Swivutiso Swa Vahlayi . . .

Xana Swi Ta Hi Phirha Ku Hanya Hilaha Ku Nga Heriki eParadeyisini?

▪ Bibele yi hi nyika ntshembo wa leswaku hi ta hanya hilaha ku nga heriki emisaveni leyi nga Paradeyisi. (Pisalema 37:29; Luka 23:43) Xana swi ta hi phirha ku hanya hilaha ku nga heriki endhawini yoleyo yo xonga?

Xexo i xivutiso xa nkoka. Valavisisi va xiye leswaku ku tshamela ku phirheka swi nga ha endla leswaku munhu a vilela, a tshikileleka naswona a nga ha veka vutomi byakwe ekhombyeni. Lava nga xi voniki xikongomelo xa vutomi kumbe va endlaka nchumu wun’we siku ni siku, va nga ha titwa va phirheka. Xana lava nga ta hanya eParadeyisini a va nge vi na xikongomelo evuton’wini? Xana leswi va nga ta swi endla siku ni siku swi ta va phirha?

Tsundzuka leswaku Yehovha Xikwembu, la nga Mutsari wa Bibele, hi yena la nyikaka vanhu vutomi lebyi nga heriki. (Yohane 3:16; 2 Timotiya 3:16) Mfanelo leyikulu ya Xikwembu i rirhandzu. (1 Yohane 4:8) Yehovha u hi rhandza hinkwerhu naswona u hi nyike swilo hinkwaswo leswinene leswi hi tiphinaka ha swona sweswi.—Yakobo 1:17.

Leswaku hi tsaka, Muvumbi wa hina wa swi tiva leswaku hi fanele hi endla ntirho wa nkoka. (Pisalema 139:14-16; Eklesiasta 3:12) EParadeyisini vutomi byi ta tsakisa naswona byi ta va byi ri ni xikongomelo. Ntirho lowu hi nga ta wu endla wu ta vuyerisa hina swin’we ni lava hi va rhandzaka. (Esaya 65:22-24) Loko u ri ni ntirho wo tsakisa, xana u nga vula leswaku vutomi bya phirha?

Nakambe tsundzuka leswaku Yehovha Xikwembu a nge pfumeleli mani na mani ku hanya eParadeyisini. Vutomi lebyi nga heriki u byi nyika ntsena lava tekelelaka N’wana wakwe, ku nga Yesu. (Yohane 17:3) Loko Yesu a ri laha misaveni, a a tsakela ku endla ku rhandza ka Tata wakwe. U dyondzise valandzeri vakwe hi rito ni hi swiendlo leswaku ntsako wa hilaha ku nga heriki wu tisiwa hi ku nyika ku ri ni ku amukela. (Mintirho 20:35) Vanhu hinkwavo lava nga ta hanya eParadeyisini leyi pfuxetiweke va ta hanya hi milawu yimbirhi leyikulu, ku nga ku rhandza Xikwembu ni muakelani. (Matewu 22:36-40) Tivone hi mahlo ya mianakanyo u rhendzeriwe hi vanhu lava pfumalaka vutianakanyi lava ku rhandzaka va tlhela va rhandza ntirho wa vona! U ehleketa leswaku u nga phirheka loko u ri ni vanhu vo tano?

I yini swin’wana leswi hi nga ta tiphina ha swona eParadeyisini? Siku ni siku hi ta dyondza swilo leswintshwa hi Muvumbi wa hina. Ku ni swilo swo tala swo hlamarisa leswi valavisisi se va swi tshubuleke leswi khumbaka mintirho ya Yehovha yo tumbuluxa. (Varhoma 1:20) Kambe a swi talanga swilo leswi hi swi tivaka hi ntumbuluko wa Yehovha. Eka malembe ya magidi lama hundzeke, wanuna wo tshembeka Yobo u vule leswi a a swi tiva malunghana ni mintirho ya Yehovha yo tumbuluxa, naswona leswi a gimeteke ha swona swa ha ri tano. U te: “Leswi ko va swiphemunyana swa tindlela ta [Xikwembu], phela i mhaka leyi hleveteriwaka malunghana na xona! I mani la nga twisisaka ku dzindza ka xona ka matimba?”—Yobo 26:14.

Ku nga khathariseki leswaku hi ta hanya nkarhi wo tanihi kwihi, a hi nge yi tivi hinkwayo mintirho ya Yehovha Xikwembu. Bibele yi vula leswaku Xikwembu xi hi vumbe hi ri lava navelaka ku hanya hilaha ku nga heriki. Yi tlhela yi vula leswaku a hi nge “pfuki [hi] wu twisisile ntirho lowu Xikwembu xa ntiyiso xi wu endleke ku sukela eku sunguleni ku ya eku heteleleni.” (Eklesiasta 3:10, 11) Xana u ehleketa leswaku swi ta kala swi ku phirha ku dyondza swilo leswintshwa hi Muvumbi wa wena?

Hambi ku ri sweswi, vanhu lava khomekeke hi ntirho lowu vuyerisaka van’wana naswona wu dzunisaka Xikwembu, a va phirheki. Hi nga tiyiseka leswaku loko hi tshama hi khomekile hi ku endla ntirho wolowo, a hi nge pfuki hi phirhekile—hambiloko se hi hanya hilaha ku nga heriki.

[Laha Swifaniso Swi Humaka Kona eka tluka 27]

Earth: Image Science and Analysis Laboratory, NASA-Johnson Space Center; Galaxy: The Hubble Heritage Team (AURA/STScI/NASA)