Goza 1

Rhandza Vanhu, Ku Nga Ri Mali Ni Rifuwo

I YINI LESWI BIBELE YI SWI DYONDZISAKA? “Ku rhandza mali i rimitsu ra mixaka hinkwayo ya swilo swo biha.”—1 Timotiya 6:10.

HI XIHI XIPHIQO XA KONA? Vanavetisi va endla leswaku hi nga eneriseki hi leswi hi nga na swona. Va lava leswaku hi tshama hi ri eku tirheni leswaku hi ta kuma mali leyi hi nga ta yi tirhisa ku xava swilo leswintshwa kumbe swilo leswikulu. Mali ya kanganyisa naswona swa olova ku sungula ku yi rhandza lerova hi yi teka yi ri ya nkoka swinene evuton’wini. Hambiswiritano, Bibele yi vula leswaku munhu la rhandzaka rifuwo a nge pfuki a enerisekile. Hosi Solomoni u te: “La rhandzaka silivhere ntsena a nge enerisiwi hi silivhere, hambi ku ri la rhandzaka rifuwo a nge enerisiwi hi vuyelo.”—Eklesiasta 5:10.

I YINI LESWI U NGA SWI ENDLAKA? Tekelela Yesu, kutani u dyondza ku rhandza vanhu ku tlula swilo hinkwaswo. Yesu a a tiyimiserile ku lahlekeriwa hi swilo hinkwaswo leswi a a ri na swona—hambi ku ri vutomi byakwe—hikwalaho ka leswi a a rhandza vanhu. (Yohane 15:13) U te: “Ku nyika swi tisa ntsako lowukulu ku tlula ku amukela.” (Mintirho 20:35) Loko hi swi endla mukhuva ku nyika vanhu van’wana nkarhi ni rifuwo ra hina, va ta hi endlela leswi fanaka na vona. Yesu u te: “Hanyani hi ku nyika, kutani vanhu va ta mi nyika.” (Luka 6:38) Lava hlongorisaka mali ni rifuwo va tivangela switlhavi ni ku xaniseka. (1 Timotiya 6:9, 10) Hi hala tlhelo, ku eneriseka ka xiviri hi ku kuma hi ku rhandza vanhu van’wana lava na vona va hi rhandzaka.

Ha yini u nga tikambisisi ku vona loko u ta swi kota ku olovisa vutomi bya wena? Xana u nga hunguta rifuwo ra wena kumbe leswi u lavaka ku swi xava? Hi ku endla tano, u ta kuma leswaku u ni nkarhi lowu engetelekeke ni matimba yo endla swilo swa nkoka evuton’wini, swo tanihi ku pfuna vanhu leswaku va gandzela Xikwembu, lexi ku nyikeke hinkwaswo leswi u nga na swona.—Matewu 6:24; Mintirho 17:28.

[Xifaniso lexi nga eka tluka 4]

“Hanyani hi ku nyika, kutani vanhu va ta mi nyika”