Tshinela Eka Xikwembu

“Yehovha I Murisi Wa Mina”

LANGUTA xifaniso lexi nga eka tluka leri. Xana wa yi vona ndlela leyi xinyimpfana lexi xi sirhelelekeke ha yona exifuveni xa murisi wa xona? Eka Pisalema 23, Bibele yi tirhisa xifaniso xa murisi ku kombisa ndlela leyi Yehovha a va khathalelaka ha yona vagandzeri vakwe. Ku fana na mupisalema Davhida, Yehovha u lava leswaku hi titwa hi sirhelelekile ku fana ni vanhu lava vulaka hi ku tiyiseka va ku: “Yehovha i Murisi wa mina.” *—Ndzimana 1.

Davhida mutsari wa pisalema leyi, a a ri murisi ku sukela loko a ha ri muntshwa. A a swi tiva swilaveko swa tinyimpfu ni vutihlamuleri lebyi murisi a nga na byona. Tanihi leswi a wu voneke nkhathalelo wa Xikwembu evuton’wini byakwe, u tsale leswi vuriwaka “pisalema ya xitiyisekiso kumbe leyi tshembekaka.” Vito ra Xikwembu leri nge Yehovha ri humelela eka ndzimana yo sungula ni yo hetelela eka pisalema ndzima 23. (Ndzimana 1, 6) Tindzimana leti nga exikarhi ka yona ti hlamusela tindlela tinharhu leti Yehovha a va khathalelaka ha yona vanhu vakwe ku fana ni murisi la khathalelaka tinyimpfu takwe.—Pisalema 100:3.

Yehovha u kongomisa tinyimpfu takwe. Loko tinyimpfu ti nga ri na murisi ta lahleka. Hilaha ku fanaka, na hina hi lava mpfuno leswaku hi famba hi ndlela leyinene evuton’wini bya hina. (Yeremiya 10:23) Loko Davhida a tsala u vule leswaku Yehovha u kongomisa vanhu vakwe “emadyelweni lama nga ni byanyi byo tala” ni le “tindhawini to wisela leti kumaka mati kahle.” U tlhela a va rhangela “emintileni ya ku lulama.” (Ndzimana 2, 3) Xifaniso lexi xa hi tiyisekisa leswaku hi tshembela eka Xikwembu. Hi ku landzela nkongomiso wa Xikwembu hilaha wu nga hakona eBibeleni, hi nga swi kota ku hanya vutomi lebyi enerisaka, lebyi phyuphyisaka ni lebyi sirhelelekeke.

Yehovha u sirhelela tinyimpfu takwe. Loko tinyimpfu ti nga ri na murisi ta chava naswona ti nga hlaseriwa hi ku olova. Yehovha u byela vanhu vakwe leswaku a va fanelanga va chava, hambiloko va “famba enkoveni wa ndzhuti lowukulu”—ku nga minkarhi yo nonon’hwa evuton’wini. (Ndzimana 4) Minkarhi hinkwayo wa va sirhelela naswona u tshama a lunghekele ku va pfuna. A nga ha nyika vagandzeri vakwe vutlhari ni matimba lawa va ma lavaka leswaku va langutana ni miringo.—Vafilipiya 4:13; Yakobo 1:2-5.

Yehovha u wundla tinyimpfu takwe. Tinyimpfu ti titshege hi murisi wa tona leswaku ti kuma swakudya. Na hina hi ni xilaveko xa moya lexi hi nga xi enerisaka hikwalaho ko pfuniwa hi Xikwembu ntsena. (Matewu 5:3) Lexi tsakisaka hileswaku Yehovha wa hanana naswona u lunghiselela malandza yakwe swakudya swo tala swa moya. (Ndzimana 5) Bibele swin’we ni tibuku leti sekeriweke eBibeleni, to fana ni magazini lowu u nga eku wu hlayeni, i xihlovo xa swakudya swa moya leswi enerisaka xilaveko xa hina xo tiva xikongomelo xa vutomi ni xikongomelo xa Xikwembu hi vanhu.

Davhida a a titwa a sirhelelekile naswona a a swi tiva leswaku loko a tshama a ri ekusuhi ni Murisi wakwe wa le tilweni, Yehovha u ta n’wi sirhelela “emasikwini hinkwawo ya vutomi [byakwe].” (Ndzimana 6) Xana u wu langutele hi mahlo-ngati nsirhelelo wo tano? Loko swi ri tano, dyondza ndlela leyi u nga tshinelaka ha yona eka Yehovha. Xisweswo, u nga ha titwa u sirhelelekile emavokweni ya Murisi Lonkulu, loyi a kongomisaka, a sirhelelaka ni ku wundla lava tshamaka va tshembekile eka yena.—Esaya 40:11.

Tindzimana ta Bibele leti u nga ti hlayaka hi May:

▪ Yobo 38-42–Pisalema 1-25

[Nhlamuselo ya le hansi]