Minkarhi Yo Antswa Yi Kwala Nyongeni!

“Hi nkarhinyana, lowo homboloka a nge he vi kona . . . Kambe lavo rhula va ta dya ndzhaka ya misava, hakunene va ta kuma ntsako lowu heleleke eku rhuleni lokukulu.”—PISALEMA 37:10, 11.

XANA u nga swi tsakela ku vona vuprofeta lebyi tshahiweke laha henhla byi hetiseka? Swi le rivaleni leswaku u nga swi tsakela. Ku ni swivangelo leswi twalaka swo pfumela leswaku byi ta hetiseka ku nga ri khale.

Swihloko leswi hundzeke swi hlamusele byin’wana bya vuprofeta bya Bibele lebyi kombisaka leswaku hi hanya “emasikwini yo hetelela.” (2 Timotiya 3:1-5) Xikwembu xi huhutele vatsari va Bibele ku profeta hi swiendlakalo sweswo leswaku hi ta va ni ntshembo. (Varhoma 15:4) Ku hetiseka ka vuprofeta byebyo swi vula leswaku maxangu lawa hi langutanaka na wona sweswi ma ta hela ku nga ri khale.

I yini leswi nga ta endleka endzhaku ka masiku yo hetelela? Mfumo wa Xikwembu wu ta fuma vanhu hinkwavo. (Matewu 6:9) Xiya leswi Bibele yi swi vulaka malunghana ni misava ya nkarhi wolowo:

● Ndlala yi ta herisiwa. “Ku ta va ni mavele yo tala emisaveni; ma ta khapakhapa etinhlohlorhini ta tintshava.”—Pisalema 72:16.

● Vuvabyi byi ta herisiwa. “Ku hava munhu la tshamaka kona la nga ta ku: ‘Ndza vabya.’”—Esaya 33:24.

● Misava yi ta endliwa yi va leyintshwa. “Mananga ni ndhawu leyi nga riki na mati swi ta khana, ni timbala ta le kwandzasini ti ta tsaka, ti rhumbuka kukota safroni.”—Esaya 35:1.

Lebyi i byin’wana bya vuprofeta bya Bibele lebyi khutazaka lebyi nga ta hetiseka ku nga ri khale. Ha yini u nga kombeli Timbhoni ta Yehovha ti ku hlamusela leswaku ha yini ti tiyiseka leswaku minkarhi yo antswa yi kwala nyongeni?