Ha Yini Vukati Byo Tala Byi Fa?

“Vafarisi va ta eka [Yesu] hi xikongomelo xo n’wi ringa, va ku: ‘Xana swa pfumeleriwa leswaku wanuna a tshika nsati wakwe hi xivangelo xihi na xihi?’”—Matewu 19:3.

VANHU van’wana lava a va hanya enkarhini wa Yesu a va nga tshembi leswaku vukati byi nga tshama nkarhi wo leha. Kutani Yesu u va byele a ku: “Xana a mi hlayanga leswaku loyi a va tumbuluxeke eku sunguleni u va endle va va waxinuna ni waxisati kutani a ku, ‘Hikwalaho ka sweswo, wanuna u ta siya tata wakwe ni mana wakwe naswona u ta namarhela nsati wakwe, kutani lavambirhi va ta va nyama yin’we’? Kutani a va ha ri vambirhi, kambe i nyama yin’we. Hikokwalaho, leswi Xikwembu xi swi paneke swin’we, ku nga tshuki ku va ni munhu la swi hambanisaka.” * (Matewu 19:4-6) Swi le rivaleni leswaku Xikwembu a xi lava leswaku vukati byi tshama nkarhi wo leha.

Ematikweni yo tala namuntlha, vukati bya kwalomu ka 40 wa tiphesente kumbe ku tlula bya ‘hambanisiwa,’ naswona leswi swi endla leswaku byi dlayiwa. Xana xitsundzuxo xa Bibele malunghana ni vukati xi hundzeriwe hi nkarhi? Xana swi nga ha endleka leswaku vukati byi fa hikwalaho ka leswi masungulo ya byona ma nga riki manene?

Xiya xikombiso lexi: Mimpatswa yimbirhi yi xava timovha to fana. Mpatswa wo sungula wu yi khathalela kahle movha wa yona naswona wu yi chayela kahle. A wu onhaki. Mpatswa lowu wa vumbirhi a wu na mhaka ni movha wa wona naswona a wu wu chayeli kahle. Movha wa wona wa onhaka kutani wu wu tshika. Xana xiphiqo xi ni movha kumbe vini va wona? Swi le rivaleni leswaku xi ni vini va wona.

Hilaha ku fanaka, ku fa ka vukati byo tala a swi vuli swona leswaku ku na leswi nga hoxeka hi lunghiselelo ra vukati. Vukati byo tala lebyi fambaka kahle byi tiyisekisa mhaka leyi. Byi endla leswaku vanhu, mindyangu ni vaaka-tiko va tiphina. Kutani vukati byi lava ku khathaleriwa minkarhi hinkwayo ku fana ni movha.

Ku nga khathariseki leswaku wa ha ku cata kumbe se i malembe, xitsundzuxo xa Bibele malunghana ni ku byi khathalela ni ku byi tiyisa xi nga ku pfuna swinene. Hlaya hi swikombiso swin’wana eka xihloko lexi landzelaka.

[Nhlamuselo ya le hansi]