Vuprofeta Byo Sungula. Ku Tsekatseka Ka Misava

“Ku ta va ni ku tsekatseka lokukulu ka misava.”—LUKA 21:11.

● Winnie, la nga ni tin’hweti ta 16, u ponisiwe eka muako lowu weke eHaiti. Ntlawa wa vateki va mahungu va le ka TV lava vikeke hi mhangu yoleyo va n’wi twe a ri karhi a konya. U ponile kambe vatswari vakwe va file.

I YINI LESWI MATIMU MA SWI VULAKA? Ku fe vanhu vo tlula 300 000 eka ku tsekatseka ka misava loku pimiweke ku va 7,0 loku hlaseleke xihlala xa Haiti hi January 2010. Hi xitshuketa vanhu lava endlaka 1,3 wa timiliyoni va sale va nga ri na makaya. Hambileswi ku veke ni ku tsekatseka lokukulu eHaiti, xiendlakalo lexi a xi endlekanga kona ntsena. Exikarhi ka April 2009 na April 2010, ku ve ni ku tsekatseka lokukulu ka misava ka 18 emisaveni hinkwayo.

I YINI LESWI VANHU VA SWI VULAKA? Ku tsekatseka ka misava a ka ha talanga; hikwalaho ka thekinoloji ya manguva lawa, sweswi hi hatla hi ku vona ku tlula enkarhini lowu nga hundza.

XANA LESWI VA SWI VULAKA I NTIYISO? Xiya ntiyiso lowu: Bibele a yi vuli leswaku ku tsekatseka ka misava ku ta humelela kangani emasikwini yo hetelela. Kambe yi vula leswaku ku ta va ni ‘ku tsekatseka lokukulu ka misava, ku suka endhawini yin’wana ku ya eka yin’wanyana,’ naswona a ku ta va xin’wana xa swikombiso leswi xiyekaka enkarhini lowu wa makumu.—Marka 13:8; Luka 21:11.

U EHLEKETA YINI? Xana ha ku vona ku tsekatseka lokukulu ka misava hilaha Bibele yi profeteke hakona?

A hi ku tsekatseka ka misava ntsena loku nyikelaka vumbhoni bya leswaku hi hanya emasikwini yo hetelela. Lebyi i vuprofeta byo sungula lebyi nga eku hetisekeni. Kutani a hi kambisiseni bya vumbirhi.

[Marito lama tshahiweke exihlokweni lama nga eka tluka 4]

“Hina [vakambisisi va swa ntumbuluko] hi swi vitana ku tsekatseka lokukulu ka misava. Kambe vanhu va swi teka ku ri swiendlakalo leswi tsemaka nhlana.”—KEN HUDNUT, MUKAMBISISI WA SWA NTUMBULUKO WA LE UNITED STATES.

[Laha Xifaniso Xi Humaka Kona eka tluka 4]

© William Daniels/Panos Pictures