Swivutiso Swa Vahlayi . . .

Xana Yi Kwihi Paradeyisi Leyi Ku Vulavuriwaka Ha Yona eBibeleni?

▪ Yesu u tshembise wanuna la kombiseke ripfumelo eka yena loyi a a ri ekusuhi ni ku fa a ku: “U ta va na mina eParadeyisini.” (Luka 23:43) Xana Paradeyisi leyi a yi tshembiseke wanuna yoloye yi ta va kwihi? Xana yi ta va etilweni, emisaveni kumbe endhawini yin’wana leyi vanhu va rindzeleke ku avanyisiwa eka yona?

Vatswari va hina vo sungula a va tshama eParadeyisini. Bibele yi ri: “Yehovha Xikwembu a rima ntanga aEdeni hi tlhelo ra le vuxeni kutani a veka kona munhu loyi a n’wi vumbeke. Kutani Yehovha Xikwembu a teka munhu a n’wi veka entangeni wa Edeni leswaku a wu rima ni ku wu khathalela.” (Genesa 2:8, 15) Loko marito lawa ma hundzuluxeriwa hi Xigriki, rito leri nge “ntanga” ri va pa·raʹdei·sos, ku nga rito ra Xinghezi leri vulaka “paradeyisi.”

Tanihi leswi mpatswa wu ndlandlamuxaka kaya ra wona loko wu ya wu kuma vana, hilaha ku fanaka, vatswari va hina vo sungula a va ta endla leswaku Paradeyisi leyi a yi ri entangeni wa Edeni yi ndlandlamuka loko vanhu va ya va velekiwa. Xikwembu xi va byele leswi: “Mi tata misava, mi yi fuma.”—Genesa 1:28.

Kutani xikongomelo xa Muvumbi wa hina a ku ri leswaku vanhu va hanya va tlhela va kuma vana eParadeyisini kwala misaveni. A va ta hanya laha misaveni hilaha ku nga heriki naswona a ku nga ta va na masirha. Misava a yi ta va kaya ra vanhu hilaha ku nga heriki. Kutani a swi hlamarisi leswi ntumbuluko wu hi tsakisaka swinene! A hi vumberiwe ku hanya emisaveni yo saseka.

Xana xikongomelo xa Xikwembu hi misava xi cincile? Doo! Hikuva Yehovha u hi tiyisekisa a ku: “Hikwalaho ni rito ra mina leri humaka enon’wini wa mina ri ta endlisa sweswo. A ri nge tlheleli eka mina ri nga ri na vuyelo, kambe kunene ri ta endla leswi ndzi swi tsakelaka.” (Esaya 55:11) Endzhaku ka malembe yo tlula 3 000 vanhu va vumbiwile, Bibele yi vule leswaku “Muvumbi wa misava ni Muendli wa yona” a ‘nga yi tumbuluxelanga swa hava,’ kambe u yi ‘vumbe leswaku ku akiwa eka yona.’ (Esaya 45:18) Xikongomelo xa Xikwembu a xi si cinca. Misava ya ha ta va paradeyisi.

Lexi tsakisaka hileswaku tindzimana to tala ta Bibele leti vulavulaka hi Paradeyisi ti hlamusela ndlela leyi vutomi byi nga ta va ha yona laha misaveni. Hi xikombiso, vuprofeta bya Esaya byi ri: “Va ta aka tindlu va tshama eka tona; kunene va ta rima masimu ya vhinya va dya mihandzu ya wona.” (Esaya 65:21) Xana tindlu ti akiwa kwihi naswona masimu ya vhinya ma kwihi? Xana mihandzu yi dyiwa kwihi? Laha misaveni. Swivuriso 2:21 yi swi veka erivaleni loko yi ku: “Lavo lulama hi vona lava nga ta tshama emisaveni.”

Yesu na yena u vulavule hi paradeyisi ya laha misaveni. I ntiyiso leswaku u tlhele a vulavula ni hi vanhu lava nga ta ya etilweni, kambe vanhu va kona a hi vangani. (Luka 12:32) Endzhaku ka rifu, va pfuxeriwa ku ya hanya etilweni naswona va ya hlangana na Kreste leswaku va ta fuma Paradeyisi. (Nhlavutelo 5:10; 14:1-3) Va ta tiyisekisa leswaku swilo swi famba kahle eParadeyisini leyi nga ta va laha misaveni naswona swi famba hilaha Xikwembu xi swi lavaka hakona.

Yesu a a swi tiva leswaku lexi hi xona xikongomelo xa Xikwembu hi misava. A a ri etilweni ni Tata wakwe loko ku tumbuluxiwa ntanga wa Edeni. Namuntlha vanhu hinkwavo lava kombisaka ripfumelo hi vona lava nga ta hanya eparadeyisini. (Yohane 3:16) Yesu u tshembisa vanhu volavo a ku: ‘Mi ta va na mina eParadeyisini.’—Luka 23:43.

[Laha Xifaniso Xi Humaka Kona eka tluka 25]

© FORGET Patrick/SAGAPHOTO.COM/Alamy