Leswi Hi Nga Swi Dyondzaka Eka Yesu

Ndlela Leyi Swivumbiwa Swa Moya Swi Hi Khumbaka Ha Yona

Yesu u hanye exivandleni xa moya ni Tata wakwe “misava yi nga si va kona.” (Yohane 17:5) Hikokwalaho, wa faneleka ku hlamula swivutiso leswi landzelaka.

Xana tintsumi ta hi rhandza?

▪ Yesu u dyondzise leswaku tintsumi ti va rhandza swinene vanhu. U te: “Tintsumi ta Xikwembu ta tsaka loko mudyohi un’we a hundzuka.”—Luka 15:10.

Yesu u kombise leswaku tintsumi ti nyikiwe vutihlamuleri byo khathalela swilaveko swa moya swa malandza ya Xikwembu. Xisweswo, loko Yesu a lemukisa vadyondzisiwa vakwe leswaku va nga khunguvanyisi van’wana u te: “Tivoneleni leswaku mi nga n’wi languteli ehansi un’wana wa lava lavatsongo; hikuva ndza mi byela leswaku tintsumi ta vona etilweni minkarhi hinkwayo ti vona xikandza xa Tatana la nge tilweni.” (Matewu 18:10) Hi marito lawa, Yesu a a nga vuli swona leswaku nandza un’wana ni un’wana wa Xikwembu u ni ntsumi leyi n’wi sirhelelaka. Kambe u tlhele a kombisa leswaku tintsumi leti tirhaka ni Xikwembu ta swi rhandza swirho swa vandlha ra Vukreste.

 Xana Diyavulosi a nga hi kanganyisa njhani?

▪ Yesu u lemukise valandzeri vakwe leswaku Sathana u ringeta ku tshikisa vanhu ku dyondza ntiyiso malunghana ni Xikwembu. U te: “Loko mani na mani a twa rito ra mfumo kambe a nga kumi mongo wa rona, lowo homboloka wa ta ivi a tsuvula leswi haxiweke embilwini yakwe.”—Matewu 13:19.

Yesu u boxe ndlela yin’wana leyi Sathana a kanganyisaka vanhu ha yona loko a byela vanhu xifaniso xa wanuna loyi a byaleke mbewu ya koroni ensin’wini yakwe. Wanuna yoloye u fanekisela Yesu, kasi koroni yi fanekisela Vakreste va ntiyiso lava nga ta fuma na Yesu etilweni. Hambiswiritano, Yesu u vule leswaku ku te nala kutani “a haxa mfava exikarhi ka koroni.” Mfava wu fanekisela Vakreste va mavunwa. “Nala loyi a [wu] haxeke i Diyavulosi.” (Matewu 13:25, 39) Tanihi leswi mfava wu fanaka ni koroni loko wa ha kula, vanhu lava tivulaka Vakreste va nga ha tikomba va ri vagandzeri va ntiyiso. Vukhongeri lebyi dyondzisaka mavunwa byi kanganyisa vanhu leswaku va nga xi yingisi Xikwembu. Sathana u tirhisa vukhongeri bya mavunwa ku endla leswaku vanhu va nga vi na vuxaka na Yehovha.

Hi nga tisirhelela njhani leswaku Sathana a nga hi hambukisi?

▪ Yesu u vule leswaku Sathana i “mufumi wa misava.” (Yohane 14:30) Loko Yesu a khongela eka Xikwembu u kombise ndlela leyi hi nga tisirhelelaka ha yona eka Sathana. Malunghana ni vadyondzisiwa vakwe, Yesu u khongele Tata wakwe wa le tilweni a ku: “U va rindza hikwalaho ka lowo homboloka. Vona a hi xiphemu xa misava, tanihi leswi mina ndzi nga riki xiphemu xa misava. Va kwetsimise hi ntiyiso; rito ra wena i ntiyiso.” (Yohane 17:15-17) Vutivi bya Rito ra Xikwembu byi nga hi sirhelela leswaku hi nga kuceteriwi hi misava leyi fumiwaka hi Sathana.

Xana tintsumi ti hi pfuna njhani namuntlha?

▪ Yesu u te: “Emakumu ka mafambiselo ya swilo: tintsumi ti ta huma kutani ti hambanisa lavo homboloka eka lavo lulama.” (Matewu 13:49) Sweswi hi hanya “emakumu ka mafambiselo ya swilo” naswona vanhu va timiliyoni va karhi va amukela mahungu lamanene ya Mfumo wa Xikwembu.—Matewu 24:3, 14.

Kambe a hi vanhu hinkwavo lava loko va sungula ku dyondza Bibele, Xikwembu xi va amukelaka. Tintsumi ti kongomisa ntirho wa malandza ya Yehovha naswona vanhu lava hakunene va rhandzaka Xikwembu va hambanisiwa ni lava alaka ku tirhisa leswi va swi dyondzaka. Loko Yesu a hlamusela lava Xikwembu xi va amukelaka u te: “[Lava] hi lava, endzhaku ko twa rito hi mbilu yo xonga, leyinene, va ri hlayisaka ivi va veka mihandzu hi ku tiyisela.”—Luka 8:15.

Leswaku u kuma rungula leri engetelekeke, vona ndzima 10 ya buku leyi nge Xana Bibele Yi Dyondzisa Yini Hakunene?, leyi kandziyisiweke hi Timbhoni ta Yehovha.

[Xifaniso lexi nga eka tluka 16]

Tintsumi ta pfuneta eku hlengeleteni ka vanhu va timbilu letinene evandlheni ra Vukreste