Goza 2

Papalata Ku Tiringanisa Ni Vanhu Van’wana

I YINI LESWI BIBELE YI SWI DYONDZISAKA? “Un’wana ni un’wana a a kombise leswi ntirho wa yena wu nga swona, kutani u ta va ni xivangelo xo khana malunghana na yena hi yexe, naswona ku nga ri hi ku tiringanisa ni munhu un’wana.”—Vagalatiya 6:4.

HI XIHI XIPHIQO XA KONA? Swi nga ha endleka leswaku hi rhandza ku tiringanisa ni vanhu van’wana—minkarhi yin’wana hi tiringanisa ni lava nga ni swilo switsongo eka swa hina. Kambe minkarhi yo tala hi tiringanisa ni lava nga ni rifuwo ro tala kumbe vuswikoti byo hi tlula. Ku nga khathariseki swivangelo swa kona, ku tiringanisa ni vanhu van’wana a hi swinene. Hi xihoxo, hi tibyela leswaku munhu u va wa nkoka hikwalaho ka leswi a nga na swona kumbe leswi a kotaka ku swi endla. Leswi swi nga ha endla leswaku hi va ni mavondzo kumbe hi ngheniwa hi moya wo phikizana.—Eklesiasta 4:4.

I YINI LESWI U NGA SWI ENDLAKA? Ringeta ku tilanguta hi ndlela leyi Yehovha a ku langutaka ha yona. “Munhu u vona ntsena leswi vonakaka ematihlweni; kambe loko ku ri Yehovha, * u vona leswi mbilu yi nga swona.” (1 Samuwele 16:7) Yehovha u ku teka u ri wa nkoka hi ku kambisisa mbilu, mianakanyo ni makungu ya wena, ku nga ri hi ku ku ringanisa ni vanhu van’wana. (Vaheveru 4:12, 13) Yehovha wa swi tiva leswaku ku na laha u tsandzekaka kona naswona u lava leswaku na wena u swi tiva sweswo. Ku tiringanisa ni vanhu van’wana swi ta endla leswaku u tikurisa kumbe u nga eneriseki nkarhi hinkwawo. Kambe ku titsongahata swi ta ku pfuna u swi xiya leswaku a wu nge koti swilo hinkwaswo.—Swivuriso 11:2.

Hi swihi swilo swa xiviri leswi u faneleke u swi endla leswaku Xikwembu xi ku teka u ri wa nkoka? Xi huhutele muprofeta Mikiya ku tsala a ku: “Wena munhu wa la misaveni, u ku byerile leswi swi nga swinene. Xana Yehovha u kombela leswaku u n’wi tlherisela yini, loko ku nga ri ku kombisa vululami ni ku rhandza musa ni ku titsongahata loko u famba ni Xikwembu xa wena?” (Mikiya 6:8) Loko u landzela ndzayo leyi, Xikwembu xi ta ku khathalela. (1 Petro 5:6, 7) Hakunene leswi hi swona leswi nga ta endla leswaku u eneriseka!

[Nhlamuselo ya le hansi]

[Xifaniso lexi nga eka tluka 5]

Yehovha u hi teka hi ri va nkoka hi ku ya hileswi nga etimbilwini ta hina