‘Xa Swi Navela’
Tshinela Eka Xikwembu
‘Xa Swi Navela’
SWI hi twisa ku vava ku vona munhu loyi hi n’wi rhandzaka a xaniseka kutani a fa. Hi ntumbuluko hi va ni gome loko sweswo swi endleka. Hambiswiritano, swa chavelela ku tiva leswaku Yehovha Xikwembu la nga Muvumbi wa hina, wa ri xiya gome leri hi nga na rona. Ku tlula kwalaho, u swi navela hi mbilu yakwe hinkwayo ku tirhisa matimba yakwe leswaku a pfuxa lava feke. Xiya ntshembo lowu kumekaka emaritweni ya Yobo, lama nga eka Yobo 14:13-15.
Anakanya hi xiyimo lexi Yobo a a ri eka xona. Yobo a a ri ni ripfumelo leri tiyeke naswona u langutane ni miringo yo hlayanyana, leyi katsaka ku lahlekeriwa hi rifuwo rakwe, ku feriwa hi vana vakwe hinkwavo lava a va rhandza ni ku hlaseriwa hi vuvabyi lebyi vavaka. Loko a tshikileleke swinene, u rilele Xikwembu hi xikhongelo a ku: “Onge u nga ndzi tumbeta eSheol [ku nga sirha leri tolovelekeke ra vanhu].” (Ndzimana 13) Yobo a a ehleketa leswaku maxangu yakwe ma ta hela loko o ya eSheol. A a tibyela leswaku a nge vi na maxangu ni switlhavi loko a ri eSheol, ku fana ni xuma lexi tumbetiweke hi Xikwembu. *
Xana Yobo a a ta tshama eSheol hilaha ku nga heriki? Yobo a a swi tiva leswaku sweswo a swi nge endleki. Loko a ya emahlweni ni xikhongelo xakwe u te: “Onge u nga . . . ndzi vekela nkarhi kutani u ndzi tsundzuka!” Yobo a a tiyiseka leswaku a nge tshami nkarhi wo leha eSheol nileswaku Yehovha a nge n’wi rivali. U fanise nkarhi lowu a a ta wu heta eSheol ni “ntirho wo sindzisiwa”—leswi vulaka leswaku a a ta heta nkarhi wo karhi. A a ta rindza nkarhi wo tanihi kwihi? U te: “Kukondza ku fika ntshunxeko wa mina.” (Ndzimana 14) A a vula ku ntshunxiwa eSheol, ku nga ku pfuxiwa eku feni!
Ha yini Yobo a a tiyiseka leswaku u ta ntshunxiwa? Xivangelo hileswaku a yi tiva ndlela leyi Muvumbi wa hina wa rirhandzu a titwaka ha yona hi vagandzeri vakwe vo tshembeka lava feke. U te: “U ta vitana, mina ndzi ta ku hlamula. U ta navela ntirho wa mavoko ya wena.” (Ndzimana 15) Yobo a a swi tiva leswaku u vumbiwe hi Xikwembu. Munyiki wa Vutomi la tiyisekiseke leswaku wa hlayiseka ku sukela loko a ha ri ekhwirini, a a ta n’wi pfuxa loko a file.—Yobo 10:8, 9; 31:15.
Marito ya Yobo ma hi dyondzisa leswaku Yehovha u ni ntwela-vusiwana, u ni vuxaka byo hlawuleka ni vanhu vo fana na Yobo, lava tivekaka emavokweni yakwe, va n’wi pfumelela leswaku a va vumba va va vanhu lava navelekaka eka yena. (Esaya 64:8) Yehovha u va teka va ri va risima vagandzeri vakwe vo tshembeka. Kutani lava feke, wa va “navela.” Xidyondzi xin’wana xi vule leswaku rito leri, leri hundzuluxeriweke ri suka eka Xiheveru i “rin’wana ra marito lama yi hlamuselaka kahle ndlela leyi munhu a wu navelaka ha yona nchumu wo karhi.” Yehovha a ngo va tsundzuka ntsena vagandzeri vakwe, kambe wa swi navela ku va pfuxa.
Lexi tsakisaka hileswaku ebukwini ya Yobo—leyi ku nga yin’wana ya tibuku to sungula ku tsariwa eBibeleni—Yehovha u vone swi fanerile ku paluxa xikongomelo xakwe xo pfuxa vanhu lava feke. * U lava ku tlhela a ku hlanganisa ni varhandziwa wa wena lava feke. Leswi swi ta ku pfuna leswaku u tiyisela loko u feriwile. Ha yini u nga dyondzi leswi engetelekeke hi Xikwembu lexi xa rirhandzu ni ndlela leyi u nga xi pfumelelaka ha yona leswaku xi ku vumba leswaku u va un’wana wa vanhu lava nga ta vona ku hetiseka ka xikongomelo xa xona?
Tindzimana ta Bibele leti u nga ti hlayaka hi March:
[Tinhlamuselo ta le hansi]
^ par. 4 Buku yin’wana yi vula leswaku marito ya Yobo lama nge “u nga ndzi tumbeta,” ma nga ha vula “ku [ndzi] veka endhawini yo sirheleleka ku fana ni swilo swa risima.” Yin’wana yi vula leswaku marito wolawo ma nga ha vula “ku ndzi tumbeta ku fana ni xuma.”
^ par. 8 Leswaku u dyondza leswi engetelekeke hi xitshembiso xa le Bibeleni malunghana ni ku pfuxiwa ka lava feke emisaveni leyintshwa yo lulama, vona ndzima 7 ya buku leyi nge Xana Bibele Yi Dyondzisa Yini Hakunene? leyi kandziyisiweke hi Timbhoni ta Yehovha.
