Goza 3

Tlangela Leswi U Endleriwaka Swona

I YINI LESWI BIBELE YI SWI DYONDZISAKA? “Nkhensani mayelana ni hinkwaswo.”—1 Vatesalonika 5:18.

HI XIHI XIPHIQO XA KONA? Hi hanya ni vanhu lava titlakusaka ni lava nga nkhensiki naswona swi nga olova ku tekelela mahanyelo ya vona. (2 Timotiya 3:1, 2) Ku engetela kwalaho, hi nga ha titwa hi boheka ku engetela mintirho yin’wana eka leyi hi nga na yona naswona yi endlaka leswaku hi tshama hi khomekile. Leswi swi nga hi vangela swiphiqo kumbe swi endla leswaku hi hlongorisa ntsako lerova hi nga vi na wona nkarhi wo tlangela leswi se hi nga na swona kumbe ku tlangela leswi van’wana va hi endlelaka swona.

I YINI LESWI U NGA SWI ENDLAKA? Tinyike nkarhi wo anakanyisisa hi swilo leswi u tiphinaka ha swona sweswi. I ntiyiso leswaku minkarhi yin’wana u ta langutana ni swiphiqo. Kambe xiya xikombiso xa Hosi Davhida. Minkarhi yin’wana a a titwa a pfotlosekile embilwini hikwalaho ka miringo. Nilokoswiritano, u khongele eka Xikwembu a ku: “Ndzi anakanyisise hi ntirho wa wena hinkwawo; ndzi hambete ndzi anakanyisisa hi ntirho wa mavoko ya wena hi ku tirhandzela.” (Pisalema 143:3-5) Hambileswi a a langutane ni miringo, Davhida a nga tshikanga ku tlangela naswona u tshame a enerisekile.

Anakanya hi swilo leswi van’wana va ku pfuneke ha swona kutani u va nkhensa. Yesu u veke xikombiso lexinene emhakeni leyi. Hi xikombiso, loko munghana wakwe Mariya a n’wi chele hi mafurha yo durha enhlokweni ni le milengeni, van’wana va vutise va ku: “Ha yini mafurha yo nun’hwela ma tlangisiwe hi ndlela leyi?” * Vaxopaxopi volavo a va vona onge mafurha wolawo a ma fanele ma xavisiwile kutani mali ya kona yi nyikiwa swisiwana. Kambe Yesu u hlamule a ku: “Tshikani wansati loyi. Ha yini mi ringeta ku karhata wansati loyi? U ndzi endlele xiendlo lexinene.” (Marka 14:3-8; Yohane 12:3) Ematshan’weni yo dzikisa mianakanyo yakwe eka leswi Mariya a nga swi endlangiki, Yesu u n’wi nkhensile hikwalaho ka leswi a swi endleke.

Vanhu van’wana va sungula ku tlangela swirho swa ndyangu, vanghana kumbe mikateko yin’wana leyi va veke na yona endzhaku ka loko vanhu va kona se va file. Sweswo u nga swi papalata hi ku anakanyisisa hi swilo leswi sweswi u tiphinaka ha swona! Ha yini u nga swi tsali ehansi swilo leswi sweswi u swi tlangelaka?

Leswi “nyiko yin’wana ni yin’wana leyinene” yi humaka eka Xikwembu, hi fanele hi xi nkhensa loko hi khongela. (Yakobo 1:17) Loko nkarhi na nkarhi hi endla tano, swi ta hi pfuna leswaku hi va ni moya wo tlangela naswona hi eneriseka.—Vafilipiya 4:6, 7.

[Nhlamuselo ya le hansi]

[Xifaniso lexi nga eka tluka 6]

Xana wa swi tlangela leswi van’wana va ku endlelaka swona?