.

A swi olovi ku twisisa ndlela leyi munhu la feriweke a titwaka ha yona. Lydia u ri: “Swilaveko swa hina a swi cinca. Minkarhi yin’wana a hi tsandzeka ku tikhoma lerova hi rila emahlweni ka vanhu lava hi endzeleke. Vanghana va hina a va tikarhatela ku twisisa ndlela leyi a hi titwa ha yona.”

Yesu u endle leswi hi ndlela leyi hetisekeke. A a swi tiva leswaku un’wana ni un’wana u ni “khombo rakwe ni ku vaviseka kakwe.” (2 Tikronika 6:29) U angule hi tindlela to hambana eka vamakwavo lava a va ri eku rileni. Loko Marta a ya emahlweni a vulavula, Yesu u bule na yena. Kambe leswi Mariya a a ri eku rileni, a nga bulanga ngopfu na yena. (Yohane 11:20-28, 32-35) Hi nga dyondza yini eka xikombiso xakwe? Swi nga va swinene  ku endla leswaku munhu la feriweke ku va yena la sungulaka bulo. Ku rhiya ka wena ndleve loko a ri karhi a tiphofula swi nga n’wi chavelela swinene.

Marito Lama Chavelelaka

Loko Mariya na Marta va byela Yesu va ku: “Loko a wu ri kona laha,” Yesu a nga va solanga. Kambe u chavelele Marta a ku: “Makwenu u ta pfuka.” (Yohane 11:23) Hi marito wolawo, Yesu u n’wi tsundzuxe hi ntshembo wa ku pfuxiwa ka vafi.

Loko u vulavula ni vanhu lava feriweke, tsundzuka leswaku hambiloko wo vula marito ma nga ri mangani lama khutazaka naswona ma humaka embilwini, ma nga vula swo tala eka vona. Marito yo chavelela ma nga ha vuriwa hi nomu kumbe ma tsariwa ehansi. Leswi mapapila ni makhadi ma nga ha hlayiwaka hi ku phindha-phindha, ma nga ha chavelela lava feriweke hambiloko se ku ri khale va feriwile. Endzhaku ka loko ku hundze tin’hweti ta kaye nuna wakwe Bob a file, Kath u tlhele a hlaya makhadi lawa a nyikiweke wona. U te: “Ndzi kume leswaku makhadi wolawo ma ndzi chavelela swinene hi nkarhi wolowo.”

Hi swihi leswi u nga swi tsalaka eka marito ya wena yo chavelela? U nga ha tsala hi minkarhi yo tsakisa leyi u veke na yona ni mufi kumbe hi timfanelo takwe letinene. Kath u ri: “Swilo leswinene leswi va swi tsaleke hi Bob ni hi vumunhu byakwe swi ndzi tsakisile. Switori leswi tsakisaka hi yena a swi endla leswaku ndzi n’wayitela naswona ndzi tsundzuka minkarhi yo tsakisa leyi hi tshameke hi va na yona. Makhadi yo tala lawa ni sweswi ndzi ma rhandzaka hi lawa ma nga ni tindzimana ta le Bibeleni.”

Tindlela Tin’wana Leti U Nga Pfunaka Ha Tona

Leswaku a pfuna ndyangu wa ka va Lazaro, Yesu u endle leswi hina hi nga ta ka hi nga swi koti ku swi endla. U pfuxe Lazaro. (Yohane 11:43, 44) Kambe hi nga va pfuna hi leswi hi nga swi kotaka, swo tanihi ku lunghiselela swakudya, ku nyika vaendzi van’wana ndhawu yo etlela, ku va hlantswela, ku khathalela vana, ku endla mintirho yin’wana kumbe ku va pfuna hi swo famba. Munhu la feriweke a nga swi tlangela swinene swiendlo swa rirhandzu, hambiloko swi nga nyawuli.

Minkarhi yin’wana vanhu lava feriweke va nga ha lava ku va voxe. Kambe u nga ha teka goza ro vulavurisana na vona. Manana un’wana la feriweke u ri: “A ku na nkarhi kumbe siku leri munhu a faneleke a tshika ku rila ha rona.” Vanhu van’wana va chavelela vanhu lava feriweke hi ku va endzela hi masiku lawa va cateke ha wona kumbe lawa va feriweke ha wona. Loko u tiendla u kumeka hi minkarhi yo tano, u ta tikombisa u ri munghana wa xiviri hi nkarhi wa maxangu.—Swivuriso 17:17.

Nchavelelo lowu Yesu a wu kombiseke wu fambisana ni ntshembo lowu a wu dyondziseke vadyondzisiwa vakwe, u te: “Lazaro nakulorhi u ye eku wiseni, kambe ndzi ya kona leswaku ndzi n’wi pfuxa evurhongweni.” (Yohane 11:11) Yesu u tiyisekise valandzeri vakwe leswaku vafi va ta pfuxiwa. U vutise Marta a ku: “Xana wa swi kholwa leswi ke?” Hiloko a hlamula a ku: “Ina, Hosi.”—Yohane 11:24-27.

Xana na wena wa tshemba leswaku Yesu u ta pfuxa vafi? Loko swi ri tano, byela vanhu lava feriweke hi ntshembo lowu. Va pfune ni hi tindlela tin’wana. Marito ni swiendlo swa wena swi nga va chavelela swinene.—1 Yohane 3:18.

[Mepe lowu nga eka tluka 9]

(Leswaku u vona rungula leri hleriweke hi ku helela, vona nkandziyiso wa kona)

PERIYA

Nambu wa Yordani

Yeriko

Betaniya

Lwandle ra Munyu

Yerusalema

SAMARIYA