Goza 5

Enerisa Xilaveko Xa Wena Xa Moya

I YINI LESWI BIBELE YI SWI DYONDZISAKA? “Va tsaka lava khathalaka hi xilaveko xa vona xa moya.”—Matewu 5:3.

HI XIHI XIPHIQO XA KONA? Ku ni magidi ya vukhongeri byo hambana-hambana lebyi byo tala bya byona byi dyondzisaka tindlela ta byona to enerisa xilaveko xa wena xa moya. Xana u nga byi tivisa ku yini lebyi dyondzisaka ntiyiso naswona byi tsakisaka Xikwembu? Vatsari van’wana lava dumeke va vula leswaku ku pfumela eka Xikwembu ni ku tinyiketela eka xona a swi twali nikatsongo naswona swi ni khombo. Magazini lowu vuriwaka Maclean wu katsakanya mavonelo ya vona hi ndlela leyi: “Mhaka leyi Vukreste byi yi dyondzisaka ya leswaku ku ni swin’wana leswi katsekaka evuton’wini ku tlula leswi hi swi vonaka, hi swi twaka kumbe leswi humaka eka van’wasayense, yi endla leswaku vutomi byi languteka byi nga ri bya nkoka naswona hi swona leswi endlaka leswaku vanhu va endla madzolonga.”

I YINI LESWI U NGA SWI ENDLAKA? Kambisisa vumbhoni bya leswaku Xikwembu xi kona. (Varhoma 1:20; Vaheveru 3:4) U nga pfumeleli munhu a ku heta matimba yo lavisisa tinhlamulo ta swivutiso swa nkoka, swo tanihi leswi nge: Ha yini hi ri laha? Xana ku ni vutomi endzhaku ka rifu? Ha yini ku ri ni ku xaniseka konghasi? I yini leswi Xikwembu xi swi languteleke eka mina? Ku kuma tinhlamulo leti enerisaka ta swivutiso sweswo swi ta endla leswaku u eneriseka hilaha ku nga heriki.

Hambiswiritano, u nga tshembi swilo hinkwaswo leswi vanhu va ku byelaka swona. Rito ra Xikwembu ri ku khutaza leswaku u tirhisa “matimba ya [wena] ya ku anakanya” leswaku u tiva leswi amukelekaka eka xona. (Varhoma 12:1, 2) U ta vuyeriwa hikwalaho ka matshalatshala ya wena. Loko u tinyika nkarhi wa ku hlaya Bibele naswona u tirhisa ndzayo ya yona, u ta papalata swiphiqo, u hunguta ku vilela kutani u tiphina hi vutomi. U nga xi tshemba xitshembiso lexi hikuva vanhu va timiliyoni vo huma eka mindhavuko hinkwayo va vuyeriwile hi ku dyondza ntiyiso hi Xikwembu ni hi swikongomelo swa xona. Hi xikombiso, hlaya hi vanhu lava cinceke vutomi bya vona eka matluka 18 ku ya eka 21 ya magazini lowu.

Loko u ri karhi u vuyeriwa hi ku tirhisa ndzayo ya vutlhari leyi nga eBibeleni, u ta ya u tinyiketela swinene eka Xikwembu. Ha yini u nga amukeli xirhambo xo dyondza Bibele ni Timbhoni ta Yehovha? Loko wo endla tano, u ta pfumelelana na muapostola Pawulo la tsaleke a ku: “Ku tinyiketela loku ku nga ni vukwembu swin’we ni ku eneriseka i ndlela leyi pindzurisaka swinene.”—1 Timotiya 6:6.

[Xifaniso lexi nga eka tluka 8]

Tikumele hi wexe leswi amukelekaka eka Xikwembu