Xana Swa Koteka Ku Eneriseka?

“Ku eneriseka ku endla swisiwana swifumi; ku nga eneriseki ku endla swifumi swisiwana.”—Benjamin Franklin.

XI VURISILE xivuriso xexo, vanhu vo tala va dyondze leswaku ku eneriseka a ku xaviwi. A swi hlamarisi leswi ku eneriseka swi nga oloviki emisaveni leyi khutazaka ku hlongorisa rifuwo, swilo leswikulu kumbe ku lava ku tiphina ku fana ni vanhu van’wana! Xana yin’wana ya timhaka leti longoloxiweke laha hansi yi tshame yi ku khumba?

• Vanavetisi va tshamela ku ku byela leswaku u ta eneriseka ntsena loko u xava swilo swo tala.

• Ku phikizana entirhweni kumbe exikolweni ku endla leswaku u lava ku endla swilo leswi endliwaka hi van’wana.

• Vanhu a va swi tlangeli leswi u va endlelaka swona.

• Vanghana va wena va endla leswaku u navela leswi va nga na swona.

• Swivutiso swa nkoka leswi u nga na swona evuton’wini a swi hlamuriwi.

Loko u langutane ni swiphiqo swo tano, xana swi nga olova leswaku u eneriseka? Muapostola Pawulo u vulavule hi “xihundla xa ku xurha.” Minkarhi yin’wana a a ri ni swo tala, kasi minkarhi yin’wana a a kayivela. Vanghana vakwe a va n’wi xixima kambe vanhu van’wana a va n’wi vungunya. U vule leswaku u ‘dyondze ku eneriseka eka xiyimo xin’wana ni xin’wana lexi a nga eka xona.’—Vafilipiya 4:11, 12.

Ku eneriseka i xihundla eka vanhu lava nga si tshamaka va ku lava, kambe hilaha Pawulo a vuleke hakona, hi nga ku dyondza. Ha ku rhamba leswaku u kambisisa magoza ya ntlhanu lama nga ku pfunaka leswaku u eneriseka lama nga eRitweni ra Xikwembu, ku nga Bibele.