Xana A Wu Swi Tiva?

Xana muapostola Pawulo a a vula yini loko a vula leswaku u rhwale “mimfungho ya hlonga ra Yesu” emirini wakwe?—Vagalatiya 6:17.

▪ Swi nga ha endleka leswaku vanhu lava a va yingise Pawulo hi lembe-xidzana ro sungula loko a vula marito lawa va ma twisise hi tindlela to hambana-hambana. Hi xikombiso, khale ka vabohiwa lava kumiweke enyimpini, vanhu lava yivaka etitempeleni ni mahlonga a wu va vona hi ku va va funghiwe hi nsimbi leyi hisaka emirini wa vona. Loko vanhu va funghiwe hi ndlela yoleyo, a va tekiwa va ri lava nga xiximekiki.

Kambe a hi mimfungho hinkwayo leyi a yi tekiwa yi nga xiximeki. Vanhu vo tala va khale a va tirhisa mimfungho ku kombisa leswaku i va rixaka rihi kumbe ku kombisa vukhongeri lebyi va nga eka byona. Hi xikombiso, hi ku ya hi Theological Dictionary of the New Testament, “Vasiriya a va teka Hadada na Atargatis tanihi swikwembu leswi kwetsimaka naswona a va ri ni mimfungho ya swona emavokweni ni le tinhan’wini ta vona . . . Kasi lava gandzelaka xikwembu lexi vuriwaka Dionysus a va ri ni mfungho wa kamba ra ivy.”

Vahlamuseri vo tala va manguva lawa va vula leswaku Pawulo a a kombetela eka swivati leswi a veke na swona loko a bukuteriwa hi nkarhi wa vutirheli byakwe bya Vukreste. (2 Vakorinto 11:23-27) Swi nga ha endleka leswaku Pawulo a a vula ndlela leyi a a hanya ha yona leyi n’wi kombiseke tanihi Mukreste, ku nga ri mimfungho ya xiviri.

Xana miti ya vutumbelo ya le Israyele wa khale a yi hundzuke vutumbelo bya swigevenga?

▪ Etindhawini leti khale a ku tshama vahedeni, titempele to tala a ti tirha tanihi vutumbelo bya swigevenga naswona vanhu lava balekeke ematikweni ya vona a va tshama eka tona. Emalembeni ya le xikarhi, tiyindlu ta vukhongeri ni tikereke to tala ta Vujagana a ti tirhiseriwa leswi fanaka. Milawu leyi khumbaka miti ya vutumbelo ya khale ya le Israyele yi kombisa leswaku a yi nga tirhiseriwi swona sweswo.

Nawu wa Muxe a wu vula leswaku miti yoleyo ya vutumbelo yi fanele yi sirhelela ntsena vanhu lava dlayeke vanhu van’wana hi xihoxo. (Deteronoma 19:4, 5) Munhu loyi a dlayeke a a ta balekela emutini wa le kusuhi, leswaku maxaka ya mufi ma nga n’wi dlayi. Endzhaku ko hlamusela leswi humeleleke eka vakulukumba va muti, a a ta tengisiwa emutini lowu rifu ri nga endleka eka wona. Laha hi kona laha a a ta hlamusela leswi endlekeke. Vakulukumba a va ta kambisisa vuxaka lebyi a a ri na byona ni mufi, ku kambela loko ku ri hileswaku a va nga vengani.—Tinhlayo 35:20-24; Deteronoma 19:6, 7; Yoxuwa 20:4, 5.

Loko a nga voniwanga nandzu a a fanele a ya emutini lowu nga ekusuhi kutani a tshama kona. Miti yoleyo a yi nga ri makhotso. A a ta ya emahlweni a ri la amukelekaka eka vanhu va muti wolowo. Loko muprista lonkulu a fa, vanhu hinkwavo lava a va tshama emitini yoleyo ya vutumbelo a va tlhelela emakaya ya vona va hlayisekile.—Tinhlayo 35:6, 25-28.

[Mepe lowu nga eka tluka 15]

(Leswaku u vona rungula leri hleriweke hi ku helela, vona nkandziyiso wa kona)

MITI YA VUTUMBELO

1 KEDEXI

2 GOLANI

3 RHAMOTI-GILIYADI

4 XIKEME

5 BESERI

6 HEBRONI

Nambu wa Yordani